「唔知呀，我覺得開心咪得囉﹗」
與STOREROOMS店主Eden傾談時，這是他最常掛在口邊的一句。唔知唔知，突然又開新店。這間看似無心插柳經營下來的小店，經過六年來不斷演變，由旺角西洋菜街起家的1.0，到同時經營上環太平山街的2.0店，然後回歸旺角增設café 進化到3.0，支持者有增無減，更成為城中被公認有品味亦具態度的選物店。
今年，Eden決定離開旺角，繼續帶著「We sell beautiful things 」的宗旨，將STOREROOMS 4號店帶到下一站——深水埗，進駐「大南街結界」，與特色小店如MIDWAY、foreforehead、openground以及即將進駐的White Noise Record 等成為鄰居，為這個舊區多添一份新鮮感。雖然奉政府諭，無特別事最好留在家中。然而在家千日好都總有想出去逛逛的時侯，假如真係頂唔順，不妨花一個下午逛逛深水埗的新鮮小店及附近的傳統老店，即使戴住口罩呼吸仍不暢順，睇吓靚嘢人都精神啲！
從「本地」再出發
STOREROOMS可算是最具代表性的本地獨立小店之一，但以往店主Eden對「本地」二字其實有點抗拒，直至經歷這大半年來的社會運動之後，才意識到「本地」的重要性。「喺旺角開舖嗰陣，心態上係有啲想匿埋賣外國嘅產品，但經歷咗上年之後，我就想做多啲連結香港嘅企劃。以前STOREROOMS都一直有造自己嘅衣飾系列，嗰陣嘅布全部都喺深水埗啲布行度搵，所以我同好多店主都好熟了。宜家直情搬咗過嚟，就想同附近啲布行合作，可能我會有兩款訂製嘅裙掛喺店，再加埋唔同布行嘅布卡，令我地變成一間布行pop-up store咁。客人可以喺度揀佢鍾意嘅布，甚至係搵埋布俾我，由我哋去幫佢造呢款裙。又或者我會再搵啲香港嘅裁縫幫手，希望咁樣發展落去，會令大家在意多啲本地店舖，甚至留意多啲自己嘅社區。」要重新發掘本地佳作，Eden並唔係得個講，他最近便找來本地創作人Zooey So替新店繪製插畫，亦引入了由香港女生Suzann創立品牌su uszy的耳環，未來將會有更多本地貨品將會陸續上架，大家拭目以待！
創作人Zooey So替STOREROOMS新店繪製插畫並製作成短片，28秒睇晒由零開始到完成的歷程，STOREROOMS的吉祥物Lala亦有出現。
座落於深水埗大南街的STOREROOMS新店（左），店主Eden。（右）
浪漫在細節
新舖位處於大南街與黃竹街交界，黑白配色的巨型招牌非常搶眼，絕對係隔幾條街都會一眼認出。眼利的客人亦可能會發現，招牌上的logo與以往不同，Eden說：「舊logo其實係我好求其咁整出嚟㗎咋，定咗就冇轉過。但新店logo就簡單啲，純粹保留咗鎖匙窿呢個元素，因為佢有好奇心、探索嘅意思。新招牌嘅粗字體係取材自MoMA等博物館，只係好直接，無花巧地寫『STOREROOMS』出嚟，無需太多修飾。」至於新店的裝潢，似乎又比以往歷代STOREROOMS更簡約隨意，正好符合了Eden的選物態度。「初代旺角舖係全白色嘅，到上環舖就係黑色加黃銅，第三間cafe就變咗水泥風格。其實三間都係有一個特定嘅reference，上網好容易搵得到。去到呢間嘅時候，我就諗其實根據咁多年嘅經驗，我地賣嘅嘢真係太立雜，而且來自唔同國家，好難用一個特定嘅風格歸納，所以最後就不如簡單啲，好似宜家咁樣。雖然有啲客人見到都會覺得點解變咗咁多，但我就覺得冇乜所謂，開心就得。」
新店裝潢樸實無華，但認真睇就會發現好多充滿心思的細節，就如店外轉角位一面「Beautiful People」鏡子，早已成為人人行過都忍唔住要「打卡」的熱點；而店內的一扇小木窗，則是Eden看完劇集《The End of the Fxxking World》後，參考劇中場景而請師傳特別製作而成。此外，店中的超大落地玻璃亦是新店的重點，最近為配合新年氣氛，玻璃上畫上了巨型招財貓，又一熱門「打卡」位。「之前我去咗東京旅行，喺豪德寺見到好多招福貓，覺得好開心，就諗到如果店裡面有啲物品係可以帶到希望俾人都幾唔錯，但因為豪德寺嘅貓係神聖嘅物品，用嚟做商品就唔太適合，所以我用廣田硝子嘅招財貓玻璃錢罌起咗個同豪德寺近似嘅貓陣出嚟，大概有一百隻左右。」可惜這批錢罌在開店的頭三日已經售罄，訪問當日店內只剩下『小貓』三、四隻（非賣品），筆者也無緣看到壯觀的「貓陣」。
除咗小木窗與鏡子外，店外的一棵檸檬樹亦是Eden「唔知點解，但覺得幾開心」而添置的新成員，更希望以後可以用熟透檸檬整檸檬糖請大家食。
來自豪德寺的招福貓為非賣品，買唔到都可以祈吓福。（左）
雖然廣田硝子的招財貓玻璃錢罌暫時售罄，現已接受預購。＄1,280 （大），$850（小）（右）
放在窗邊，被陽光曬得閃閃發亮的玉石蘋果 $280/個 。（左）
剛在新店上架的還有來自葡萄牙小鎮的手工香皂。$90/塊（右）
揀舖靠直覺
首間STOREROOMS是位於旺角的樓上店，雖然位置方便，但畢竟是人多擠迫且嘈雜混亂的遊客區，加上要行好幾層樓梯，每次上去都真係要下好大決心（至少筆者係咁諗 :p）。漸漸地，店主Eden亦覺得該區開始失去原本的生命力，他說：「以前啲跳舞大媽係好嘈，但有佢哋感覺上條街係熱鬧啲，至少得啖笑呀嘛﹗佢哋走咗之後，就會發現成條街都只係得藥房同連鎖店，成件事唔同晒。」當萌生搬舖的念頭之後，Eden的首選地點是自己向來愛逛的深水埗，在機緣巧合之下，他在Instagram上認識了一位當地產經紀的客人，極速促成了這次搬遷。「嗰位經紀朋友話帶我過嚟睇吓，第一間睇嘅就係呢度，之後就覺得唔使再睇其他了。」如此一見鍾情，只因這舖位完全符合Eden心目中的新店必備條件：地舖、落地玻璃與充足陽光，加上小社區獨有的人情味，令他更確定搬舖的決定是正確的。「睇舖當日我哋一開道閘，旁邊啲店主、街坊都走晒過嚟，話呢道閘十幾年都冇開過，空置咗好耐喇！又會有啲南亞朋友過嚟八掛下，係咁同我吹水。加上我本身同周邊小店店主都認識而且幾熟，可以互相關照吓，得閒去大家嘅舖頭傾吓偈都幾開心。」
廣田硝子的玻璃杯碟放置在玻璃櫃裡，每當陽光灑落，玻璃器物也頓時顯得更加晶瑩剔透，呢啲咪係地舖嘅優勢囉﹗廣田硝子玻璃器物 $150-$220/件
由習慣多年的樓上舖一下子搬到地舖，對Eden來說，當中最大的差別是甚麼？「唔使行樓梯！最初兩年大家都好願意行上去，可能當時大家仲後生，但過幾年之後大家都已經喘晒氣。我以前都會自己搬貨，但後尾都係頂唔順要搵搬運哥哥幫手。」不過對於一班熟客來說，在西洋菜街穿過龍鬚糖婆婆的舖位，再行樓梯上STOREROOMS，都算是一種集體回憶吧？「以前樓上舖仲有一個缺點，就係客人有一種行咗入人哋studio或者屋企嘅感覺，而我亦都感覺好似有人入咗我屋企咁。但轉咗地舖之後，大家嘅關係似乎輕鬆咗，客人可以好casual咁入嚟行吓，吹吓水。再者，鴨寮街嗰邊係好local嘅街坊生活及工作嘅地方，但呢邊就靜啲，好似係後生呢一代嘅世界，我幾鍾意呢個新舊交融嘅感覺。」
STOREROOMS_深水埗大南街172-174號地下 2426 6789
http://www.storerooms.hk/