各大護膚品牌的宣傳語句經常會出現「科研實證」、「革新科技」等字眼，一般人未必了解當中的原理，但聽落好似好厲害，自然會對產品多添兩分信心。再加上明星效應造就出色的宣傳效果，令某些知名品牌的產品即使索價過千元，各位貪靚的消費者亦甘願乖乖付款。
相信好多人心裡面都有個疑問，係咪真係一分錢一分貨，愈貴愈有效？大家又知唔知自己嘅肌膚最需要係啲乜？幾位香港城市大學應用生物學系畢業生，於2016年創辦的科研護膚品品牌Factiv，確信「護膚從來沒有奇跡」（No Fairy-Tales），講到明透過科研實證研發出適合香港人，且價錢公道合理的護膚品牌。唔止堅持全部產品香港製造，更將產品成分完全公開，用家搽咗啲咩都一清二楚。
講到明世上無童話，身為創辦人之一的配方師Agnes，就曾經歷過一段飽受暗瘡困擾的「爛面歲月」，今時今日之所以皮光肉滑，都係全靠自己護膚品自己整。究竟呢段慘痛經歷點樣成為佢嘅護膚啟蒙，甚至令佢加入Factiv，決意要調配出最適合香港人用的護膚品？不如由Agnes自己講講。
從錯誤中學習，還原靚靚肌膚由「化學嘢」開始
筆者認為配方師應該是穿上白色lab coat長駐實驗室做科學研究，每天就是日夜顛倒地將不同化學成分左溝右溝，而且是很正經死板的樣子，往往不會貪靚 …… 但訪問當日所見，化上淡妝，穿著皮褸與貼身牛仔褲的Agnes，完全打破了我對配方師的固有印象。言談間Agnes透露平日她最愛行街、行山、睇戲、聽歌，而且與一般年輕女生一樣，愛嘗試不同護膚品與化妝品。原來貪靚的特質更是從小養成，「我細個成日偷媽媽啲唇膏嚟搽，又會噴佢啲香水。同埋我好鍾意照鏡，所以我老竇成日話我『照爆鏡』，呢個都係我細個嘅花名。」
自小崇尚自然美的Agnes，自言從來唔敢亂搽護膚品上面，更冇諗過有一日會經歷滿臉暗瘡的折磨。「嗰陣剛考完DSE，應該係最輕鬆嘅時候。但唔知點解生咗好多瘡，兩邊臉頰滿晒，唔係好見得人。我就嘗試用遮瑕膏遮住佢，但後來發現情況愈嚟愈差，所以就去咗睇西醫。西醫見我塊面好似油淋淋咁，第一個問題就問『你係咪冇洗面㗎？」我自問都算花心思去護膚，但佢竟然咁質疑我。後來佢教我清潔方面做好啲，又食咗啲消炎藥同抗生素，嗰排係好番好多嘅。」同好多青春期嘅年輕人一樣，密集式出暗瘡通常係受荷爾蒙同壓力影響，睇西醫亦係治標不治本嘅方法。因此Agnes後來轉睇中醫，希望皮膚可以有改善，「中醫成個過程睇咗一年半，嗰陣要敷啲中藥落塊面，令到皮膚好差。加上中藥成分會留低啲色素喺皮膚，當我敷咗一排之後，塊面已經黃咗好多。後來我再諗有咩其他方法幫到自己，加埋以前睇好多beauty youTuber嘅經驗，開始發現原來有啲叫『活性成分』嘅物質，係針對番皮膚嘅需要去解決問題。所以我就開始用啲比較chemical嘅護膚品搽上面，發現真係好work！」自此Agnes就成為一個護膚品嘅「成分控」，愈來愈喜歡仔細研究不同產品的配方，透過科學知識還原靚靚肌膚。
由最初4個人到現在7個人的Factiv team。
「我哋想做啲真正有效、可以幫到人嘅護膚品。」
對於每個大學畢業生嚟講，踏出社會第一項挑戰當然係搵工。不過Agnes就非常幸運地，有份好工自動送上門，「最初係我朋友，亦係宜家Factiv其中一位創辦人send咗個job post俾我，佢話我有啲bio同chem嘅知識會幾適合。嗰陣我本身有份兼職係做beauty blogger，諗住呢行嘅出路都唔太好，既然我有專業知識，咁不如試吓啦。而且Factiv最初兩個主要創辦人都係我師兄，所以就決定一齊去做呢個startup（初創企業）。」好在，平均年齡只有廿三、四歲的團隊一直相處融洽，對每項工作都有商有量，而且目標一致，令Agnes的壓力一掃而空，「佢哋好肯花資金喺我身上，遇到有咩問題解決唔到，反而係會陪我一齊去學，所以有佢哋嘅支持都好緊要。我哋成條team創立咗唔係好耐，但理念就好清晰，我哋有句宣傳口號係『There are no fairy tales in beauty, only science.』，我哋想做啲真正有效嘅、可以幫到人嘅護膚品。」
反覆測試，務求調配出最適合香港人的配方
既然自己咁貪靚，又有相關專業知識，唔知Agnes平日研發新品時，又會唔會有私心，專門研究自己有需要的產品先？她說：「咁又唔會，因為一開始個品牌已經定咗會由保濕、美白同緊緻三樣女性最常見嘅皮膚需要嚟研究新品。反而我研究一樣新產品嘅時候，會先睇吓呢排市面上有咩成分係好hit嘅，如果符合我哋嘅產品系列同公司形象，就會著手諗吓佢適合放落咩產品度。例如我最近就睇緊啲關於酵素嘅資料，佢比較天然，又做到去角質、煥膚嘅效果。如果最後決定可以用，就會由零開始試吓佢嘅質地同穩定性。完成晒呢啲步驟，就會俾團隊同朋友試用吓。」
講就容易，但每款護膚品原來最少要花七至八個月研究與測試先可以面世。而且Factiv的產品講明男女都啱用，要平衡不同人士對護膚品質感與功效的要求，其實都令Agnes花上不少心力。「喺我加入之前，其實Factiv都有推出過一啲由男仔配方師調配嘅產品，雖然我哋都主張唔會喺產品度加入任何氣味，只會保留天然成分嘅氣味，但有feedback返嚟話喺香港用呢批產品個質地可能麻麻。 咁我就試吓改良個配方，配合番香港偏潮濕嘅天氣，等佢可以更加適合本地人用。」時至今日，Agnes表示日常使用的護膚品已經大部分由自己有份調配的Factiv包辦，保證滿足自己肌膚需要，難怪從此告別令人尷尬的暗瘡肌，亦幫荷包慳番唔少錢。
點解啲名咁奇怪？ 增加成分的透明度
身為配方師的Agnes固然對自己品牌的出品充滿信心，加上她的家人及朋友，暗地裡亦在默默支持，令她感到非常窩心。「佢哋一開始有講笑咁講『吓？你個brand信唔信得過㗎？』但後來我睇番啲訂單，發現有啲朋友會偷偷哋幫襯我哋，我就覺得好開心。」其實Factiv向來以成分命名產品，是想提高護膚品成分的透明度。團隊亦會在網頁與社交媒體透過簡單的圖片與文章，以科學角度深入淺出地解答大眾對於護膚的迷思，也希望大家可以多了解不同活性成分對肌膚的效用。唔止一眾貪靚嘅美少女學到嘢，就連Agnes的媽媽揀護膚品時都變得更加精明。「我媽咪最初有講過點解我哋啲產品名咁奇怪，但後來佢都明白多咗。就算佢平時唔算好貪靚，都會因為我而幫手試吓啲產品，又會識揀啲有維他命A，即係有抗皺效用嘅產品去用。佢宜家知道揀護膚品唔應該盲目咁信一個明星，而係去睇吓啲成分係咪有用，咁我都覺得好滿足㗎喇﹗」
堅持香港製造，深信香港都有好嘢﹗
一直以來，Factiv都以香港品牌自居，無論產品研發、生產甚至包裝等等，所有工序都在香港進行。在每支產品的包裝上，甚至寫明「Product of Hong Kong」，似乎團隊非常想強化「香港製造」的形象。「關於呢個問題，好多廠商都有同我地講『咦？你哋嘅production喺香港做呀？點解唔去瑞士做呀？人哋見到Made in Switzerland仲正啦』，但我哋覺得no，我哋一定要喺香港做，所以我哋死都要搵香港嘅廠。而且好proud of自己造嘅formulation，亦都好proud of 香港嘅廠商做到佢嘅quality都可以好似外國咁好。我哋好堅持呢一點，就算佢成本係高啲，我哋都會堅持『Product of Hong Kong』」。冇錯，當大家每次選用高濃度有效成分護膚品時，除咗即時諗起來自加拿大嘅某某品牌之外，亦不妨試吓本土高質品牌啦，正如Agnes所說：「講真宜家要搵一個香港local科研護膚品品牌真係冇乜咁滯，我哋往後都會繼續研究多啲香港人對皮膚嘅需要，從而造更多香港人啱用嘅產品，希望以後人哋一諗起嘅香港護膚品牌子，就會諗起我哋。」
關心香港人需要 ・建立互助經濟圈
Factiv團隊唔止關心香港人嘅皮膚，亦非常關注社會大事。自去年六月起，團隊已經在社交平台上無所忌諱地表明政治立場，陪香港人齊上齊落。不過，公開地喺品牌專頁講政見，唔驚得失其他立場的客人嗎？Agnes說：「暫時又未遇過呢個情況，反而有更多客人因為呢樣嘢（表達政見）而支持我哋，試過我哋啲產品之後，發現原來本地品牌都有好嘢，政見又一樣，就更加信任我哋。」
除此以外，Factiv在疫情期間亦充分發揮互助精神，以有限的時間與資源製作出一批酒精搓手液贈予大眾，尤其是清潔工人、長者及前線醫護人員，希望幫助香港人共渡難關，「嗰陣一知道市面上冇貨，我哋個CEO就立即搵到間廠好好咁留咗啲酒精俾我哋，仲二話不說第二日已經送到嚟公司，咁我哋就即刻開工整搓手液。除咗幾個團隊成員漏夜做，我哋啲朋友都好支持，佢哋願意嚟做義工，即使係星期六日都過嚟幫手一齊整。因為人手真係唔多，我哋個實驗室又好細，每次可以做嘢嘅人得六、七個。加上酒精揮發度好高，好容易漏出嚟，而裝搓手液嘅樽平時係用嚟裝化學物料，個蓋係需要大力啲扭得更加實，所以嗰排大家做到對手都損晒。但我覺得都係值得做，因為大家都好需要呢樣嘢（酒精搓手液），所以我哋做到幾多咪盡做囉。」
正所謂好人有好報，即使全球民生、經濟，似乎也因為疫情而停滯，Factiv反而在這次危機中搵到更多發展機會，Agnes說：「可能因為我哋係online shop，影響又不算太大。因為好多人home office而少咗出街，多咗上網，就更加容易接觸到我哋呢個品牌。有時啲唔認識我哋品牌嘅人發現Factiv社交平台啲文章幾得意，又會問我哋關於產品嘅嘢，或者同我哋討論吓社會運動，互動反而比以前多咗。」無論係社運定係疫情，雖然都未見到有終結嘅一日，大家當然亦唔希望社會狀況繼續惡化，不過Agnes似乎對未來環境依然非常樂觀，仲希望將呢份正能量帶俾大家，「就算香港宜家環境咁差，但我哋展望緊嘅係由年輕人創造出嚟嘅未來。我希望靠我哋嘅能力捱過呢段時間，成果就會出現，所以我都係有信心嘅。」
延伸閱讀︰屬於香港人嘅科研護膚品牌－ Factiv （二） 一文睇清9大護膚法寶﹗
TEXT/ RE・PHOTO / MARIE ANSON・ASSISTANT / PHOEBE CHAN・SPECIAL THANKS / FACTIV TEAM · DESIGN / CHAN SHE