今個夏天，原本應該無憂無慮地放暑假嘅學生們好似特別忙碌。唔知身為成年人，同樣對社會大事放心不下嘅你，又有無掛住細個可以輕輕鬆鬆專心放假嘅日子？
相信好多人同筆者一樣，小時候嘅生活都離不開卡通片、玩具、音樂，即使偶然要面對學業壓力，只要揀幾樣心愛嘅文具陪伴渡過難關就好容易開心返。
時至今日，大家都成為咗社會上一粒小齒輪，要重拾以往純粹的快樂並唔容易。以下介紹嘅朋友就決定暫時脫離打工仔生活的刻板與規律，將喜好變成職業，無論係開設自家品牌，定係創立小店都好，所選的貨品總與昔日美好回憶有關，希望在累人的生活之中，為自己與同好帶來紓解壓力與分享快樂的機會。
OOampm Collectible
從世界各地收集玩具，打造玩具愛好者的交流場所
老實講，這個訪問是在有點混亂的情況下完成。
這樣說好像不太專業，但無論是筆者或是攝影師，當走進玩具店OOampm Collectible之中，都好似立即變返小朋友，行咗去兒童樂園一樣，對周遭每件玩具都非常好奇。嘉嘉除了是位稱職的店主，亦仿如一部玩具百科全書，不斷將每件收藏的歷史娓娓道來。每每在我們一問一答之間，總有人突然被某件出現於眼角的玩具吸引，話題便急急轉向，成為了沒完沒了的循環（笑）。
玩具店係一個好毒嘅地方
甫踏進店，店主嘉嘉就這樣跟我們說。
「毒性」的起源，正是由她小時候開始。她說：「細個鍾意睇卡通片，特別係Tom and Jerry、Snoopy同賓尼兔，都係偏向美式，而且冇乜對白。我亦比較鍾意配角，例如Snoopy入面嘅Woodstock，因為佢哋往往係用嚟襯托主角，所以性格會再生動啲，雖然出場時間冇咁多，但依然令人印象深刻，所以我會特別留意佢哋。」長大後，這個習慣持續︰「而家都仲會睇啲以前年代，無對白嘅卡通片，其實係好放鬆㗎，好似唔需要點思考，但帶俾你嘅歡樂係更大，睇完會覺得好舒服。而新啲嘅卡通就鍾意Beavis and Butt-Head，佢哋嘅生活比較糜爛，人生目標就只有睇電視，但後來竟然可以發展成一套電影，都算係奇葩嚟。呢種將無聊事認真做嘅片集，係就係帶唔出咩大道理，但勝在夠貼地，睇得好開心。」
由細到大睇得卡通片多，但收集玩具的習慣就係近年先開始，並以美式舊玩具為主，不經不覺愈儲愈多，更有諗過要另覓倉庫來安置心頭好。終於在三年前，嘉嘉決定開設小店OOampm Collectible，讓心愛（而且捨得售出）的玩具有個安樂窩，亦成為她與其他玩具愛好者交流的場所。
在店內走一圈，不難發現除了Snoopy外，麥當勞系列公仔所佔的比例亦相當大。其實這亦與嘉嘉的童年經歷有關，「相信大部分我哋呢個年代嘅人，童年回憶都一定有麥當勞份，尤其係大家都會好恨去開生日會，同埋每次食開心樂園餐都會得到嘅玩具。而我細個最常去就係藍田嘅麥當勞，無論係佢店前面嘅長電梯、店裡面嘅大樹裝飾定係漢堡包櫈，對嗰陣嘅我嚟講都係好吸引。」
在一眾麥當勞角色之中，嘉嘉最鍾意配角fry guys，呢批產自80年代嘅公仔，售價由$60至$100不等。
仲記唔記得麥當勞有個教授嘅角色？呢個包裝完好嘅Professor公仔仲係產自70年代添！$520
除此之外，店內的玩具其實亦橫跨不同時期，最早期的更可追溯到50年代，每件都是由嘉嘉於世界各地親自收集。她對挑選玩具亦很有要求，「我唔鍾意儲恐怖邪惡系列嘅角色，例如Chucky同小丑我係接受唔到嘅。我鍾意啲肥肥哋可愛啲嘅公仔，總之以個樣可愛為先。同埋我唔鍾意玩具係污糟、爛溶溶咁，所以就好少會網購，要全部都要自己親手揀過，覺得係自己接受到嘅quality先會買。」
分別於60與70年代出產於香港的芝蔴街Bert和 Ernie公仔，手工頗細緻。$320-$750
當時香港製造的玩具通常是人手上色，因此每隻都是獨一無二。
舊年代工藝可能未夠發達，因此玩具的品質總會參差不齊，但對嘉嘉來說這亦是玩具最吸引的一點。她說：「公仔唔係隻隻一樣樣先得意，雖然有啲造工差啲甚至會變咗好古怪嘅『輻射樣』，但我都一樣會儲，前提係氹到我開心就得。」雖然收藏品來自世界各地，但嘉嘉最喜愛的一批玩具都有一個共通點──香港製造。六、七十年代香港曾經是全球最大的玩具出口重鎮，但現代工業沒落，要搵返以往本地優良工藝製作的玩具，就只能於外國入手。
Amazing Twins 外星人公仔（非賣品）
直至近代，香港製造玩具的模式由以往於工廠量產，轉為由不同獨立廠牌推出原創設計，再少量製作。令嘉嘉最愛不釋手的，就是由成立於1996年的本地設計公司Amazing Twins，所創作的一對將科幻與現實感覺融合，穿著西裝的尖頭外星人公仔。當時，全球陷入外星人狂熱，仲記唔記得《今日睇新D》播足成個星期嘅「解剖羅玆威爾外星人」事件？呢類外星神秘事件亦令Amazing Twins的發展更加成功，仲試過帶埋作品去日本擺展覽添！不過，呢對咁有收藏價值嘅絕版公仔，亦絕對唔係有錢就買得到，當初嘉嘉亦花了多番唇舌才可以順利購入。「有次喺聯合廣場一間舊唱片店嘅角落見到佢哋，係店主伯伯收藏嘅。我都係去左好多次，同伯伯傾咗好耐佢先肯賣俾我。其實我都明嘅，佢都唔想將公仔賣俾啲會對玩具唔好嘅人，所以要同佢溝通多啲先。」
到訪問的後段，筆者請嘉嘉介紹一樣她最夢寐以求的玩具，她想了好久好久，口中不斷說「好多喎」、「太多喇」，一直拿不定主意要選哪一款。最後，她沒有直接答我，她以一次深刻的經歷回應：「以前有一次去美國，用咗好多時間買滿咗一個行李箱嘅玩具，但心目中仲未諗好邊啲捨得賣邊啲一定要自己儲嘅。點知喺轉火車嘅時候成個行李箱就消失得無影無蹤，唔知道喺邊度俾人偷咗，嗰吓感覺真係好心痛好心痛⋯⋯」雖則錢財身外物，但歷史悠久的絕版玩具實在買一件少一件，加上店主與玩具之間獨特的故事，令每件收藏都有如無價寶一樣珍貴。所以，實在唔怪得嘉嘉咁三心兩意，因為每次要揀到款式與新淨程度都合心意的玩具都唔容易，當有緣遇上所有條件都啱心水的玩具，如果仲係要問佢最想擁有邊樣，答案應該會是「全部都要」吧？
OOampm Collectible_尖沙咀利時商場12樓 6887 1618
Leeeeeetoy
自己造嘅玩具梗係最好玩！
無論係咪成長於物質豐盛的年代，自製玩具係每個人成長的必經階段。小時候想像力總是比較豐富，隨手拎起一把間尺、一條橡筋，再加一支鉛筆就可以組裝成玩具，總之乜都玩一餐。大個之後，有人依然堅持手製玩具，更愈整愈專業，甚至將之變成職業。
Leeeeeetoy主理人Lewa
人手製作嘅味道，唔止玩具咁簡單
本地創作人Lewa與女友Lego於2015年成立自家玩具品牌LeeeeeeToy，並以製作搪膠玩具為主。當中大部分生產工序如雕模、上色、裝嵌等，都是他們於小小的工作室中親自完成，令每件手製玩具都顯得獨一無二。在訪談間，Lewa透露其實一早已經打算與女友一同製作屬二人的玩具，當7、8年前真正接觸和了解搪膠玩具，亦交過唔少「學費」後，就選定了搪膠為最佳選擇。他說：「用搪膠嚟造玩具係因為所用嘅物料有彈性，方便進行唔同程度嘅改裝，而且整出嚟嘅公仔好有質感，完整度高，更加可以呈現人手製作嘅味道，令我哋覺得每件製成品都唔係純粹係一件玩具，仲好有藝術感。」
Lewa分別於墨西哥與阿根廷購入以上幾件產於七、八十年代的HULK吹塑玩具，雖然手工較粗糙，但帶有莫明的喜感。
當決定好發展方向後，下一步當然是要開始構思玩具的造型。過去一直是玩具迷的Lewa，自言從小到大沒有太沉迷看動畫，不過就好容易被造型或包裝有趣、玩法與概念新奇的玩具吸引。「我一向都有收藏南美洲bootleg吹塑玩具嘅習慣，原因係佢哋嘅造型夠古怪同罕有。其中我最鍾意嘅HULK，本身造型已經有啲滑稽，再經當地師傅特別審美下，造出嚟嘅造型有時真係異常奇特（甚至可以話係樣衰）……簡直令我愛不釋手，誓要一直收藏更加多。」
講到概念和玩法上，Lewa最喜愛嘅係產自90年代的Micro Machines。「呢款玩具將一連串複雜嘅機關，放喺一個可以簡單摺埋嘅『頭』裡面。每次打開都可以立體重現整個電影畫面，仲有埋配合實際劇情同比例嘅微型公仔，好似一個屬於自己嘅神秘基地一樣，完全撃中玩家心理。細個第一次接觸到嘅時候簡直係驚為天人！毫無疑問，Micro Machines 一定係對我影響最深嘅玩具系列之一！」
SEESEE IN WONDERLAND系列 （Left to right） $380 each
SEESEE: WHY AM I HERE?
SEESEE: WHO AM I?
SEESEE: WHERE DID I COME FROM?
SEESEE: WHAT AM I GONNA BE?
儲得舊玩具多，當Lewa著手製作自己嘅玩具時，或多或少都會受到啟發。「好似我哋2015年第一個玩具創作『大地之子EARHTLY』，佢有無限腹肌，代表永遠堅強，就係HULK同Michelin車呔人嘅混合體；另一個玩具系列『SEESEE IN WONDERLAND』嘅雙頭男孩，天生兩個頭共享同一個身體，天天毫無顧慮同自己玩遊戲，帶有傻氣但純真嘅個性，如無意外就係受美國快餐店文化，其中一個重要嘅象徵人物BIG BOY影響。」
已絕版的「大地之子EARHTLY」套裝中附有男孩與女孩的頭部組件，讓玩家自由轉換。玩具亦是限量製作，並於腳底印有獨立編號。$980
自2015年發展至今，Lewa與女友一直研究搪膠玩具可以變化的無限可能，更曾經帶過自家創作參加內地、台灣與日本等地的玩具展，令LeeeeeeToy有更多人認識。其中最受客人喜愛，對二人來說最有意義嘅又係邊款玩具？「一定係『大地之子EARHTLY』，因為喺造型同玩法上，佢嘅玩法係前所未見嘅，不過單單咁樣都唔係令玩家難忘同喜愛嘅主要原因，我諗EARTHLY本身所帶有嘅精神同意義先係最重要嘅。」Lewa希望玩家每次拎上手玩或者欣賞EARTHLY的造型時，都可以感受到「你並不孤單，我們全是同一體」的訊息。
雖然呢一刻大家冇實物喺手，唔可以親身感受EARTHLY有幾可愛，但不妨一睇包裝盒背面的介紹，隔空接收EARTHLY希望傳達俾每位玩家嘅治癒力量啦！
「浩瀚宇宙間，飄蕩著一顆微麈，名地球。微塵的表面，凝聚着一群小菌，叫人類。小菌跟小菌相遇的那一刻，『大地之子』就此誕生！大地之子，男女同體，他／她永遠是你最好的朋友，可伴隨你的心情轉換不同的性格，隨時隨地供給你源源不絕與無條件的愛！大地之子跟萬物整體相連，他／她的出現使宇宙發展出一種可扭轉一切的力量，由頭到腳指尾都可以為任何人帶來無限的驚喜！快把大地之子帶回你的家！他／她的彩虹力量將會把無限的歡樂傾灑在你世界的任何一個角落！DON’T WORRY，BE EARTHLY！」
LeeeeeeToy_http://www.leeeeee.com/
延伸閱讀︰買得到的童年：店主精選不可再錯過的寶物！（下）那些年的卡式帶、文房具、原畫