Type IV cassette
獨佔音樂空間的浪漫
數數手指，香港的大型唱片店似乎已所剩無幾。在連鎖集團都一一倒閉的逆市之下，竟然有人會反其道而行，踏入音樂圈子開設小店，而且小店所售賣的是比CD與黑膠唱片還要小眾的音樂載體──卡式帶。
提起與卡式帶的淵源，一直是黑膠與Hifi發燒友的店主Nelson這樣說：「小學時期受兩個哥哥影響開始喜歡聽歌，咩都會聽吓，好似許冠傑、譚詠麟同Beyond等等，以前仲有儲埋黑膠添。可惜後來扔晒了，大個咗當然會覺得好後悔。但幾年前偶然於網上搵到Beyond嘅全新舊卡式帶，買咗返嚟用cassette deck播，發現其實卡式帶都可以好靚聲！」唔買由自可，一買就幾乎停唔到手，Nelson儲儲下已經有幾百盒帶喺屋企。後來把心一橫決定創立小店，希望重新推廣卡式帶這種舊年代的寶物，並將店名定為「Type IV cassette」，顧名思義是取自卡式帶中的Type IV（金屬帶），即最新型、最耐用，且聲色最好的一款。這亦成為Nelson的選貨宗旨，「我希望呢度賣嘅卡式帶會令人覺得係long-lasting、高質素嘅。」
Bootleg卡式帶，在音樂史上有重要地位
Type IV cassette店面只有80呎，但就有一整道牆都放滿卡式帶，逐隻仔細睇都要花唔少時間。當中大部分是八、九十年代外國rock band出品，也有少量香港歌手如張國榮、葉德嫻與林子祥的經典之作，全部都是由店主於網上搜購回來。而最特別的，可算是年輕一代未必太熟悉的Bootleg（非官方錄音專輯）。喺未有手提電話之前，好多樂迷睇演唱會嘅時候都會帶埋錄音機去錄低現場實況，雖然音色冇咁好，但呢種專輯的確於流行音樂歷史上有好重要嘅地位。據Nelson所講，原來唔止係音樂，就連再偏門啲嘅內容，例如係收錄達賴喇嘛演講嘅卡式帶都會有客人買走。各位有興趣嘅朋友，不妨親自到店中尋寶啦！
樂迷自製的Bootleg卡式帶，連封套都非常土炮。$40-$130
除了卡式帶外，店中亦有售賣狀態良好的經典Walkman，例如早於1986件推出時已價值不菲的SONY DD 100武道館。
SONY WM-DD 10 $3,500（Left）
SONY WM-DD 30 $5,500（Middle）
SONY WM-DD 100 BODOO KHAN $10,000（Right）
雖然卡式帶已經係上世紀嘅產物，不過平時儲埋咁多帶，唔知Nelson最鍾意又係邊隻？「對我嚟講最有意思嘅，係Pink Floyd嘅《The Wall》，因為細個已經有睇過呢套電影，佢嘅劇情、主題係比較反叛啲，但仲係好符合現代社會嘅情況。加上以前哥哥有買呢隻黑膠，我哋喺屋企會經常聽，所以對呢張專輯嘅音樂好有印象，而家聽番都唔覺得老土。」
Pink Floyd《The Wall》$160
通常大家只係留意牆身嘅貨架，好容易會錯過身後一個放滿「寶物」嘅玻璃櫃，其實嗰度嘅卡式帶都係非賣品，但如果你好奇想睇吓Nelson嘅私人珍藏，佢都好樂意同你分享㗎！「呢度有啲係Bootleg帶，最特別嘅有1997年戴安娜王妃喪禮嘅錄音。另外又有好多係70年代英國版嘅帶，包括我自己好鍾意嘅The Beatles同David Bowie，尤其係《The Rise and Fall of Ziggy Stardust and the Spiders from Mars》 呢隻專輯。記得以前睇過一個達明一派嘅訪問，佢哋都好鍾意Bowie，有次去英國嘅時候仲特登去番呢隻專輯嗰條街，影番張一模一樣嘅相，所以我覺得呢盒帶都好有紀念價值。」
木櫃入面的卡式帶是Nelson的私人珍藏，大多是70年代的出品。
以單曲（single）形式發行的卡式帶不連膠盒，只以紙封套包裝。（非賣品）
開店至今只有幾個月，問及新手老闆Nelson在這段期間的感受，他答得簡直又直接：「可以聽歌囉！」的確是標準樂迷的答案。後來他再解釋說：「喺呢個年代可以靜靜哋聽歌都係一種luxury，因為屋企有細路，以前返工又唔多時間聽，而家有間舖可以點聽都得，呢件事係好開心。」原來男人的浪漫，有時只係需要一啲私人空間就足夠。而且聽歌聽得多，間中仲有意外發現添！「而家聽得愈來愈多舊歌，就會發現有好多歌自己以前都有聽過，但已經唔記喺邊度聽，或者唔記得歌名。好似我呢排聽番英國樂隊Genesis，先知道原來佢哋唱過嗰首〈The Brazilian〉，喺我細個睇過一套講反核、反戰嘅卡通片《When the Wind Blows》有出現過。」舊卡式帶除了勾起Nelson的兒時回憶，亦令他更加欣賞舊年代的美學。「雖然好多卡式帶嘅封套設計唔係特別靚，不過佢哋裡面張貼紙好多時撞色撞得好靚，好值得欣賞。」
Genesis《Invisible Touch》（非賣品）（Left）
Graham Parker《Howlin Wind》$80 （Right）
Genesis《Selling England By The Pound》$100
不過，本地再次復興的卡式帶市場並未發展成熟，這亦為Nelson帶來現實與期望的落差。「而家開街舖嘅影響力好細了，雖然會有熟客專登嚟搵舊帶，亦間中都有客人路過撞入嚟望吓，但大部分人始終都係鐘意上網、碌手機，唔係個個都會有心機落嚟搵嘢聽。當然上網聽歌係方便，不過舖頭嘅帶就係由我揀過，覺得高質先放出嚟，當然仲可以過嚟同我吹吓水添！」唔知呢一刻習慣用音樂串流平台聽歌嘅你，又有冇諗過其實可以偶爾改變聽歌嘅習慣，去支持一下卡式帶呢種舊式音樂載體？
Type IV cassette_佐敦彌敦道240-252立信大廈13號地舖6828 9170
FB: https://www.facebook.com/t4cassette/
TOOLSS
自己做老闆 樣樣文具都有得揀
對於學生來說，平日返學穿著的校服、皮鞋，甚至髮型都有一定規限，想保留番少少個人風格，唯有從文具著手。不過，小時候零用錢有限，想得到心儀的文具都唔容易，除了在考試默書加倍用功博取獎勵外，平日亦要落足嘴頭扭爸爸媽媽買，即使唔係每次都成功，最少得閒可以入文具舖行個圈，都已經夠滿足。
TOOLSS主理人Kecoj
本地文具及咖啡店TOOLSS主理人Kecoj，直言自細已是個「文具控」，流連文具店更是他其中一段最深刻的童年回憶，「細個嘅時候我住喺白田邨，放學之後必定會經過屋企附近一間文具舖，係好典型門口會掛住西瓜波、籃球嗰種。以前成日會『lur』爸爸媽媽帶我入去睇嘢，唔買都睇吓啦，久而久之就變咗一種習慣。」同好多人一樣，Kecoj小時候用的文具都是由父母購入，款式亦以實用為主。而事實上，他鍾情的卻是更花巧的選擇，「細個好想擁有一部手攪鉛筆刨，因為覺得佢大大部好勁咁，用落又似一件玩具。再大個啲我有多啲零用錢之後，就開始留意原子筆，因為我好鍾意練字，亦終於脫離咗小朋友時期，返學只可以用鉛筆同擦膠嘅生活，所以會物色吓啲高質嘅原子筆。不過以往比較少選擇，偶然買到一支BiC嘅四色原子筆，或者CLIC GOLD原子筆就覺得好厲害，因為兩支都係經典之作。」
Staedlter 手攪鉛筆刨 $250
畢業後的Kecoj一直在傳媒界工作，直至2014年，他終於離開了熟悉的工作圈子，打算自己做老闆，並集合了「文具」與「咖啡」兩大他最愛的元素，創立了二合一café──TOOLSS，選址是充滿童年回憶的石硤尾，就連店內的選物很大程度上都受兒時喜好影響。他說：「細個未試過擁有一部手攪鉛筆刨，大個咗用過之後就知道呢種鉛筆刨點解咁好用。好似而家店中都有賣，亦係我覺得最好用嘅施德樓MARS501180鉛筆刨，因為佢所有部件都好實淨，而且刀片質量好，唔需要好用力攪動都可以刨尖支筆，唔似得啲比較土炮嘅手攪鉛筆刨，刀片比較弱，需要將支筆夾到好實先刨到，又會令到筆桿磨到花晒。」
此外，自認是完美主義者的Kecoj對於擦膠亦好有要求，「由細到大我都有一個習慣，就係用擦膠只會由一個角開始用，而唔鍾意每個角都擦到圓晒。」多年來用過不同品牌的擦膠之後，Kecoj最愛的依然是來自日本品牌的出品，「店入面賣嘅有八成都係日本文具，用咗咁耐始終覺得佢哋嘅質量係比較好。當中亦有啲都係經典品牌，例如radar、Tombow等等。仲記得之前蜻蜓牌Tombow為咗慶祝MONO擦膠面世50周年，喺日本推出咗好多大型企劃，最印象深刻嘅當然係嗰架擦膠巴士啦，見到嘅時候都勾起我好多學生時候嘅回憶，亦都好佩服佢哋嘅包裝用咗咁多年都冇變過，歷久常新。」
(Top to Bottom)
Tombow Air Touch擦膠 $15
Tombow MONO Light Touch擦膠 $10
Tombow MONO smart 擦膠 $15
潮流轉得快，做到新舊共融並唔容易
身為文具店老闆，Kecoj自然非常留意市場上的新產品。不過，他絕對是貪新又念舊，仲堅持每日都袋住支筆出街，以便記錄日常事項。「好多時我都會將支筆攝喺pocket tee個袋度，而我最常用嘅，一定係BiC嘅CLIC GOLD原子筆。仲記得細個嘅時候，CLIC GOLD已經係好classic㗎喇。雖然佢嘅外貌好簡約，墨水顏色又係偏向老土一啲，不過襯埋金屬clip位用落就非常方便。以前呢支筆要賣成$20，身為學生嘅我就唔捨得買喇。」時至今日，CLIC GOLD已經成為TOOLSS的
“長期熱賣產品，Kecoj對此更加表示感動：「見到BiC呢個有六十幾年歷史嘅品牌，到今日依然樂於同唔同界別嘅牌子合作，例如BEAMS與TOOLS to LIVEBY(禮拜文房具)等等，都會令我覺得喺呢個科技發達，潮流轉得咁快嘅年代，仲可以做到新舊共融真係非常唔容易，亦好值得珍惜。」
（Top to Bottom）
TOOLS to LIVEBY x Bic CLIC GOLD 棗紅筆桿黑色原子筆 $45
TOOLS to LIVEBY x Bic CLIC GOLD 白色筆桿黑色原子筆 $45
BiC CLIC GOLD 螢光粉紅筆桿黑色原子筆 $25
BiC CLIC GOLD 螢光綠筆桿黑色原子筆 $25
咁啱得咁橋，筆者在整理以上訪問時所用的，亦是兩年前購自日本的長場雄 x BiC CLIC GOLD原子筆。事實證明，典雅又實用的設計唔單止可以跨越年代，仲令人有想儲齊唔同特別版嘅衝動。
TOOLSS_石硤尾偉智街38號福田大廈地下2-3及37號舖 3954 5135
FB: https://www.facebook.com/toolsshk/
unun
逐格拼湊童年快樂
細個睇得電視多，總會被大人話冇益、壞眼。但大人又知唔知，小朋友放學後可以專心一致睇卡通，其實係一種有錢都買唔到，而且最簡單嘅快樂？到咗今日，童年雖然已經離我哋好遠，不過要重新感受細個嘅美好畫面，都唔係完全冇可能。本地選物店unun早前就搜羅了一批珍貴的賽璐珞原畫，每張都由工藝精湛的動畫師親手繪製，拼湊起來就成為了一套套陪伴我哋成長的卡通片集，等大家都有機會逐格重溫經典。
unun兩位主理人Lauren(左) 與Kaho(右)。
對收藏者而言，畫面背後的意義大於一切
提到最初發掘賽璐珞原畫的淵源，主理人之一Kaho這樣說：「上年我哋引入吉卜力動畫黑膠，其中兩張《天空之城》原聲大碟附送複製賽璐珞畫。唔少客人覺得好有興趣，同時『原畫』二字又好似有點遙不可及，所以我哋決定透過 unun 同大家深入分享究竟咩係賽璐珞原畫。」雖然愈稀有的原畫愈是價值不菲，不過對於收藏者而言，畫面背後的意義往往大於一切。「收藏賽璐珞原畫係一種實在嘅回憶。無論係咪著名場景，一張原畫就係當年螢幕上播放嘅一格畫面，係真正獨一無二咁存在。好多人大個之後會搵番細個錯過咗嘅動畫玩具，收藏賽璐珞原畫其實都類似，而且係直接留住動畫中嘅一格畫面，感覺好似比玩具更加密切。」
《櫻桃小丸子》小丸子賽璐珞原畫 $4,780 (Left)
《咕嚕咕嚕魔法陣》歌莉賽璐珞原畫 $980 (Right)
賽璐珞原畫通常是分層繪製，方便節省工序，減省成本。原畫右上角通常會附有編號，英文字母代表層數，數字則代表幀數次序。（Left）
收藏賽璐珞原畫時可以留意附帶的線稿，上面會清楚勾勒出角色的輪廓，以及用色指引，是每套動畫作品的雛型。《Slam Dunk》三井壽賽璐珞原畫 (非賣品)（Right）
在陸續收集賽璐珞原畫的過程中，Kaho亦同時想起了自己的童年生活，「我成長於九十年代，每日最期待嘅活動一定係放學返屋企睇卡通片。如果不幸錯過咗一集，真係會覺得一世都冇機會睇番，心情絕對比默書唔及格更難受，唯有靠同學口述劇情再喺腦內補完。或者因為咁，所以細個會特別珍惜睇卡通片嘅時光。而令我最難忘嘅片集，應該係《四驅兄弟》。雖然一般卡通片都會連帶推出玩具，例如係模型同變身套裝等，但只能靠幻想力去玩，唯獨模型四驅車可以俾小朋友真實地體驗。記得當時好多小朋友放學後會去公園玩四驅車，每人都拎住一個好似好專業嘅工具箱，交換零件，將溝渠當作賽道比賽。雖然唔可以好似主角咁出絕招，但已經非常滿足。原來當年只係播放咗不足一年嘅卡通片，回憶都可以咁深刻！」
唔好以為睇卡通片真係純粹娛樂，其實唔少片集傳達嘅訊息，對小朋友嘅成長有正面嘅影響。唔知對Kaho影響最深嘅，又係邊一套？「對我嚟講最有意義嘅原畫係《Slam Dunk》嘅三井壽。細個睇《Slam Dunk》會覺得熱血同搞笑，大個之後每次再睇都有一股起雞皮嘅感動，特別係三井壽對安西教練講『我想打藍球』呢幕。動畫裡面嘅人物通常係善惡分明，由三井開始流淚同配樂響起嗰刻，觀眾可以徹底被一個上一刻仲係壞人嘅角色感動，睇得明呢幕應該算係成長嘅分水嶺。」
《幽靈公主》豬神乙事主賽璐珞原畫 (非賣品)
被童年回憶包圍嘅工作環境太幸福！
Kaho成立選物店unun的原由，是希望透過搜羅令人覺得「好正」的貨品，為大家的生活注入多一點快樂元素。自網店成立四年以來，雖然不是每款選物都大賣，不過兩位主理人亦不太介意，至少留作收藏自用都一樣開心。而這次推出的賽璐珞原畫，就幸運地得到不少客人青睞，甚至令Kaho結識到志同道合的朋友，「我哋其中一位客人係平面設計師，有次約咗佢見面，發現佢工作室內放滿咗無數動畫玩具，幾乎所有我唔記得嘅動畫佢都記得。我哋仲爭論點樣分辨《元氣爆發》、《絕對無敵》同《熱血最強》，被童年回憶包圍嘅工作環境實在太幸福！仲有一位客人本來已經係收藏家，佢有好多珍貴原畫，仲向我展示咗兩張《幽靈公主》原畫，一張係向右嘅麒麟神，另一張是向左嘅豬神乙事主，因為宮崎駿嘅原畫真係有錢都未必買到，我講笑話佢應該已經無憾了。一個月後竟然俾我好好彩地見到乙事主同一幕嘅另一幀原畫，我就二話不說買咗，我哋應該之後會相約合照一番，哈哈！」
Kaho特別推介最新入手的原畫作品，是來自《櫻桃小丸子》作者櫻桃子的另一套較少人認識的動畫作品《COJI-COJI》，故事猶如非現實世界版的小丸子，就連角色的造型都有幾分相似。不過動畫似乎從未於香港播出過，有興趣的朋友可以到Youtube看看。
《COJI-COJI》賽璐珞原畫 $1,980 (Left)
《COJI-COJI》賽璐珞原畫 $980 (Right)
對於真心喜愛的事物，各位店主真的可以滔滔不絕說個不停。在此借Kaho一句，「被童年回憶包圍嘅工作環境實在太幸福！」亦僅此多謝以上一眾受訪的幸福店主，在這個崩壞的時代，以各自的方式為同路人送上一點點物質與心靈上的安慰，繼續於生活上不同層面散播快樂，祝好人一生平安。
unun_ https://www.ununliving.com/
延伸閱讀︰買得到的童年：店主精選不可再錯過的寶物！（上）讓玩具有個安樂窩