自從第39屆香港電影金像獎提名名單公佈以來，最佳女主角名單上出現一個金像獎史上陌生的名字－蔡思韵（ Cecilia Choi），大家彷彿如夢初醒，猛然想起這位早於2017年因與陳奕迅合演電視劇《短暫的婚姻》而打響名堂的氣質女神，結果接連兩個多月，Cecilia以洗版式姿態成為大小網媒紙媒爭相採訪的對象。
好𢯊這個訪問，其實早在大半年前已預約。筆者與Cecilia相識於她未去台灣讀書前當兼職model時期，闊別數年，得知已晉身演員行業的她終於回港發展，自然想問問她的近況，然而各有各忙，就等待一個對的時機吧﹗幸運的Cecilia機會一個接一個，停不了的電影及舞台劇……直至人生第一齣港產片《幻愛》，為她帶來電影評論學會大獎的最佳女演員殊榮，以及金像獎最佳女主角提名，再忙也是時候讓大家好好認識。
關於蔡思韵的底蘊，你知道什麼？這陣子關於她的訪問，關鍵字來來去去都是《幻愛》、女神、文青、男友……你知唔知佢鍾意食魚蛋粉、識蒸肉餅？佢仲話自己係傻㗎﹗唔知？有請Cecilia親自解說。
與想像截然不同的台灣
說得一口流利國語的Cecilia，常被誤以為是台灣人，連佢自己都話台灣節奏比較慢，係一個幾適合自己嘅地方，那麼住在台灣的日子是否過得很快樂？點解要返香港？
「高中時讀兆基創意書院，接觸到表演及藝術，加上老師嘅影響，同埋聽啲師兄師姐講北藝大係一個幾好嘅選擇，我覺得台灣都幾適合自己就試吓，好好彩考到，咁就去咗台灣讀書。但其實真實喺台灣生活同我想像中好唔一樣，中學嗰陣成日聽人講讀大學好free、可以走堂，唔會好大壓力。點知唔係囉﹗我一入到去已經覺得好大壓力，根本啲paper work都搞唔掂，仲要排戲排到凌晨十二點幾一點，year 1 仲要自己整道具，根本冇時間瞓。我嗰陣會打電話俾媽咪，喊住話覺得好辛苦，不過去到後期開始習慣就好咗好多。
再者，真實嘅情況係，因為我間學校喺關渡，係一個離市區比較遠嘅地方，同學會講笑咁叫學校做『妖山』，平日冇咩事都係一、兩個星期先會落山一次出市區，所以大家諗嘅café啊、去好文青嘅地方散步啊，距離我比較遠，我讀嘅學校只有兩隻牛喺草坪。」未正式畢業，Cecilia已開始接拍MV、電影，事業看似順風順水，做咩唔留低發展？Cecilia︰「畢業後都已經留喺台灣兩年，一共喺嗰邊生活咗六、七年。始終屋企人都喺香港，所以想試吓搬返嚟香港，我覺得邊度有好嘅戲、適合我嘅角色，我都想做，唔會局限任何地方。」
幸運女神遇上港台男神
好多人話蔡思韵幸運，一出道就接二連三遇上好角色、好對手，但試問如果一個人無實力，又點會有人爭住俾機會佢？機會還是命運？Why not both？「我啲friend成日講『喂﹗蔡思韵，你好似成日都同男神合作嘅？』例如《短暫的婚姻》嘅陳奕迅、《極盜千金》嘅劉以豪、《一吻定情》嘅王大陸、《盜命師》嘅王陽明……其實都試過同幾多唔同類型嘅男神合作。」咁有無心目中好想同佢合作嘅男演員？「冇乜所謂，最緊要係個角色同演員係配合，而且夾得到會有唔同火花，咁就最好，我都覺得自己好幸運。」Cecilia笑著說。
從模特兒步向候選影后這條路，幾年來Cecilia參與過很多不同類型的演出，唔知佢最鍾意邊份工呢？「作為一個演員，唔同範疇都係表演，就算做model、拍MV、拍劇、拍廣告、劇場，都係作為演員表演嘅唔同方式。對我嚟講劇場係最難，因為需要好長嘅排練過程，要諗應該點樣演繹一個角色、點樣將一個角色愈挖愈深？所以我覺得劇場係比較有挑戰性。不過我最鍾意嘅係電影，因為電影係一個好浪漫嘅媒界，佢保留咗時間嘅當下，五年、十年、廿年後睇都會有唔同嘅感受。」
愈難愈愛？百變女主角
出道至今，Cecilia最為香港觀眾熟悉的作品，必然是2017年時與陳奕迅及Eric Kwok等合作的短篇電視劇《短暫的婚姻》，她在劇中飾演面對婚姻危機的媽媽，網上評論大多稱讚這位新演員演得好，很多觀眾更難以相信那時的她只有22歲。「當我接到劇本嘅時候，都好驚、好緊張，忍唔住再三去問『我22歲咋喎，係咪真係做到？』開拍之前我去咗見編劇莊梅岩小姐，佢同我講解點解想搵我做，同佢傾完之後信心大咗，唔想令大家失望，所以好用心做好。」咁你滿唔滿意？「算係咁啦﹗哈哈﹗永遠都可以更加好嘅，尤其係咬字，因為我嗰陣太習慣講國語，不過我已經盡咗力，咁就ok。」咁細個就做媽媽角色，仲要被讚做得好，當時怕唔怕被定型？「拍完《短暫的婚姻》後，真係好似多咗啲關於媽媽嘅廣告搵我。其實作為演員，呢樣嘢反而都係優勢，證明我係百變囉，雖然我廿幾歲，都可以做到媽媽，值得開心嘅﹗」
面對疫情，本年度香港電影金像獎將於5月6日下午午3時在各大社交媒體，透過串流直播形式公布得獎結果，是39年來的第一次。第一次獲女主角提名的蔡思韵，又點睇呢個第一次？「作為一個新人，又係我第一套香港電影，已經覺得好開心。好多謝評論學會俾咗咁大嘅肯定我（最佳女演員獎），至於金像獎，有提名已經好開心啦﹗真㗎﹗」咁你覺得邊個會贏？「老實講我冇睇晒每個女演員嘅戲，冇睇過就好難判斷，而且戲嘅類型好唔同，好難比較。」既然點都唔肯答估邊個贏，不如講吓你覺得自己演得好唔好？「《幻愛》入面我演嘅角色叫葉嵐，係我拍過咁多作品之中，心理上最複雜嘅一個角色。好難演，不過我好鍾意呢個角色，因為令我反思咗好多關於「愛」嘅議題。」
蔡思韵唔係神只係普通人
講咗咁耐工作，不如講吓私事。即使出道以來演過好多不同類型角色，但與生俱來的知性美外貌，配合慢條斯理的語調，似乎同「文青女神」呢個稱號真係幾夾，Cecilia又點睇？「唔係㗎﹗我唔知你覺唔覺得，我有時都幾傻㗎﹗我唔係好靜，我係比較慢熱、講嘢又比較慢，我私底下同啲朋友、屋企人嘅時候，會唔介意去展示自己懵盛盛、癲癲哋嘅狀態，我都會玩嘅，都會大笑，係一個普通女仔囉﹗同好多女仔一樣，嗜好都係睇吓Netflix煲吓劇。同埋我好鍾意匿喺屋企，因為我有兩隻貓，最鍾意留喺屋企同啲貓玩。我最鍾意食魚蛋粉、魚蛋米線。搬返嚟香港有自己嘅廚房之後，最近都開始研究煮嘢食，會煮飯、意粉，蒸肉餅、西蘭花雞柳、可樂雞翼、蜜糖雞翼，仲有焗同煎三文魚，都係啲好簡單嘅菜式﹗」疫情下，在家煮食機會愈來愈多，睇嚟女神好快變廚神﹗
我家有個犀利媽媽
說到本季度好𢯊主題「家」，Cecilia認為「家未必係一個空間或者建築物，而係同你愛嘅人、屋企人一齊，咁嗰度就係『家』，當然包括埋貓仔。」由於爸爸在她年少時已因病過世，家裡就只有Cecilia和媽媽、哥哥。她眼中的媽媽是一個「好犀利嘅女人」，因她能夠獨力照顧兩個小朋友長大。「我同佢嘅關係係又愛又恨，我好錫佢好愛佢，佢都好愛我。但有時仔女同父母嘅溝通好難避免會有啲頂頸呀咁，例如我想做演員、去台灣讀大學讀戲劇，但係有邊個唔想個仔女做醫生、律師？我諗佢見到我嘅決心，所以就開始尊重、支持我。佢會同我講『希望你唔好做一個花瓶，要認認真真做一個藝術家』。去台灣嗰段日子，我哋都好掛住對方，呢個係其中一個我搬番返香港嘅原因。」媽咪知道你獲提名金像獎最佳女主角，係唔係好開心？「係啊，佢都好開心，但佢有提我唔好成為一個驕傲嘅人。」提起媽媽，Cecilia不自覺露出甜笑︰「媽咪最鍾意煲湯，有時佢會煲定一壺湯，送去戲組俾我飲，都幾窩心﹗」
香港台灣都是我的家
回來香港，除了因為家中的媽媽，同樣因為香港是我家。「我喺香港出世、喺香港長大家，香港就係我屋企。」Cecilia堅定地說。然而，她對於台灣也有著非一般的歸屬感。「我喺嗰邊生活咗六、七年，整個大學生涯都喺嗰邊，因為喺大學入面識咗好多好朋友，呢啲好朋友對我嚟講都係家人嚟㗎﹗讀大學嗰陣日對夜對，一齊上堂落堂、又一齊食飯一齊住，所以真係好好感情。諗起有件事都幾感動，最近我同一個台灣女仔傾偈，佢係我嘅best friend，佢話佢媽咪提起我嘅時候，話『思韵係我哋嘅家人』，我覺得好感動。台灣對我嚟講包含好多感情，所以我會好好珍惜，珍惜呢啲好似家人咁嘅朋友。嗰陣返嚟香港，最唔捨得都係呢班好朋友。
原本往來香港與台灣是很輕鬆快捷的事，但是疫情持續，不知何時才能自由自在地穿梭於兩地之間。疫情下，大家身心俱疲，Cecilia呼籲大家cheer up︰「我覺得最重要係齊心，有個好老套嘅道理，自己一個人嘅力量永遠都係唔足夠，要大家一齊個力量先會強大，希望大家要齊心去面對呢個難關。」收到，我都希望你永遠係一個有實力嘅幸運兒。
好𢯊女子
蔡思韵 Cecilia Choi（演員）
Facebook / 蔡思韵 Cecilia Choi
Instagram / ceciliachoii
TEXT / PHOEBE CHAN・PHOTOGRAPHER / MARIE ANSON・ASSISTANT / REBECCA, BLOOM・DESIGN / CHAN SHE・MAKE UP / Will Wong・HAIR / Lupuschui@Orient4・WARDROBE / LOEWE・SPECIAL THANKS / 13A NEW STREET