任天堂Switch熱門遊戲《集合啦！動物森友會》風靡全球，全球機迷爭相在無人島展開新生活，在與現實同時進行的世界裡隨性自在地過日子。「動森」之所以令人動心，全因它讓玩家可以逃離現實，自己話晒事好好享受「日常」的美好。
903 DJ Colin與女友CC，熱玩「動森」之前已搬離父母，租了屋過著自主新生活。很久以前，二人已想像著未來的家應該是怎樣的，由於大家都堅持「靚真係好重要」，居住環境被靚景包圍固然係先決條件，家中的傢俱、電器、擺設、餐具、以至每件生活器具，都是基於符合二人的生活美學而被選中。
結果，呢對情侶住得舒服又開心，「最鍾意留喺屋企」成為常掛在嘴邊的口頭禪，作為二人社交平台的follower，筆者每每見到二人在家拍攝的生活照，總會忍唔住秒like，點解？因為呢pair情侶擅長運用家內外靚景及器具拍出充滿美感的生活照，個人認為張張都勁呃Like，唔信你自己睇。
望望Colin的Instagram帳戶 （＠colinmakkk），佢嘅生活照係唔係好吸睛呢？
二人識於微時，共同成長，坦言很多興趣也是並肩培養出來，因為近年大家都鍾情於camping，所以現時很多家品都是露營家居二用，既然可以物盡其用，即使貴啲都抵﹗
三房一廳，明顯每間房也經過悉心佈置。疫情期間，二人慶幸曾試過work from home的日子，CC在客廳工作，Colin則留守地方不大但設備齊全的工作室。
點解租樓？因為窮囉﹗
叱咤903 DJ Colin ( 麥濠麟 ) 與女友CC識於微時，很多興趣也是共同培養出來，近年二人的共同興趣是camping，從香港到日本再到瑞士，到世界各地享受露營樂的同時，亦令早已萌生搬出來自住的目標更明確。Colin︰「以前每逢weekend都要諗地方去，冬天秋天就可以去camping、行山，但夏天唔適宜戶呢啲活動，就唯有不斷搵cafe去囉，所以就一直都好希望搬出嚟住，有一個地方可以好舒服咁就唔使再周圍搵地方。」「我負責諗放假去邊間cafe，搵到冇地方好去嘅時候，就諗如果有個地方住，唔使專登諗同去邊拍拖就好。」結果，去年二人終於找到這個對的家。「呢幾年我哋好鍾意camping，好享受對住山山水水嘅大自然環境 ，好彩最終搵到呢度。」二人一臉滿足地說。
既然感情穩定且去年已成功求婚，結婚只是遲早的事，點解唔計劃買樓而係選擇租住現時這個村屋單位？「點解唔買樓？主要原因係我哋冇錢買樓啦﹗」Colin快答，再補充︰「其實一開始都係諗住買樓，上一輩係咁樣教，一定要買樓㗎嘛，用一生積蓄同埋精力去買去供層樓，但其實佢哋未必鍾意個單位。可能我哋夠錢買一個一百呎嘅單位，但係用咁多錢咁多力去買一樣自己唔鍾意嘅嘢，仲要供一世，我覺得呢件事係超級憨居﹗諗諗吓真係唔應該咁辛苦喎，又再諗吓我哋想要點嘅生活。」
話晒個單位唔係屬於自己，典型諗法一定係租屋最好本身有齊傢俬電器裝修，方便唔使煩，但Colin與CC偏愛「百冇」。「我哋一開始搬入嚟呢個單位係咩都冇嘅，全部嘢都要自己重新添置，我阿爸阿媽會覺得好唔抵， 租人樓點會買咁多嘢㗎﹗我反而諗既然自己可以做主，點解唔令到成件事係自己真係好鍾意呢？所以我哋好願意使呢一筆錢。其實係睇你點樣計條數，犧牲邊啲位去成就理想嘅生活環境。 」Colin說。
每逢假日如遇上好天氣，二人喜歡在露台吃早餐、嘆咖啡，望著一片寧靜的海，感受漫活的美好。
縱然共處一室，但仍享受各自的Me time，不用上班時，Colin愛聽唱片、炮製手沖咖啡，二人特意從日本購入睇得又用得磨豆機、手沖杯、咖啡杯等。
回家就是旅行
搬離父母自住，有得必有失。現在租住的單位位於新界偏遠地區，以CC為例，如使用公共交通工具，平日約需個半至兩小時才能到達上班地點 （銅鑼灣），因為太喜歡現在的居所，一句「香港有幾大啫？」已能撫平交通不便帶來的小遺憾。事實上，對二人來說，跟家人共居時與現時最大分別是－沒完沒了的家務﹗不過只要分工分得好，又ok喎﹗
「其實搬出嚟住同以前分別未算好大，對我嚟講最大分別就係，以前喺屋企乜都唔使做，洗衫煮飯洗碗……全部都父母做晒，我可以坐喺度飯來張口咁﹗但宜家就全部都係我做，哈哈﹗」CC講到一半Colin插嘴︰「 唔係咁講嘅，其實係我洗碗嘅﹗」即使每日都需要面對堆積如山的家務，但想起自住的好處，疲累也好像自自然然消失了。
CC︰「我好滿意呢度啊﹗ （Colin狂點頭）同埋而家得兩個人， 我唔需要理其他人啲嘢擺喺邊，我可以決定埋佢（Colin）啲嘢擺喺邊或者我知道佢啲嘢需要擺喺邊。」Colin搶著說︰「 好強勢啊呢個女人﹗佢要決定埋我啲嘢擺喺邊﹗」CC︰「 你係成日搵唔到嘢吖嘛﹗」Colin︰「因為你亂咁擺吖嘛﹗」拍咗咁多年拖仲會耍花槍，其實都幾難得﹗好多人話，情侶之間總會有強弱勢之分，呢pair情侶更加係集凹凸、剛柔、高矮各種對比於一身卻非常合拍，難怪相見好同住亦唔難﹗Colin︰「我哋一齊住之後關係仲好咗，因為我哋喺未搬出嚟住之前已經會知道大家鍾意啲乜，會一齊去買呢間屋嘅嘢，你宜家見到全部嘢都係我哋好鍾意嘅。每日對住自己好鍾意嘅嘢呢，心情都好啲。我以前大部分時間喺條街度， 宜家係冇乜必要都唔係好想出街。特別係weekend，以前成日要煩週末去邊玩，宜家一起身可以慢慢食個早餐、煮杯咖啡， 之後各自做吓嘢煲吓劇，輕輕鬆鬆過一日﹗」
雖然口裡說著「唯一唔滿意係屋企有太多Miffy」，事實上二人亦互杷尊重，將各自所愛共處一室卻無違和感。名牌老虎狗藍牙喇叭是Colin最愛，除此之外就是客廳中央的茶几及方便在家工作的home studio set。
CC最愛咖啡器具，其次是據說比梳化更「好坐」的豆袋，以及整個餐具系列，她笑言如果要走難「會成set拎晒走」﹗
影相呃likeの重要性
或者你會問「一對情侶搬出嚟自住有乜咁特別？」無錯，搬出嚟住好平常，特別就特別在二人在新居影嘅相「呃like度」非常高，每次睇完他們在社交平台上載的生活照，總會忍不住邊like邊口噏噏「咁靚嘅」、「好似好正」、「食餐飯使唔使搞咁多嘢」……
俗語有云，食得招積同住得舒適同樣重要，對於呢對小情侶而言，乜嘢最重要？「我哋好快諗到，對我哋嚟講，重要性一定係美觀、舒適、地點、大細，因為我哋兩個都係好注重外表嘅人，所以靚係首要，哈哈﹗」宜家兩位住緊嘅單位於3樓連天台，背山望海，個view正到點影都靚咁滯﹐至於屋內的傢具、擺設、生活器具等等，均由二人悉心挑選，無論咩角度、用咩props都呃like無難度，到底係乜嘢驅使佢哋願意花時間、金錢及精神去拍攝生活照？
「我覺得用心影相會令成個Instagram版面望落靚啲，咁我都會好開心﹗ 因為我私人account係不公開嘅，所以like對我嚟講唔係好重要，但每當我開自己個Instagram嚟睇，見到版面就靚啲相又靚，就會覺得……嗯…… 好欣賞﹗即係我都明白食飯都係為咗醫肚，但係如果擺盤靚啲又好似食得開心啲。」CC直言。至於向來喜歡攝影的Colin︰「 其實影得靚嗰一刻都已經暗爽咗喇，因為係影自己鍾意嘅嘢囉，如果大家認同就當然係再開心啲啦 ﹗真㗎﹗當全屋所有嘢都係自己好鍾意嘅話，咁你就會對呢個單位非常之滿意，而且會好鍾意影相。以前成日去café坐，影相都係其中一個活動嚟㗎嘛，除咗喺嗰度chill個環境之外，咪就係嘆杯咖啡，之後影吓相、post吓相。到有咗自己屋企，就想買啲靚餐具，營造到成個氣氛好啲。」
睇外表應該會以為呢pair情侶好鍾意行街買衫，原來二人最愛逛家品及生活雜貨店，所以當初確定搬出來自住，很快已有全盤採購大計。CC︰「最鍾意去Slowood，主要係買聖木同埋啲廚具，另外，都鍾意幫襯aha living，好鍾意佢哋嗰句slogan『回家就是旅行』， 好chok，但又幾好feel，我都哋同意呢句，因為有花心思去令呢個屋企有少少日本feel，所以回家就是旅行咁樣，自我感覺良好。」Colin補充︰「自從搬出嚟住之後已經少咗去旅行，因為真係有『回家就是旅行』之感。例如呢set BEAMS JAPAN杯連壺，我哋都諗咗好耐買唔買好呢，驟眼睇係好普通㗎嘛，同埋我哋上次去日本抬咗個串燒爐返嚟，本身佢（CC）好憎燒嘢食，所以我要買個靚爐先可以氹到佢燒嘢食，就係因為呢個set，我哋成日上天台燒嘢食。」
買完又要煮、煮完又要擺靚、擺靚之後又要影相……兩位點分工呢？「佢鍾意買啲杯杯碟碟、整完啲嘢食鍾意擺到靚晒之後先攞出嚟，咁佢攞出嚟我就負責影囉 」Colin說。CC︰「係嘅，我鍾意煮完嘢食擺盤嗰吓 。」Colin︰「我鍾意佢擺完盤我影嗰吓﹗」夾到呢～
曾在Instagram看到二人天台晚餐的呃like照， 這天飯局重演，細看檯上食物，明顯器具及擺盆經過CC悉心安排，擺盆靚食都食得開心啲﹗
鍾情村屋，很大程度上是因為三樓連天台的單位，令居住空間的可塑性更高。Colin和CC喜歡招呼朋友到天台BBQ，自從去年從東京BEAMS JAPAN店買了日式串燒爐具之後，即使只有二個人，偶爾也會炮製日式串燒大餐。
「家」……就是你和我
又係傾返好𢯊本季度主題嘅時候，「家」令你哋諗起乜嘢？
二人即時對望，齊聲道︰「你囉﹗」呢吓合拍嚇親我同攝影師。「我哋有一致嘅答案，就係對方囉﹗人一定係最緊要嘅，我哋一齊建立、生活喺呢個地方，一個家如果唔係有人，家就只係一個俾你瞓覺嘅地方。」一個完整的家，亦包括一政的價值觀。「宜家呢個家，我哋嘅價值觀係好一致嘅。但我同阿爸阿媽嘅價值觀就好唔同，例如喺顏色上。同埋佢哋係好慳家嘅人，宜家你見到我哋屋企就知我唔慳家啦，但父母會死慳死抵儲一世錢買樓。就係因為見到佢哋咁辛苦，我唔想自己嘅生活都係咁樣。」Colin認真地說。
「我同屋企人關係都算幾好，我同細佬都算ok，阿爸阿媽都會聽我講嘢，但政治嘢就真係唔會講㗎喇，大家知道大家諗法唔同，唔想因為咁而鬧交。而家無同屋企人住有時都會掛住佢哋，特別係疫情嚴重嗰陣，會擔心佢哋夠唔夠口罩，好多時買防疫用品都會買埋佢哋嗰份。」CC說。家，對Colin和CC來說，就是對方存在的地方。近月香港社會動盪，很多人也開始萌生離開香港這個家的念頭，唔知佢哋有無諗過呢？「有諗過，但宜家嘅移民同以前年代好唔同，以前移民係成家人或者成個家族一齊移晒過去，但宜家身邊嘅朋友好多都係去咗外國讀書、做嘢，佢哋係用呢個契機去搵另一種可能性。有時都會開始諗吓，邊個地方適合自己住呢？過到去做啲咩呢？不過都係諗嘅階段。但係正如我哋之前所講，屋企最重要都係人，只要個人喺度，其實我哋去邊都係一樣。」Colin講完，CC點頭。呢句好啱聽，我都想俾like。
