宅男宅女先打機？錯﹗
唔好再標籤打機喇﹗為了防疫，家陣全世界都盡量宅在家，當男女老幼悶到抑鬱之際，幸而任天堂近日推出Switch 最新生活模擬遊戲《集合啦！動物森友會》（あつまれどうぶつの森 / Animal Crossing: New Horizons），玩家將加入「無人島移居計劃」，展開自己話晒事嘅新生活，輕鬆得嚟都要用腦，而且考你反應、組織能力、仲有fashion sense﹗
有街出不得？得閒去朋友個島交換物資，再唔係約埋三五知己去某人個島gathering，周圍去旅行仲可以狂買靚衫轉造型，鬱悶嘅心情終於得到救贖﹗出得咁合時，難怪一出即掀起炒風及成為網上熱話，就連好多你估佢唔到嘅人都玩到不能自拔﹗網上有成千上萬文章解構動森攻略，教機迷點樣快速賺錢、擴建房屋，好𢯊女子打機不在乎速度，最緊要enjoy﹗今回好𢯊記者首次衝出現實，特別遠赴7位忠實森友嘅私家島，訪問佢哋嘅上癮之迷，如果你都係森友應該有共嗚，未玩過嘅不妨聽過來人講吓點解會為動森動心。
率先出嚟分享嘅好𢯊森友，包括好耐無見嘅 Angela Yuen（袁澧林）、玩動森玩到同現實世界混淆咗嘅蔣雅詩（Ziya）、Evelyn Choi （蔡穎恩），同埋 Midway店主兼旅遊專欄作家Rita，集合吧﹗
#好𢯊森友 1號
蔣雅詩 Ziya Chiang
(Aphasia_網店店長 / 模特兒)
「鍾意呢隻game嘅品味，同埋唔起眼嘅細心位。」
01 好𢯊森友背景︰
友名︰何蘭抖／ 島名︰諗唔島 ／登錄日︰2020年3月21日
02 你係唔係機迷？
不嬲都鍾意打機﹐基本上我乜嘢遊戲都玩，對於遊戲，只要好玩我唔揀飲擇食。
03 點解玩森友會？
一開始純粹因為無聊，點知愈玩愈覺得其實隻game好多細心位，大部分嘅傢俬都係會識郁，同埋有聲音，例如當你著唔同嘅鞋行路都會有唔同嘅聲等你可以分辨到，同埋啲動物個樣好多都生得好可愛，衫褲鞋襪都唔老土，鍾意呢隻game嘅品味，同埋唔起眼嘅細心位。
兩房一廳嘅何蘭抖之家，有露天溫泉又有唔同主題房，睇見都想住。
04 一日玩幾小時？
通常一日玩超過8個鐘，幾點起身就幾點開始玩，本身打算做一個有自制能力嘅大人，一日玩四個鐘算，點知第二日就發現其實自己仲細唔急住成為大人。
05 最鍾意嘅造型？
一身毒毒嘅後母造型，因為夠戇居！
06 去過幾多個島？
冇計過﹗印象最深刻都係自己個島，因為有時會開放俾ig唔識嘅人去我個島，每次啲人嚟到我島買嘢都會排隊排得好整齊，令我出自真心覺得香港人嘅質素真係愈黎愈好。
07 特別經歷分享？
玩呢隻game嘅頭兩日，男朋友成日話我唔理佢，開始俾說話我聽﹗：0
然後佢又會開啲我有興趣嘅戲嚟睇，搞到我好痛苦。為咗玩呢隻game同時守住我未睇嘅電影，
我終於跑咗出去買部新機俾佢，迫佢一齊同我墮落﹗🤡 所以我一個人有兩部Switch……
現實世界之中人與人之間要保持距離，但嚟到動物之森，可以同動物傾計，得閒又可以扑吓佢。
08 有咩唔滿意先？
雖然細心位有好多，但隻game好多功能幾乎可以用蠢嚟形容，買衫唔可以將自己鍾意嘅嘢一次放落購物車，每次只可以買一樣，要不停喺更衣室進進出出。食水果又係，要逐粒逐粒食，DIY整魚糧又係要逐粒逐粒整。同埋最大嘅問題，係出入人哋個島要全世界停晒手，迫大家睇住送機接機。其實喺螢幕出個字話邊個要走、邊個嚟咗咪得囉﹗點解要停哂所有人做緊嘅嘢呢？
09 希望改善嘅位？
希望以上我講嘅嘢 佢哋都可以改善：）
10 建議其他人玩？
會﹗因為我中咗毒，你哋都要同我一齊墮落！
記者親身去過蔣雅詩嘅「諗唔島」（其實我個島都係叫「諗唔島」），發現佢個島已經發展得好成熟，有個好大好靚嘅遊樂場，搞到我都玩到唔捨得走～
#好𢯊森友 2號
Angela Yuen
（演員）
「驚自己會花好多時間玩，但驚嘅同時又俾佢吸引住﹗好易上癮﹗」
01 好𢯊森友背景︰
友名︰angelala／ 島名︰angle（🤣） ／登錄日︰2020年4月2日
02 你係唔係機迷？
平時好少打機⋯⋯ 因為好怕浪費時間，我係次次打完機都有罪惡感。上一個令我沉迷的是overcooked，但要細妹肯陪才玩到 （因為一早打過晒三粒星要追四星，四星係超難，係要兩個人以上才玩到🤢）。
因為開始玩咗幾日，暫時angelala屋企都比較簡潔，好開心佢邀請記者同佢一齊瞓，好溫馨。
03 點解玩森友會？
其實這是一個奴性很強的遊戲，做的事情很trivial（瑣碎），成功感又是慢慢累積，不像好似過關遊戲般贏到一局就要立即擊掌嗰種。但有種魔力令到你明明話唔玩，最後執下執下樹葉又繼續玩。因為疫情要留在家，連gym room都無得去，所以唯有打機！驚自己會花好多時間玩，但驚嘅同時又俾佢吸引住﹗好易上癮﹗
04 一日玩幾小時？
5個鐘吧﹗晚上因為多朋友online﹗哈哈﹗
05 最鍾意嘅造型？
我鍾意復活蛋衫及頭上朵花都好靚，另外，我買了些膠布，貼在臉上的造型好似我自己，因為我成日都仆親。好友林婷嫌我套蛋衫太核突，佢俾左套我，但唔知咩牌子的runway衫，佢自己就著Dior﹗ 🤣
06 去過幾多個島？
應該十個左右吧﹗通常去其他人島拿資源，哈哈﹗宜家好鍾意去朋友個島gathering，我以前不是太明白為何大家喜歡打機時連線傾計，但原來我去到其他人的島都會想連住線講嘢。
林婷有超多好靚的擺設、佢咩樹都有﹗佢又識釣鯊魚，花又種得好整齊，佢好似有日連續玩咗十個鐘﹗😂
07 特別經歷分享？
我好想試吓釣鯊魚。
身為入門階級嘅佢，有一次想整靚個沙灘點知失手，但又唔識整甩啲圖案，哈～
08 有咩唔滿意先？
好無聊囉﹗但係佢吸引嘅地方就係咁無聊。你釣完一條魚就會好自然想釣第二條，又會走去搖吓啲樹。但就係咁無聊大家都鍾意玩，可能佢嘅唔好就係佢嘅好。
09 希望改善嘅位？
買賣嘢嗰隻熊仔（係狸貓～）好長氣 ， 可以skip講嘢呢part。🤪
10 建議其他人玩？
會啊﹗愈多朋友玩愈過癮，最好約埋去人哋個島玩﹗
真人比Angela矮一大截嘅記者，喺動物之森仲高過佢，忍唔住拍吓手先～
#好𢯊森友 3號
Rita Chan
(Midway店主 / 旅遊專欄作家)
「呢個時候最好網聚啦，多過四個人同枱都唔怕俾人票控。」
01 好𢯊森友背景︰
友名︰BlackTa ／ 島名︰中途島 ／登錄日︰2020年3月25日
02 你係唔係機迷？
其實由細到大都好少打機，因為我係方向掣手殘人仕，玩賽車都會wrong way，係大個咗先玩吓塊魂同埋桃太郎電鉄，去到iPhone game都係啲消除系列遊戲，主要玩啲唔好咁緊張嘅game。
Rita話好享受喺私家「恐懼鬥室」攤屍敷面膜，正﹗
03 點解玩森友會？
現實世界咁surreal咁黐線，反而喺遊戲世界入面個規律仲正常。而且呢隻game可以自己take control好多嘢，又可以好多唔同嘅interaction位，夠細心，時間季節又對應現實世界，畫面又得意，又唔怕過唔到版，幾時放低，幾時pickup返都得，仲可以去朋友啲島。
04 一日玩幾小時？
通常係深夜先有時間玩，頭一個星期好落力，一日玩咗八個鐘左右，玩到天光。但之後怕生紋有眼袋，同埋捱唔到咁多晚夜。然後發現經常都玩唔到日頭嘅版面，所以依家索性將個時間校去歐洲。
05 最鍾意嘅造型？
無咩時間去整啲造型，而其實我都鍾意簡簡單單，同現實世界一樣，成身黑色，但有時收到啲衫嘅禮物又會試吓著，但通常last唔到一日。
Rita真人同埋喺game入面嘅角色一樣，都係以黑色及簡約為主。
06 去過幾多個島？
暫時只去過四個朋友嘅島。我好讚嘆 Rebecca (葉麗嘉) 個自動廁所，同埋佢個廁所掛咗好多marimekko嘅衫，仲有掛咗好多靚畫喺屋入面。
07 特別經歷分享？
我唔小心多口邀請咗個好煩又肉酸造型嘅動物鄰居嚟個島住，依家出盡辦法迫佢走，係咁reject佢又唔睬佢，又用網打佢，希望佢快啲灰心離開，真係易請難送。
08 有咩唔滿意先？
間屋嘅外觀可以揀就好啦，同埋買咗嘅單車可以踩就仲好玩。
櫻花開嘅第一日整咗條「目黑川」。（左上）同朋友仔一齊睇流星雨許願。（右上）
封住個煩膠鄰居。（左下）同朋友係咁打復活兔。（右下）
09 希望改善嘅位？
如果背景音樂可以有啲變化就好啦，成日loop住嗰首。其他我未試晒，所以暫時都無咩批評。
10 建議其他人玩？
會呀，呢個時候最好就係網聚啦，多個四個人同枱都唔怕俾人票控。
#好𢯊森友 4號
Evelyn Choi 蔡穎恩
(演員 / 模特兒)
「當每天都被迫用腦去看世界，這遊戲絕對能讓腦袋暫時休息。」
01 好𢯊森友背景︰
友名︰芙蓮／ 島名︰貓島 ／登錄日︰2020年3月20日
02 你係唔係機迷？
一向鍾意打機，最鍾意Mario 系列、the sims。
03 點解玩森友會？
其實每一日都只是在釣魚、捉昆蟲、跟島民談天、種樹種花、擴建島上的設施，基本上都是不用用腦，也不用技巧；當每天都被迫用腦去看世界，這遊戲絕對能讓腦袋暫時休息。正如遊戲宣傳所說：因為這個無人島什麼都沒有，所以你什麼都可以做。在這個被社會壓力壓抑得太辛苦的時代，能做自己想做的事，也是一種快樂呢﹗
擁有兩房一廳嘅芙蓮將屋企佈置得簡約舒適，我最鍾意佢個「Apple TV」。
04 一日玩幾小時？
無特定，因為每天都安排了不少活動在家中進行，大概每天都至少會玩2至3個小時。
05 最鍾意嘅造型？
喜歡最貼近自己平日會穿著的造型，因為我就是裡面的主人公嘛﹗
好多靚衫啊﹗
06 去過幾多個島？
3至4個朋友的島吧﹗大家都是剛開始，所以沒什麼太深刻。（笑）
07 特別經歷分享？
暫時沒什麼特別的事發生，但捉到常被咬中的蜘蛛和黃蜂是一種成就解鎖。
08 有咩唔滿意先？
不喜歡復活兔，即是所有復活節活動，釣魚常常釣上蛋！！！！！！！！
最憎復活兔！（左）
最鍾意頭頂呢枝代表貓島嘅貓旗，雖然貓島沒有貓。（右）
09 希望改善嘅位？
其實沒有太大問題，只是如果去了朋友的島，然後當再有別的朋友來到，畫面會同步被顯示登機板⋯⋯會有少少阻礙。
10 建議其他人玩？
大家如果想短暫逃離壓力過大的現實，其實真的可以玩一玩，紓壓呢﹗
感謝Evelyn邀請記者到貓島一日，天氣好，心情好﹗