煙霧的啟示︰來自大自然的療癒能力

曾聽心理學家說，家居就如一面映照自身的鏡子，當主人經常帶著一身負能量回家，整個空間也自然會變得了無生氣，再不是一個適合放鬆休息的場所。因此，如果你最近都被焦慮、不安、憤怒與悲傷的情緒困擾，或許也是時候為心靈和生活空間來一次大清洗了。
根據美洲原住民文化，不同植物都有著各自的智慧，可以在衣、食、住、行各方面為人類解決問題。而白鼠尾草（White Sage）與聖木（Palo Santo），就是其中兩種經常被用作煙燻（Smudging）的工具，藉著燃燒時釋出的白煙來淨化個人、物品與空間，達致驅散負能量、鬆弛神經與保持氣氛平和的功效。聽落非常玄妙，但假如你相信大自然有強大的療癒能力，閒時亦喜歡走進山林間呼吸新鮮空氣以排解壓力，你就知道透過植物帶來淨化效能並非毫無根據。特別一提，本文絕對唔係要導人迷信，只係提供多一個方法，當大家時常宅在家，不如讓自己安靜下來，整頓個人與空間的氣場，好好充電再迎接更多挑戰。

入門必讀﹗煙燻淨化法之常見問題

咩係煙燻？
無論在東方或西方文化之中，煙燻儀式都有上千年歷史，就如中國古人會燒艾草辟邪，美洲原住民則相信以白鼠尾草與聖木來進行煙燻，有淨化及保護空間能量的作用，尤其在薩滿（即擁有預言、解夢、占星、醫術、巫術或治癒能力的人）主持特別慶典、祭祀儀式時就更常用。

點解會選用白鼠尾草及聖木？
鼠尾草的拉丁文名稱為「Salvia」，有療癒、拯救的意思。如果按品種劃分，更有多達數百種，不過並唔係每種鼠尾草都有正向功效，亦有部分帶有強烈毒性。美洲印第安人認為白鼠尾草的力量至為強大，泡茶飲用可以有藥用功效，有助紓緩喉嚨痛、感冒、發燒等病症，用作煙燻亦可帶來強勁淨化，甚至殺菌效果。
通常產於南美洲厄瓜多爾及秘魯的聖木，被當地人視為非常有靈性的樹木，因為其生長期是有限的，大概由40至90年不等。當樹木自然死亡後，會再發酵4至10年，讓天然油脂滲透木質。正因為聖木的生成過程非常漫長，當中亦吸收了來自天地的養分，因此古代的巫師認為聖木有神聖的淨化磁場、清除負能量作用，古時原住民甚至會以木材來浸酒飲用。

煙的顏色與形態代表什麼？
傳統觀念看來，白鼠尾草與聖木都是有智慧的植物，會根據環境的能量來控制煙霧的顏色和濃度。一般來說，空間的氣場愈潔淨，煙霧就愈潔白幼細。相反，如果煙霧越濃，又呈暗灰甚至黑色，除了代表該位置衛生情況欠佳，亦可能是積存了大量負能量，必須要徹底煙燻一段時間。

幾耐煙燻一次最好？
完全憑個人感覺，如果覺得覺得個人周身唔聚財，或者家居有死氣沉沉的感覺，就要燻一燻。其他情況例如是新居入伙，或是外遊入住酒店或民宿時都可以燻一下，不過燃燒時記得注意安全啊！

將鼠尾草或聖木製作成線香或塔香使用，有同樣的淨化功效嗎？
既然是煙燻淨化法，煙霧的強度某程度上決定了淨化的效果。一般線香或塔香的煙霧較弱，因此可以當作是煙燻過後，幫助穩定空間氣場的小道具吧！

了解過基本知識之後，究竟煙燻淨化法嘅步驟要點做？又係咪人人都可以感受到來自植物的神奇力量？以下就由本地心靈治療師Boey，以及家品店Lab Collector Hong Kong主理人阿正，各自分享他們的煙燻經驗，睇完大家再慢慢試都未遲。

Boey@Dream Walker Heal ing Studio

「煙燻可以幫我趕走生活入面嘅煤炭屎鬼。」

近大半年來，每日睇新聞，望住令人氣餒的消息接踵而來，相信心情都唔會太好。眼見Boey在言談間依然保持積極正面的態度，除了是天生性格使然，亦因為她懂得怎樣處理負能量。「你有冇睇過《龍貓》？裡面咪有煤炭屎鬼嘅，其實負面能量就好似一粒粒煤炭屎鬼，係唔會自己消失嘅。你記唔記得有一個片段係喺士多房入面，有一堆煤炭屎鬼爆出嚟？其實呢個就有啲似我哋空間入面積聚嘅負能量，當一段時間冇清理，而我哋又不停放負，就會愈積愈多，所以需要用煙燻嘅方法去清走。」

在短短的訪談之中，Boey經常掛在口邊的一句說話是「睇feel啦﹗」。的確，就算其他人教你幾多淨化身心的方法都好，都要你肯以不帶偏見、開放的心態去嘗試，先有可能感受到當中的效果。而Boey最初亦是帶著不妨一試的心情，先從白鼠尾草開始接觸各種淨化工具。「2014年我啱啱開studio嘅時候，有個朋友送咗紮鼠尾草俾我做開張禮物。雖然以前我都有燒過，但一直唔知應該點樣燒先啱。直到朋友嗰陣教我用，個感覺同以前好唔同，我幾鍾意個味道，尤其是我幫人做完治療之後，個空間會沉重啲，所以會煙燻一吓，好似一個清洗儀式咁。燻嘅時候好大煙，感覺好唔舒服。但燻完之後隔一陣打開窗，就會覺得好清新。」

雖然暫時聽落鼠尾草似乎係好處居多，但過量使用亦可能會有反效果。「從嗰時開始，我日日都喺studio燒鼠尾草，燒得多感覺到喉嚨痛，應該係燥得滯。後來有個朋友就講俾我知，燒嘅時候要用含有『土、水、火、風』四元素嘅工具，先可以平衡能量。」根據傳統，除了顧名思義的「火」元素外，「土」則是指植物本身，「水」可以是來自海洋的貝殼，而「風」則是由來自天空雀鳥羽毛的扇子。不過凡事憑感覺的Boey，平日就習慣只以鮑魚殼盛載鼠尾草來進行煙燻，已經足夠達致平衡之效，自始沒有再出現過任何身體不適的反應。

直至現時，Boey每個星期都會用鼠尾草煙燻一至兩次studio。當然家居淨化亦是不可或缺，尤其是平日較少人行近的角落，燻起來效果更加顯著。「幾個月前我喺屋企嘅露台燒鼠尾草，因為覺得嗰排成個環境嘅能量、自己嘅能量都唔好，加埋農曆七月節，覺得係時候燻下啦﹗燻完之後我如常將鼠尾草放咗喺鮑魚殼度，等佢慢慢熄，因為我相信鼠尾草有佢嘅智慧，知道呢個空間仲需要幾多煙去清理而決定幾時熄。但係過咗大概一個鐘之後，紮鼠尾草都仲係燒得好旺盛，好大煙，味道亦愈來愈濃。於是我先生就出去睇吓，點知紮鼠尾草已經燒咗三分之二，變晒灰，最後我哋要用水淋熄佢先得。嗰次我真係感受到原來喺bad energy嘅時候燒，效果真係好強勁。」
經過多年來密集式嘗試過不同淨化工具後，Boey依然覺得鼠尾草是效用最強的一種，更即席示範了平日煙燻的步驟︰

Step 1：在室內先打開窗戶讓空氣流通，然後用火機燒著鼠尾草，再撥熄火種，產生白煙。

Step 2：先從空間的大門口，或是東邊開始順時針遊走，將煙霧撥向每個角落，另一手可以拿著鮑魚殼之類的器皿，以盛載鼠尾草的碎屑。當然心中如果一直帶著善念或感恩的意識，淨化效果會更佳。

Step 3：完成煙燻後，可以讓鼠尾草留在器皿內自行熄滅，或是輕輕按壓至火種完全熄滅亦可。順帶一提，煙燻淨化法用於個人身上亦一樣可以，無論用鼠尾草式聖木都一樣，只要由頭頂由上而下讓身體與四肢都沾到煙霧，同樣有助紓緩情緒，趕走低落氣場。不過記得要在通風、安全的情況下進行啊！

Dream Walker店內亦有售賣散裝白鼠尾草，好處是較易燃點，每次只需要用5至10片就足夠。$30（左）
如果是初次嘗試煙燻淨化法的朋友，Boey建議可以先從氣味較溫和的聖木入手。$88（右）

Dream Walker_上環干諾道西18－19號
FB_https://www.facebook.com/hkdreamwalker/

阿正@Lab Collector Hong Kong

「專注地欣賞吓啲煙點飄，都會有安心嘅感覺。」

每個人身體的敏感度都不同，所以即使未必感受到淨化工具的靈性力量，也可以將鼠尾草與聖木視為家品，間中燻一燻，當作是為空間添上一陣清新的氣息。就如家品店店主阿正，自幾年前替小店搜羅貨品時接觸過鼠尾草和聖木後，便對煙燻植物產生興趣。他說：「幾年前我成日睇到啲外國網上家品店，將鼠尾草呢類型嘅植物同啲普通日用品例如body wash咁放埋一齊，於是開始搵吓有冇啲可以融入生活嘅天然用品。後來發現一個叫Juniper Ridge嘅牌子，佢有出啲organic香薰油、淋浴露同線香等等。而且white sage（白鼠尾草）都係佢哋嘅重點產品，所以就開始研究吓呢樣係咩嚟，亦令我開始進入呢個領域。」

現時小店中已售賣了鼠尾草與聖木這類淨化工具好幾年，不過阿正坦言對於植物的靈性功效感覺不大。「最初只係覺得好香，佢哋嘅氣味係好濃烈，聞慣咗之後就會覺得好獨特。另一個會賣煙燻產品嘅原因係，Juniper Ridge呢個品牌好愛護大自然，對於植物嘅原產地非常保護，所以每次用佢嘅產品都有特別天然嘅感覺。」既然阿正覺得煙燻工具最大的特點就只有氣味怡人，點解咁多年嚟一直使用？「點著植物嘅時候，可以將手頭上嘅工作停低晒，一邊聞佢啲氣味，一邊專注咁欣賞吓啲煙點飄，咁會令你個人慢落黎，所以會覺得比較舒服、安心。」

崇尚自然的阿正會以竹製便當盒盛載日常於店內自用的煙燻植物。

與阿正談及由社會運動到疫情，普遍大眾消費意慾頗低，出奇地，影響並不算嚴重。他說：「要嚟買嘢嘅客人都會繼續嚟買，尤其係本身做靈修、瑜伽嘅客人，會專登嚟搵呢個牌子嘅產品，佢哋話個品牌對植物比較好，所以能量特別強。呢排亦多咗好多本身對煙燻植物冇認識嘅客人上嚟，個樣好憂心咁，話屋企人有情緒問題，好抑鬱，想睇吓有冇方法可以幫到佢地。」當然，唔少人買嘅時候都抱住半信半疑的心態，而阿正亦從不硬銷，只會如實分享自己的用後感：「我只會話聞住個味道係會舒服啲，至於有冇其他淨化效用，就要睇你自己心態，你信佢就有㗎喇﹗」
與大部分初次接觸煙燻植物的客人一樣，阿正比較喜歡燒聖木，因為其木香比較溫和、內斂和沉實，較容易被接受。因此以聖木燻一燻全店，亦成為了他每日開工前的例行公事，而他慣常的做法是這樣的：

Step 1：先以刀仔削走聖木上已經被燒成炭及灰的部分。
Step 2：因為聖木需要比較長時間才能完全燒著，所以阿正會點一支蠟燭代替火機來慢慢點燃聖木，這樣手才不會太累。
Step 3：拿著冒起白煙的聖木順時針仔細地燻一燻店內的每個角落。

Step 4：完成煙燻後，將木條放置在耐熱的小碟上，直至煙霧完全熄滅。
果然，訪問當日筆者一踏進店內，便傳來陣陣木香，柔和的香氣絕對是令人心情平和的最佳對策。而阿正早前也特別準備了一些聖木放在店門外，供有需要的朋友免費取走，當是在大家送上一點點支持，他說：「好多人都好大壓力，或者情緒低落。我哋都冇咩可以做，除咗親身走上街頭之外，可以提供嘅就只有少少聖木，希望大家拎返屋企點吓，安定心神，放鬆心情，唔好諗咁多煩惱事，先可以繼續行落去。」