早排筆者經常同朋友討論一個問題：如果香港有真人show《Terrace House》（雙層公寓），你會唔會參加？得到的答案通常係非常肯定的「會！」試幻想一下當你離家獨立，擁有一班品味良好、甚至志趣相投的室友，在充滿設計感的家居之中共同努力實現夢想，甚至發展出一段甜蜜又浪漫的戀情……
回到現實，在香港合租的現況通常是，要將放滿雜物的斗室執拾得整整齊齊已經難，搵到合拍的室友仲難，而且仲要搵到地段、尺寸與租金都符合預算的單位就難上加難，相信大部分有合租經驗的人都好有共鳴。
不過，這次好𢯊就找來的另一對合租女子GG與Zoe就比較幸運，因為二人本身由好友變成室友，實現共居生活的過程固然輕鬆得多。再加上機緣巧合之下，俾佢哋搵到所有條件都合心意的單位，更是新裝修兼大致上有齊傢俬，基本上已經解決大部分煩惱。究竟擁有個人空間後的生活可以有幾hea、有幾free？就俾佢哋自己講吓。
Zoe（左）與GG（右）。
「同家人相嗌唔好口，遲早都係要搬走﹗」
事實上，唔止朋友或情侶，即使係父母同兄弟姊妹都一樣會有相見好同住難的情況。已經大學畢業好幾年，現職廣告客戶經理的GG坦言與家人的關係一直不算親近，以往放工後通常會約朋友晚飯，等到深夜父母都入睡後才回家，盡量減少見面，以免因為任何小事引起爭執。GG說：「我屋企有父母同埋兩個妹，一共五個人，但得兩間房，居住環境好迫。以前我同二妹share一間房，我哋嘅作息時間好唔同，佢早返工要早瞓，我就慣夜瞓，所以就連夜晚開唔開燈都會鬧交。同埋佢好怕熱，我好怕凍，我唔鍾意開冷氣，佢又成日要開冷氣，呢個習慣都令我哋經常會鬧交。所以佢好期待我快啲搬出去，等佢可以住得輕鬆啲。」正因為一直想搬離屋企，又已經工作幾年有點積蓄，去年GG就開始積極到處睇樓，非常幸運地，好快已經得到朋友介紹，租下一個離原本住家不遠、位於油麻地的單位，重點是租金非常合理（不方便公開），於是她便搵埋自中學時期已經認識的好友，任職銀行項目經理的Zoe一齊合租此單位。
問到Zoe離家自住的原因，她說：「以前喺香港讀大學嘅時候有住hall，喺澳洲讀master亦習慣咗自己住。後來返香港之後同番屋企人住，反而大家都唔習慣。」所以當GG問Zoe有沒有興趣一起夾租，她沒有多作考慮就一口應承，「以前屋企住粉嶺，但我平日要喺中環或者奧運站返工，搬咗過嚟呢邊就近好多。宜家每個星期會返屋企一次食飯，反而同屋企人嘅關係仲好咗。」保持適當距離，重捨良好家庭關係，相信亦係好多人想自己搬出嚟住的原因。
我懶，但我冇阻到人就ok
以往與家人同住，GG經常會投訴屋企太多人，人人有不同的活動時間，令她經常冇覺好瞓。搬屋之後情況又如何？「平時我同Zoe嘅工作時間都好唔同，佢通常返好固定嘅office hour，我就成日要OT到好夜先放工，不過宜家唔使再同細妹share房，就算幾夜返都唔怕嘈到佢。而放假嘅時候，我同Zoe啲作息時間又好一致，如果唔使出去，通常大家都係中午一兩點先起身，之後就會叫外賣或者煮吓嘢食，之後又返房休息，去到凌晨三、四點先瞓。」尤其在抗疫時期，減少戶外活動是必要的，但原來呢兩位女子懶起上嚟唔止可以唔出街，簡直連床都唔想落。據GG所講，週末的時候如果二人都不用外出，她們的生活大概是這樣的：「有時我哋瞓醒，又唔想落床開門同對方講嘢，就會用whatsapp溝通，問吓對方晏晝想食咩。如果唔覆即係未起身，醒咗就傾吓叫咩外賣，再用app落單，直到外賣送到門口先起身拎。」呢種慵懶式生活，簡直完美演繹咩叫「可以hea的話不會郁～」
懶還懶，GG同Zoe自言對於家務事非常自律，搬屋前更曾經先旨聲明，二人要每星期輪流全屋大清潔，一次過掃地、拖地與洗廁所。入住至今將4個月，她們依然未做漏過一次，似乎是頗為可靠的室友。Zoe說：「以前我提議過common area就盡量保持整潔，自己間房就幾亂都冇所謂。」GG補充：「通常我哋兩三日就會掃一次個廳，但就未必拖地。同埋食完嘢會即刻抹枱面，垃圾入面有食物都會即刻掉咗佢，沖完涼要自己執走去水位啲頭髮，呢啲就基本啦﹗」現場所見，唔知係咪入住時間尚短，共用空間的確非常整潔，尤其是客廳，除了家品以外，沒有任何屬於二人的私人物品。而各自的房間亦算整潔，不過Zoe就老實地說：「因為你哋嚟影相先執，我搬入嚟咁耐，間房都係第一次執到好似今日咁整齊，哈哈﹗」其實亂又有乜所謂？方便自己又住得舒適先係最重要嘛！
開放式廚房內擺放的食物不多，不過咖啡、茶葉、廚具和餐具就隨處可見，二人表示大多是購自日本，而且自從開始共居，不受媽媽規管先放心拎出嚟用。
與好友共居，雖然大致上都會了解對方的喜好，但始終未試過一同生活，於大小習慣上都總要互相配合一下。Zoe說：「喺澳洲住嘅時候，因為天氣好乾燥，所以洗手盤側邊啲水好快就乾，我都唔使點理；返咗嚟香港喺屋企，即使我冇抹，媽咪都會即刻幫我抹番。所以搬咗過嚟之後，有時整濕咗地方都唔覺，要GG幫我抹番。」而GG亦說：「我都有試過食完嘢之後，就咁放咗啲碗喺度，打算盡量嗰日洗咗佢就得啦（尷尬笑），最後Zoe都頂唔順幫我洗咗﹗」即使有時要幫對方執手尾，不過二人異口同聲地表示問題不大，Zoe說：「我覺得呢啲純粹係習慣問題，所以大家會好坦白拎出嚟傾，之後自己做番好就冇問題。」
最愛家品終於有機會show出嚟﹗
共居生活最忌自私，尤其是平日工作忙碌的Zoe和GG，對於經常要替對方採購日常用品已經習以為常。Zoe說：「平時啲日用品如廁紙、廚房用具、清潔用品同食物，我哋都係share。原本有諗過一個plan係每個月夾一個公數pool，用嗰筆錢嚟輪流去買，但後尾發覺都係go with the flow好啲，邊個得閒就邊個買，之後再夾番錢，或者payme番對方會方便啲。」筆者亦發現二人家中有個「防疫角落」，齊集口罩、消毒紙巾與酒精搓手液等物資，唔知又係邊個負責撲返嚟？Zoe說：「之前防疫物資比較短缺，大家有各自上網訂，又有一齊落街搶紙巾、排口罩，我哋盡量一次過買定防疫用品同埋啲叮叮食物以備不時之需。」
對於家居的佈置方面，GG坦言因為沒有太多發揮空間而感到可惜。她說：「本身expect可以買多啲自己鍾意嘅傢俬，因為我好鍾意買傢俬，但後尾發現原來呢度本身已經有齊。」慳番一筆錢，其實都可以花在其他小型家品擺設之上，例如尺寸剛好可以擺放在大門口與電梯旁的鞋架，就是她們精挑細選下的得意之作，每次提起時，二人都會因為覓得優質選物而沾沾自喜。既然她們對於共用物品都有咁高要求，各自的房間應該會有更多寶物？於是筆者就毫不客氣地參觀了一下二人的房間。
自言喜愛買「垃圾」的GG，房間裡的個人物品的確較為豐富。除了女生必備的化妝品與護膚品，亦有大量她從小喜愛的百變小櫻玩具、擺設與相機等等。GG說：「我最鍾意都係呢兩個沙漏，黑色嘅喺英國茶葉舖Whittard of Chelsea買嘅，透明嘅就喺日本豐島美術館買嘅。以前喺屋企冇位擺出嚟，宜家終於可以將鍾意嘅嘢周圍放。」
而Zoe的房間明顯是屬於實用型，除了一隻巨型公仔、化妝品、護膚品、手提電腦與工具書以外，已經沒有多餘的擺設。Zoe說：「本身屋企都多公仔嘅，不過嗰邊間房都仲有位，所以我就冇拎太多personal嘢過嚟。」當問到她最愛房間內哪樣物品時，她說：「我最鍾意呢張枱，因為本身間房係冇枱嘅，而且張雙人床又太，所以冇位放一張固定嘅枱，咁呢張摺枱就剛剛好。最近work from home有meeting嘅時候，就會開呢張枱出嚟用。」由此可見，Zoe的確是務實派的代表，與GG較花巧的房間完全截然不同。
Girls Talk ＆ Me Time 同樣重要
如果要用一個字來形容這幾個月的共居生活，那會是甚麼？Zoe說：「Honeymoon。」係咪真係咁完美先？「本身expect會有多啲拗撬，因為以前冇試過同佢住，而且我哋打扮、性格、喜好都唔同。但住落又發覺完全唔使磨合期，一開始就覺得好夾，可能因為大家都識咗超過十年，而且兩個人都好mindful，好獨立嘅，唔使成日keep住講野，每日返嚟就算各自返自己房都ok，所以好多私人空間，我都幾respect呢樣嘢，好似老夫老妻嘅生活。」GG補充：「雖然我哋都幾常會傾偈，但通常都係喺廳傾，或者企喺大家房門口傾，好少會入對方房。唯一係要掃地、拖地嘅時候先會入去，搞掂晒就會whatsapp同對方講聲。」 就咁聽落，兩位女生似乎非常享受雙方既友好，又有些微距離感的關係，這種舒服的相處模式，可能來自大家搬入新居前，一早約法三章訂立好共居規條。GG說：「我哋之前有張list，除咗寫明清潔時間表，或者帶朋友上嚟要預早通知對方外，有一條rule我覺得幾好，就係『never discuss things when we in anger』，雖然暫時大家都冇發過大家脾氣，但有呢條規例就好似提點住我哋，有任何事都要拎出嚟講拎出嚟傾，好過收埋自己唔開心。」
唔好以為兩位女生相處落好似客客氣氣，相敬如賓咁，關係一定唔算親密，其實二人除了滿足於離開屋企後擁有的私人空間外，亦非常享受生活中有對方的陪伴，GG說：「有時如果我想去電影中心睇戲，而佢又得閒，佢就會陪我一齊去。同埋我哋屋企長期都有好多酒，唔止有朋友上嚟會飲，就算係得我同Zoe兩個人，食飯嗰陣都會飲兩杯。」在芸芸美酒之中，二人特別喜愛一款來自日本的果酒。訪問完畢後，GG與Zoe更立即化身地頭蟲，話要帶採訪團隊走入果欄揀至抵飲靚酒，沿途一邊介紹她們最愛幫襯的「黃店」，討論下次要試試哪家新店，突然又停下來摸摸街角洗衣店的兩雙貓，再走進超級市場購買早前缺貨多時的廚房紙等等。大概對她們來說，共居生活的日常就是這樣簡單而美好。
延伸閱讀︰女仔之家（上）一拍即合室友，共居零壓力