資深傳媒人呂秉權早前接受訪問時談及新聞自由，到底新聞自由是什麼？呂︰「新聞自由係容許記者、公民記者、Freelance記者去採訪，甚至拍紀錄片嘅人採訪，一個普通市民去採訪之後發稿，都可以有咁樣嘅自由。」香港是文明社會之基石，就是新聞自由。
咁點解今時今日記者身份會引起爭議，甚至有「黑記」之稱，記者也有黑白之分？到底站在前線的記者，看到的是黑還是白？女記者在猶如戰場的社會運動現場，應該帶什麼裝備採訪？好𢯊找來三位不同年齡及背景的前線女記者，分享這動盪的數月經歷了什麼大事小事趣事難忘事，以及陪著她們闖進「戰場」的裝備。好𢯊女子不拘小節，但卻關心社會大事，香港需要前線記者，因為我們需要真相。
自由身記者Amy Ip
愈危險嘅地方愈要去，完咗做戰地記者嘅心願
數月來香港發生了很多事，有人話要珍惜香港這個家，止暴制亂，香港才能得救。其實反修例運動的觸發點，正正是因為香港人珍惜這個家。數月以來，在示威者與警察之間的前線記者，亦成為焦點之一。今回好𢯊找來自6月9日起已頻頻在前線工作的自由身記者Amy Ip接受訪問，在全民怕被起底的年代，無遮無掩，坦蕩蕩地講出數月來的所見所聞、所思所想。她的勇敢，我們不是第一次見，感恩在最壞的時代遇上好𢯊記者。
今年3x歲的Amy畢業於香港浸會大學，主修電影，畢業後曾於港台工作，負責拍攝不同的節目及劇集。五年前的一場雨傘革命，是她成為新聞工作者的轉捩點。Amy︰「五年前本來仲係電影製片，但係雨傘革命開始嗰陣我就轉咗做local producer，專為外國媒體工作，一直做到依家。除咗做producer，亦會做採訪、報道等工作。」Amy關注的題材主要聚焦於本土文化議題，如SEN學童（特殊教育需要）、藥房貓、朗豪坊對面寫大字的伯伯等等。在反修例運動期間，Amy的角色是local producer，負責為外國媒體安排來港採訪的細節，進行訪問及翻譯，當中包括澳洲的ABC（Australian Broadcasting Corporation）、卡塔爾的半島電視台（Al Jazeera）、英國的Sky News、美國的CNN等等。
外國傳媒會請保安保護記者
經過數個月時間的發酵，面對催淚彈變成了市民的日常，基於部分記者及攝影師在採訪時受傷，為了好好保護自己，記者們的裝備亦愈來愈「勁」，雙濾罐「豬咀」在示威現場已成為家常便飯，回想6月9日當天，Amy指當時只帶了N95口罩：「當日的裝扮是少少stylish的outdoor服飾，記得嗰日仲有警察同我講笑話『小姐乜你著得咁靚﹗』其實當日已經意識到6月12日會有大事發生，於是周圍去買頭盔等裝備，買咗個三百幾蚊嘅War game頭盔俾攝影師們，但佢哋個個都覺得我over咗，又話好麻煩、好重！我自己就搵返2014年雨傘運動嗰陣留低嘅頭盔嚟用，自從6月16日開始我已經係full gear上陣，一定會戴full mask及頭盔。去到七月底，因為局勢愈來愈危險，某些外媒會為拍攝團隊提供security guard（保安員），陪伴拍攝團隊到現場以保障記者安全，並判斷何時需要撒退。佢哋通常係退休軍人，手臂仲粗過我條頸。」
愈危險嘅地方愈要去，無諗過縮
當示威衝突現場成為生活日常，會否習以為常？還有最難忘的時刻嗎？Amy：「728真係有做戰地記者嘅感覺，當日同隊cam man（攝影師）被催淚彈擊中袴下，因為溫度非常高，佢即刻跑去較安全嘅地方將大量水倒入褲降溫。警方當時又再次推進及發射催淚彈，嗰次係第一次有警方特登向記者射催淚彈嘅感覺，同時覺得自己完咗做戰地記者嘅心願。」當採訪現場變成戰場，可曾有退縮的念頭？Amy斬釘截鐵地說沒有︰「愈危險嘅地方愈要去！」明知道危險，家人有沒有擔心？Amy：「我train咗阿媽十幾年，因為自己讀書時期已經常參加社運，十年前反高鐵時就試過被抬走，所以阿媽已經習慣，知道控制唔到呢個女。」
Amy前線裝備檢閱
由催淚彈到布袋彈、橡膠子彈以及汽油彈、水炮車……前線記者遊走於警方與示威者之間，在槍林彈雨中穿梭，除了頭盔、眼罩、口罩、面罩、反光衣、相機、電池這些基本裝備外，到底女記者們還會帶備甚麼到現場？話晒都係女仔，戴上gear之後會否不忙扮靚呢？
採訪當日，我們要求Amy以平日在前線工作的衣著打扮現身。「平日到前線工作就係好似今日咁，T恤、冰袖，長褲及行山鞋，而且一定會帶備毛巾仔、替換衫、通風雨褸等以備不時之需。不過最重要係唔好著黑色，各大媒體對於衣著顏色都有指示，一定唔會著黑色，因為黑色係一個political statement。」Amy說。
Mooncup真係好重要
「唔帶多餘嘢」及「環保」是Amy準備裝備的準則，所以沒有為了扮靚而帶的化妝護膚品，隨之而來的是不同功效的藥物，生理鹽水與哮喘藥自然少不了，「之前有好心人送咗好多Pepper spray relieve gel（胡椒噴霧紓緩啫喱）俾記協，所以我都拎咗啲走，仲有做自然療法嘅朋友送嘅精油，可以用嚟紓緩肚痾。」說到必備之物，Amy突然興奮地說道：「好重要，我一定要講呢件事！」她從袋中取出了一個細小的索袋，入面放的是mooncup （月亮杯）。Amy強調mooncup真係好重要︰「我五年前開始用mooncup，當時因為環保所以用，之後發現好舒服，用完返唔到轉頭，我接受唔到有M巾嘅日子。如果香港發生咩事要走難嘅話，除咗銀包同電話，我一定會拎mooncup走！」細看Amy的裝備，會發現她是位環保人士，除了以mooncup代替衛生巾，她亦會盡量避免使用即棄用品，所以必會隨身帶備可摺疊式水樽、咖啡杯、食物袋等等。
吸得催淚煙多皮膚好咗？
經過多月的反修例運動，有人會戲言「無食過催淚煙唔好話自己係香港人」，根據很多不同報告指出，吸入或接觸催淚煙會危害身體健康，網上甚至有傳聞說警方使用過期或中國製的催淚彈，令很多人開始擔心身體健康，女士們更憂慮皮膚因而變差。問到Amy頻頻到前線採訪，這幾個月的身體狀況時，她竟表示：「吸得多皮膚反而好咗！本身我有濕疹，本來都會擔心催淚煙嘅影響，但係最近睇中醫話我皮膚好咗，可能因為痾得多。」明顯聽得出Amy只是在苦中作樂，因她隨即補充︰「其實我哋好多行家都懷疑因吸入過多催淚煙而長期肚瀉、咽喉痛，甚至經期紊亂或變黑。」筆者亦曾不幸地吸過催淚煙，人生第一次有快要窒息的感覺，諗起都傷感。
除了容得下較大型裝備如頭盔、面罩的背包，還需帶備貼身的小型body bag，方便將緊急隨身物品如銀包、電話、記者證等放在容易拿到的地方。Amy頭上的head band其實亦是neck warmer，除了可保溫及保護頸部，同時亦可覆蓋耳鼻作掩護。
雖已穿上冰袖，但偶爾仍逃避不了瘀傷。（左）Amy「上gear」的動作純熟，因近日主力拍攝記錄片，因此一部專業的相機亦是必備之物。（右）
因每天背頭盔出街很bulky ，所以Amy於9 月初從德國訂了這個較輕便的摺疊式頭盔回來。
黑記白記，真記者vs假記者
黑與白，是顏色，亦有人說是良知。Amy則認為黑白是真與假︰「我讀傳理系，傳理學院的院訓是『唯真為善』，這句說話經常在我心中重複，只有真相是良知，所以要報道真的事，有時在網上睇到假新聞或者係content farm都會覺得好嬲。」
好多人話記者不應該是新聞的主角，但在這數個月間，記者亦成為了大眾討論的對象。有人感謝記者走到最前報道真相，同時亦有人批評記者主觀偏頗，甚至質疑記者的身份，這些問題在數月間迅速發酵，不少前線記者更曾被稱為「黑記」又或者是「假記者」，Amy亦然。「試過帶住隊外國crew去北角採訪俾人話收咗錢，想打我哋同埋阻住鏡頭。有記者喺度就代表有事發生，自然無人welcome你，在運動發生之前，記者一向係不討喜嘅角色，俾人鬧係家常便飯。不過人哋愈唔想你睇到，先愈要採訪。」
新聞係是非黑白之源？Amy認為新聞是歷史書的初稿。「記者只能盡力記錄，一定唔可以包晒全部。有人問我有無見過人搶犯，我無見過就係無見過，你見過同我無見過無衝突，因為我嘅鏡頭只有一個angle。」在這個後真相時代，大家都非常渴求真相，但是否有圖就有真相呢？「所謂『有圖有真相』是一大謊言，比如說之前連各大媒體都有報道的『警察扔汽油彈』圖片，後已經被查證只是角度問題。真相是需要在不斷的自省及查證中提煉而成。黑白是真假沒錯，但很多事情的道德判斷不可能非黑即白，殺一個小朋友是不是一定萬惡呢？要是殺他是為了避免他受苦又會不會是善的一種？ 這混亂的世道下大家都很想有一個『專業人士』指導世人，但我們不是聖人，有時我都不知道這世上是否真的有『真相』, 只能盡所能拍下事實（fact）。」除了感動，我無嘢補充。
喺是非黑白不分嘅世代，要多看多思考多自省多理解
在假新聞充斥的世代，無論政見如何，沒有人可以肯定誰是真記者？什麼是真相？Amy︰「其實每個人都可以做記者，只要能夠客觀地探討呢件事、又或者帶出一啲面貌，就已經可以係記者。記者唔係一個需要考牌嘅職業，如果要就變大陸㗎喇﹗雖然試過有emotional嘅時刻，有時會好想喊，好似612放催淚彈，心諗點解會咁樣？不過做嘢還做嘢，即使心情有起伏都唔會影響我嘅工作，做live一定要冷靜咁同newsroom講發生咩事。記者就是記錄者，但記錄事實以外尋求真相需要嘅係耐性和對一切嘅懷疑。有沒有假記者或黑記？我估一定有，可能會有啲為求達至目的而扭曲事實嘅記者。所以喺是非黑白不分嘅世代，我哋要好好鍛練自己嘅思辯力，多看多思考多自省多理解，才可能撥開迷霧找出真相，邁向全民公民記者的時代。」
如果返唔到香港，我應該會喊！
反修列運動至今，對每一個香港人嚟講，無論係特首、警隊、示威者、市民、甚至是記者，都是一個大挑戰，因為不論是持續時間、規模及示威形式，都是前所未見的。「呢件事對前線記者而言係一個好大嘅challenge，因為大家都無經歷過。以前做新聞會有schedule，因為去得現場多，我哋心中會有個timetable，例如會知道12點開始清場。但依家無，因為依家不反對通知書未完就清場，有時外國啲crew會問等陣點，但其實我都唔知，而且係無人知，太多未知之數，工作上好大壓力，有時每晚都會發惡夢，個腦休息唔到，有啲朋友甚至有情緒病。」Amy說。
事到如今，你對整個運動有什麼看法？Amy︰「呢個運動令我諗咗好多嘢，其實我對呢件事係樂觀嘅，因為無論最後係咩結局，有involve喺入面嘅人對自身同埋社會都有更多想像，從而達至一個好結局。作為一個記者，如果有機會我最想訪問林鄭，想知道佢呢幾個月嘅心路歷程到底係點樣。有時喺記招望住林鄭個樣，都會諗到底佢內心諗緊咩？喺佢個位置上有咩難處？而佢又做過啲咩？希望佢唔好死於非命，以後有時間可以寫返個回憶錄，講返呢段時間發生過咩事。」傳聞參與過呢場運動就好難返上大陸，你驚唔驚？「以前有機會要返大陸做嘢，依家應該唔會俾我入境。我反而係驚返咗上去有一日返唔到香港，我應該會喊！無人想做難民，即使我有好多錢，我都只想返嚟呢個地方，呢度係我屋企嚟㗎嘛！」其實點止Amy，你我他都很珍惜香港這個家。
延伸閱讀︰
【 黑白】
【站在黑白之間 – 前線女記者 (二) 新聞記者E ︰「是非黑白，視乎人內心把尺及標準。」】
【站在黑白之間－ 前線女記者(三) 學生記者Sharon ︰「我想俾人知道事實，希望影到嘅嘢可以開啟發到人。」】