第23屆Fuji Rock Festival（下稱Fuji Rock）於剛過去的七月尾已圓滿結束，一如以往，三日三夜（連前夜祭）的音樂節演出名單精采依舊，場內佈置同樣用心，處處都是影相位。然而，最容易忽視卻不可錯過的，還有場內外近一百個飲食檔攤。
第二次參加Fuji Rock的筆者，早已做足功課，務求走勻場內各處，試多幾款會場限定名物。可惜計劃永遠趕不上變化，在場內的時間除了要忙於趕場睇show，變幻莫測的天氣也令行程受阻，尤其是這次不幸遇上日本第6號颱風，連帶暴雨不斷。為了應付突如其來的天氣變化，我們選擇的食物以簡單輕便為主，幸而Fuji Rock揀選的飲食檔攤向來有質素，大家可以快速享用美食，補充能量繼續冒雨遊走大小舞台。今回好𢯊介紹幾間會場內的精選食店，有興趣的話不妨到其本店拜訪，或是記下店舖之名，期待在其他戶外音樂節或來年Fuji Rock再會﹗
這次Fuji Rock會場內共有約十個主要的飲食區域，大部分以日式食物為主，亦有少量西餐、泰菜、印度菜、越菜甚至意大利菜選擇。特別一提，無論食乜都好，最緊要記得帶備基本裝備——露營櫈。雖然飲食區有極少量木桌供立食之用，不過場內人頭湧湧，基本上是一位難求。唔想同人迫，唯有自備櫈仔，無論是在食店前即席開餐，抑或在舞台下找個位置邊食邊睇show，同樣方便。於現場所見，不少日本人更帶埋小型camping table嚟開餐，身為遊客的我們當然無辦法食得咁精緻，不過與團友們圍坐一起，傳來傳去分享食物同樣溫馨。
營養豐富清新之選
1/ 超fresh味噌青瓜
日本的農產品基本上是信心保證，但會場內就較難找到蔬菜水果等食品。注重均衡飲食的朋友，進場前不妨到二號停車場旁邊，由民宿經營的小食檔，買份當地出產的蔬果當早餐吧！雖然檔攤有提供番茄、玉米等選擇，不過為了可以邊行邊食，筆者選擇了較方便食用的青瓜，店家更提供自家製味噌來調味，新鮮冰鎮青瓜爽脆的口感，無論當作正餐或小吃，都是相當清新又健康的選擇。
味噌青瓜 ¥100 （約$7.3）
王子ペンション 苗場_949-6212 新潟県南魚沼郡湯沢町大字三国18
2/ 養生蜂蜜特飲
今年夏天日本的氣溫持續高企，即使身處於稍為涼快的新潟縣山區之中，被暴雨前的烈日直照時，還是非常酷熱。因此，不少店家都推出了專為補充身體水分、預防中暑而設的特飲，就如位於NGO Village旁的みつばちカフェ honobono号，便專門售賣以蜂蜜調製的飲品。店中使用的蜜糖都是由自家養蜂場採集，加上梅子或生薑等材料製成特飲，味道酸酸甜甜，既潤喉又解渴，更有預防中暑之用，令筆者也忍不住一再encore！
生薑蜂蜜特飲 ¥450（約$33）（左）
梅子蜂蜜特飲 ¥450（約$33）（右）
みつばちカフェ honobono号_http://honobono-go.com/
3/ 睇show必備好酒
在炎熱天氣之下，除了清水以外應該盡量少飲其他會加快身體水分流失的飲品，不過位於Red Marquee旁邊的いいちこ（iichiko）燒酌似乎是Fuji Rock必試名物，因為燒酌不止以當地純淨水源釀製，亦加入了清新水果口味，即使是平日不嗜酒的朋友都可以輕易接受。此外，比飲品還要吸引的是店家推出的Fuji Rock限定餐盤，唔想次次買tee、毛巾或水樽等行貨紀念品，這個設計與品質俱佳的made in Japan餐盤可算是非常值得入手。
檸檬鹽味燒酌 ¥550（約$40）
Fuji Rock限定餐盤 ¥1,000（約$73）
Iichiko_https://www.iichiko.co.jp/
最緊要快滋味輕食
1/ 山區牛奶雪糕
如果你是牛奶雪糕的愛好者，應該一定有試過號稱「日本最強軟雪糕」的Cremia吧？雖然在偏遠的新潟山區並沒有口感幼滑的Cremia，不過由山頂ALM-Arumu餐廳自家製作的牛奶雪糕其實一啲都唔輸蝕，同樣奶香濃郁，食落亦非常creamy，消暑一流。加上城市人的確冇乜機會居高臨下，望住遼闊山景嘆雪糕的確係一種享受，所以即使價錢貴少少都抵番！
牛奶雪糕 ¥500（約$37）
ALM-Arumu_949-6212 新潟県南魚沼郡湯沢町大字三国
2/ 脆皮爆汁香腸
當走進NGO Village區域，就會發現好多人拎住外型猶如波板糖般的卷卷香腸。這是來自日本各大音樂節常駐食店，並由志願團體朝霧JAMS’營運的朝霧食堂，自家製作的豬肉香腸。據稱這款香腸使用了油脂分佈平均的萬幻豚製成，食落彈牙又不會太油膩，加上煎香的外皮香脆惹味，是今趟旅程之中最推介的小吃。
萬幻豚肉香腸 ¥600（約$44）
朝霧JAMS’_ https://www.facebook.com/asagirijams/
3/ 微辣雞肉腸
如果要挑選最方便且企理的輕食，腸仔似乎是不錯的選擇，既不需要使用餐具，又適合與朋友分享。尤其是於人多擠迫的環境，越快能被處理掉的食物通常也越受歡迎。於是當走到鄰近小溪旁ところ天国的食店so星人時，筆者就買了兩串烤得香脆的雞肉腸。雖然腸仔的香氣十足，但味道方面只以微微的黑椒來調味，算是不過不失，剛好可當作餐前小食。
雞肉腸 各¥300（約$22）
so星人_https://www.facebook.com/30s-1511903992262105/
4/ 少女至愛香甜pancake
如果你對飲食好有要求，每日都要食埋甜品先覺得圓滿的話，就不妨到Oasis同Gan-Ban Square中間，齊集最多食店的區域，試一試Rainbow Café的招牌pancake啦！雖然pancake其貌不揚，不過咬落就相當有驚喜，餅皮是由新潟縣出產的麵粉製成，薄得嚟亦帶煙韌口感，加上忌廉、朱古力醬、香蕉和雪糕，簡直係perfect match﹗
香蕉班戟 ¥600（約$44）
Rainbow Café_http://www.malaika.co.jp/rainbow-cafe/
重口味飽肚正餐
1/ 熱辣辣 comfort food
通常入黑過後，加上持續暴雨都會令氣溫驟降。保暖衣物當然不可少，如果可以吃一碗飽肚又暖笠笠的食物就更加好。雖然每次經過Gan-Ban Square的時候，都覺得其他人捧住一碗碗拉麵，食到𠽌𠽌聲好似好好味，不過拎住湯麵無論進食或移動都非常不便，因此同樣熱辣辣的撈麵就成了最佳替代方案。由麺屋「極」炮製的大蒜醬油蕎麥麵配料豐富，麵底亦非常有彈性，加上濃濃的蒜香，相信會是重口味人士的最愛。
大蒜醬油蕎麥麵 ¥700（約$51）
麺屋「極」_950-0944 新潟県新潟市中央区愛宕3丁目10-4
2/ 拉麵走麵吖唔該！
相信唔少人都覺得拎住湯麵走來走去不太方便，因此於ところ天国的店家Ramen Enishi便推出了單獨售賣的拉麵配菜，包括叉燒、玉子與紫菜，個人覺得味道方面平平無奇，倒是後來追加的餃子比較出色，除了表皮煎得金黃香脆，內裡亦肉汁四濺，雖然份量較少，就當作留肚試多幾款其他食店的美食吧！
小吃拼盆 ¥500（約$37）（左）
煎餃子 ¥400（約$29）（中）
Tequila and Soda ¥600（約$44）（右）
Ramen Enishi_https://ramenenishi.com/
3/大碟夾抵食意粉
食得多日本嘢，有時都想轉吓口味。同樣位於ところ天国的食店Little Red Wing，就提供簡單的西式食品如意粉、腸仔。茄汁意粉的味道雖然不算驚為天人，不過勝在性價比高，如圖所見，這樣豐厚的份量只需800日圓，最適合與友人一同分享。如果嫌只吃意粉太單調，不妨多加一份小朋友恩物——八爪魚腸仔，簡簡單單又一餐。
茄汁意粉 ¥800（約$59）（左）
八爪魚腸仔 ¥400（約$29）（右）
Little Red Wing_ https://www.facebook.com/the.tiger.yummy.kitchen/
4/ 煙霧瀰漫豚肉飯
走進Gan-Ban Square，人氣食店元祖越後もちぶた全日都煙霧瀰漫，而且人龍不斷。雖然筆者與朋友們每日都想試吓咁出名嘅和豚究竟有幾好味，不過每次看到長長人龍都會令人為之卻步。終於在音樂節最後一天，我們在稍有空檔的時候加入隊伍，輪候了大概二十分鐘買來和豚串燒與豚肉飯。一試之下，的確好出色！一眾師傳在店內身水身汗燒製串燒，火候控制得恰到好處，令豚肉外層香脆可口，內裡肉質卻依然鮮嫩。而同樣使用高質銘柄豚製作的豚肉飯，肉片油脂較重，配上秘製醬汁及甘甜煙韌的新潟米，絕對不比餐廳中的貴價豚肉飯遜色。
和豚串燒 ¥500（約$37）（左）
玉子豚肉飯 ¥800（約$59）（右）
元祖越後もちぶた_951-8063 新潟県新潟市中央区古町通1452 藤和ビル1樓
5/色香味俱全完美pizza
已是Fuji Rock常客的La Locanda Del Pittore，是湯澤山區的著名食店，這次移師到音樂節中設店，對於製作食物的程序一樣毫不馬虎，甚至將大型窯烤爐搬到會場，即席以柴火烤焗pizza，筆者離遠聞到香氣已經覺得非常吸引。由於所有食物都是即點即製，因此每次輪候時間亦較長，大概需要二十分鐘，不過如此高質的pizza的確好值得等，就如圖中的Margherita pizza，上面舖有新鮮番茄與羅勒葉，更有滿滿的mozzarella cheese，新鮮出爐的時候香氣四溢，完美演繹何謂「邪惡芝士拉絲」。而餅底則外層酥脆內層鬆軟，口感豐富卻不油膩。雖然是有點誇張，但筆者與友人在音樂節的每一天都必定要吃一次pizza，好味程度可想而之。（笑）
Margherita pizza ¥1,800（約$133）
La Locanda Del Pittore_https://blog.pittore.jp/
後記：飲食區的禮儀
隊尾負責舉牌
飲食區人龍處處，雖然不少食店都有製作「最後尾」指示牌以茲識別，令客人不會排錯隊，不過並不是每間店舖都有安排職員高舉牌子管理人流，令舉牌的責任落在排隊尾的客人身上。下次輪到你舉牌時，請不要覺得太奇怪啊！
電子貨幣省時
此外，今年大會加強宣傳以電子貨幣取代現金消費，不少紀念品商店與食店甚至加開了快速通道予使用電子貨幣的人士。大家下次參加Fuji Rock時，不妨預先充值IC卡如Suica及Pasmo等等，在場內就可以節省更多輪候時間。
必將垃圾分類
Fuji Rock既然是全世界最環保的音樂節，場內的垃圾分類自然是備受重視的一環，所以大家進食過後必定要將即棄餐具，帶到有清晰標示的回收區棄置。即使睇唔明日文都唔緊要，因為回收區長期有工作人員駐守，一定可以幫你將垃圾好好分類。而回收得來的塑膠製品，就會被製成垃圾膠袋或廁紙等等，讓樂迷於來年的音樂節中使用，貫徹環保精神。順帶一提，因為東京奧運的關係，明年的Fuji Rock將延期至2020年8月21至23日舉行，有興趣參加的朋友就要留意了！
TEXT & PHOTO / R・PHOTO RETOUCHED / MARIE ANSON