節日，是指生活中值得紀念的重要日子。我們一生中會遇上無限個節日，記唔到咁多好正常﹗家陣提提你，第二屆女人節（Women’s Festival 2019）即將回歸， 話晒係香港首個專為本地女性而設的活動，當然值得重視﹗《好𢯊 》邀請咗8位參與Women’s Festival 2019的女性為女發聲，講吓點解慶幸我是女人，如果你都有共鳴或者好想一齊探討吓女性在不同領域所面對的挑戰，事不宜遲，齊齊發聲﹗
Tina Liu （劉天蘭）
（著名形象顧問 / 設計師）
「好憎所有對女性嘅標籤，因為任何標籤都係負面﹗」
著名形象顧問Tina認為身為女性係一件好自豪嘅事，「作為女性可以攻防兩邊都得，軟硬兩邊都得，而且女性嘅生活比男性更豐富，例如女性可以懷孕生子。其實我好早已經覺得以進化論嚟講，女性係行先過男性好多嘅﹗」社會上好多人對女性加上好多標籤，Tina話唔覺有邊個特別值得提出嚟，因為根本標籤就係負面﹗「有啲好古老嘅標籤譬如話女人之家就乜乜乜啊，我都講唔出﹗因為喺我生活裡頭無出現過呢啲標籤，慶幸我係喺個咁嘅環境中長大。其實任何labelling 都唔好㗎啦，個個label我都憎﹗」
Kayla Wong 王曼喜
（環保時裝品牌創辦人 / 同志平權權倡導者）
「點解會覺得女仔同女仔一齊就係嘥咗呢？」
身為藝人王敏德和名模馬詩慧之女，Kayla自小在鎂光燈下成長，不愛理會世俗眼光的她直言︰「我好唔鍾意啲人話點解女仔、特別係一個靚女，點解係gay㗎呢？或者講啲悔氣說話例如話你嘥咗喎咁樣，我唔係好明呢個concept，點解會覺得女仔同女仔就係嘥咗呢？我同一個heterosexual嘅男仔結婚就係正常？呢啲說話好stereotypical，而且好唔open minded嘅一種標籤囉 ﹗女人喺每一個成長階段都會經歷好多唔同嘅嘢，由喺中學要經歷嚟M去到大個生小朋友，由生育過程去到點樣教育小朋友，做女人真係好偉大﹗」
Serrini （獨立音樂人）
「 就算你叫我『臭x』我都覺得冇嘢㗎喎﹗You can’t attack me!」
自稱「陀地歌姬」的唱作人 Serrini身分多多，她將於 Women’s Festival 2019化身成講者，分享自己的「克制」所指為何，以及作為一個女性如何在香港商業流行和獨立圈間游走。「我好自豪我係一位女性， 因為我係我自己﹗社會有好多無知嘅人都會對女性有好多無謂嘅標籤，而我對住啲標籤通常都係用一個憐憫嘅心去對待，因為佢哋都唔知自己講緊乜。呢個社會成日叫人哋八婆就可能唔係咁好啦，You can’t attack me! It’s too weak! 八婆令我覺得好自豪啦，呢個可能係一個比較冇咁有威力嘅武器，我需要一啲強啲嘅標籤去令我覺得hurt囉﹗『臭x』我都覺得冇嘢㗎喎，It shows who you are!」
Afa Lee 李思汝
（插畫家）
「靠樣搵食？咁講抹殺咗女性付出過嘅努力﹗」
從模特兒、插畫家、多媒體創作人到視覺藝術家等身份，一直以來，Afa享受多重身份，也為生而為女性而自豪。「雖然有時月經嚟嗰陣會好痛苦，就會諗如果係男性就好啊點點點，但係畢竟我生而為人本身係一個女性，I’m proud to be a woman﹗其實香港女性都擁有好多自由，女性嘅地位算幾高，好少會受到不平等嘅對待。不過有時都會有啲人身攻擊，覺得做到呢啲嘢係因為有男人養、又或者係靠父幹？靠老公？甚至乎話女人係公廁，呢類比較難聽嘅說話。『女人做到因為可以靠樣而我呢啲就要靠食力啦﹗』總有班人覺得女性靠樣搵食，咁樣講抹殺咗女性付出過嘅努力，咁我覺得唔公平囉。正因為咁，有啲女性會有動力去努力，令人打破咗呢一啲既定印象，證明其實努力係應該值得被尊重嘅。」
Karen Wong 王筱敏
（公關公司創辦人）
「點解生咗小朋友之後一定要做全職媽咪？」
身為公關公司On Air Collective創辦人之一，同時是新手媽咪的Karen，最唔鍾意社會上大覺得女性生咗小朋友之後一定要成為全職媽咪。「我同我家姐Samantha一齊創辦咗我哋自己嘅公司，最近成為媽咪之後，發現好多人都對女性喺家庭上嘅角色有一定嘅期望，咁我覺得其實喺一個家庭入面，所有角色都可以分配分擔嘅，咁even女人都可以好成功，希望大眾可以接受到身為一個媽咪都仲係可以擁有自己嘅事業呢一個夢想，可以係兩者兼備囉﹗ 」
Thierry Chow 周亦彤
（玄學家）
「女人可以好多元化，可以係風水師，堅強之餘都可以好溫柔。」
自小到加拿大唸書的Thierry，大學主修藝術和設計，熱愛藝術和時尚。由於父親是香港風水大師周漢明，長大後她亦開始隨爸爸學習風水，將熱愛的設計與擅長的風水混合。「其實我都好自豪自己係一個女性，因為做女人唔止可以發揮到自己嘅堅強，堅強之餘亦都可以好溫柔，其實可以係好多元化囉﹗ 作為一個女性風水師，我聽得最多同埋最唔鍾意聽到嘅，係啲人會好質疑你係女仔點解會做呢一行，覺得女性係會比較軟弱啲啊， 應該做返啲斯文工作，或者喺屋企煮吓飯，洗吓碗咁樣嗰啲工作囉，聽到呢啲說話有時會唔係太開心，但係自己可以從工作方面去表達到自己嘅堅強。」
Pamela Tsui 徐沛筠
（性/別公義委員會成員）
「唔好以為情慾喺女性嘅生活上唔重要﹗」
外表斯斯文文，說話陰聲細氣如王菀之的Pamela，講起社會上女性的不公就中氣十足︰「我好自豪係一個女性，其實我諗唔到有咩原因係唔自豪﹗我好唔鍾意呢個社會上有好多人會覺得，情慾喺女性嘅生活裡面係唔重要。即係好多人會問你有冇拍緊拖？如果你係單身，啲人就會懷疑你冇愛情冇個婚姻係咪唔完整，但冇人會諗，其實你冇性生活係咪都係唔完整呢？社會進步，我哋喺公共領域或者職場可以同男士一齊競賽，咁女性嘅情慾呢？呢一方面仍然好需要去理解，仲有好多探索嘅空間﹗」
Sam Wong 王筱揚
（公關公司創辦人）
「呢個年代女性已經好敢言，唔會怕社會上任何偏見。」
Samantha 是公關公司On Air Collective的創辦人之一，大家可以叫佢做阿Sam。「呢個年代女性已經好敢言，所以我好proud to be a woman， because we are not afraid of the society﹗有好多傳統嘅人會覺得女人應該係一個媽媽嘅角色，只係會留喺屋企，甚至因為你係一個新抱而應該淨係照顧老公， 咁我好唔同意呢個睇法， 喺男女平等嘅社會其實大家有大家嘅長處，可以互補崗位，其實由我哋媽咪嘅年代已經有人開始明白需要爭取女性嘅權利，我覺得將來女性嘅地位都會繼續改變。」
Women’s Festival 2019
2019年8月23日至9月1日
https://womensfestival.hk/