疫情持續，經濟不景失業率續升，但本地咖啡業界似乎未受影響，單單是人氣熱點深水埗，過去一年便新增了逾十間咖啡店。在另一邊廂的香港島，位於西營盤半山的骨子裡 （Bone studio）也在數月前悄悄開業。
看看網民對小店的評價，不外乎「係偽文青打卡天堂」、「座位不多但打卡位幾多」……咖啡呢？食物呢？裝潢呢？「好歡迎大家嚟影相打卡，但我更希望有人留意設計背後嘅想法。」骨子裡店主Boni說。不是追趕疫下咖啡店熱潮的步伐，原本從事廣告行業的Boni經歷了數年的籌備，年初終於恨下決心將夢想化成現實，在找尋地方開設咖啡店之際，隨即遇上疫情，心想「如果而家唔做以後都唔會做」，豁出去試試吧﹗慶幸Boni擁有這份骨子裡的勇氣，此時此刻好掛住日本嘅我，才有機會坐在洋溢著濃厚日式咖啡店氛圍的空間，喝著來自靜岡的咖啡，幻想自己去咗轉日本。
「每個人骨子裡都有獨一無二嘅才能，我拎晒最強嘅嘢出嚟開店。」
筆者算是熱愛流連咖啡店的一群，在骨子裡開業初期也曾以顧客身分幫襯過，由於當天行色匆匆，實在沒有特別感受，但從店內的裝潢擺設及器具來看，小店明顯屬「心機嘢」。後來聽認識店主的朋友透露關於骨子裡的小故事，提到成為打卡熱店的心理矛盾「我哋唔想定型為打卡店。」客人喜歡才會爭相打卡，有人欣賞唔好咩？一於親自問問店主Boni吧﹗
「骨子裡係我嘅心血，由諗去到營運，用咗4、5年時間籌備，我深信每個人骨子裡都有獨一無二嘅強項或才能，令自己能夠做喜歡嘅嘢、行一條想行嘅路，『Bone is the hardest part of a human. 』所以改左呢個名──骨子裡（Bone Studio）。幾年前做廣告公司嗰陣已經開始學咖啡、睇書、學習點去開咖啡店，因為我好希望行一條自己相信嘅路，所以放棄安穩選擇快樂，到2017年正式辭去全職工作，其後再開網店賣手沖咖啡包、手作飾物，同時接job。踏入2020年，我覺得係時候喇，1月開始搵舖，點知就開始疫情，當時我諗『如果而家唔做以後都唔會做』，所以決定繼續。原本搵到一個心儀舖位喺中環，點知突然話有人租咗，好失落，好彩後來搵到呢度。因為呢度比較靜，我都有諗過最壞打算係如果真係無客，就當呢度係workshop拎電腦出嚟坐喺度自己做嘢，不過好彩，雖然疫情第三波後生意差咗但都未至於靜到無人。」
「每個打卡點並唔係得個裝飾，全部都有用腦及努力去設計。」
初次來到骨子裡，已從店內的裝潢擺設及器具看出Boni的「心機」，這次更仔細的看，加上Boni的聲音導航，真正明白點解門口嗰碌大柱一邊寫著「COFFEE」、另一邊是「DESIGN」。Boni︰「為咗減低成本，店內嘅牆係自己油，而傢具、植物等等都係自己搬運，基本上大部分嘢都係自己設計自己搞。」老老實實，聽過好多人講夢想係開一間屬於自己嘅咖啡店，點解Boni有信心咖啡夢成真後有競爭能力呢？「我唔敢話自己好有信心，但我已拎晒自己最強嘅嘢出嚟, 就係將設計、想法與咖啡融合。所以我成日話，我唔係一個最好嘅咖啡師，但我會盡量揀最好嘅豆做presenter。可能因為我係art base，我明白要做一樣嘢出嚟都唔一定要落手製作，但我可以揀最好嘅嘢present俾你睇。正如我哋去咖啡店唔只係飲咖啡嘅味道，亦講究環境、器具成個感受，呢啲係我做設計可以用到嘅嘢。」Boni滿有信心地說。
Boni強調骨子裡唔只係一間咖啡店，同時展示緊佢嘅設計作品。「開業至今都有唔少傳媒同埋food bloggers介紹過我哋，不過大家都係比較著重講打卡位，好少講骨子裡嘅咖啡、食物或者設計。我哋唔想定型為打卡店，重點係每個打卡點並唔係得個裝飾，全部都有用腦及努力去設計。例如店內好多人影相嘅掛牆鏡，呢個擺設係因為一句說話而來 『Which coffee wakes you up immediately? 』有咩咖啡可以令你即刻醒神？就係一杯倒瀉嘅咖啡﹗於是我搜羅木杯、彎形鏡、木紋紙去完成呢個擺設，希望大家嚟到會有refresh嘅感覺。」骨子裡主打日系設計方向，店內也販售充滿日系感覺的飾物擺設，全都是來自日本的嗎？
「櫃上嘅小飾物大部分都係自己做，因為一直好想開實體咖啡店，未開到嘅時候就透過不同方法向呢個方向進發﹐例如做麵包主題嘅樹脂粘土飾物，poster都係自己影自己設計，紙杯都係自己設計，杯上有一個日本武士同埋狗仔，可能因為自己比較男仔性格，加上覺得一定要好硬淨先可以行到鍾意嘅路，所以用武士代表自己。牆上嘅月曆都係我自己畫㗎﹗至於另一邊牆上嘅日文意思係『Small shop，warm coffee.』 正好代表地方細細嘅骨子裡。至於再上面嘅poster，係我去瀨戶內海豐島旅行時影嘅相，其實我都鍾意影相，所以我鍾意人哋喺呢度影相，只係有啲人入到嚟俾我嘅感覺係有得打卡就得，預咗呢度啲嘢唔會好飲唔會好食﹗」
「按自己的節奏經營，生意差咗都會驚，所以不停試新嘢。」
背後沒有強大的資金護航，Boni孤注一擲的籌碼就只有過往的積蓄、對咖啡的熱誠與獨特的設計巧思。幸好小店開業至今仍是人流不絕，既然受疫情影響，為什麼不延長營業時間呢？「而家唔係好做生意模式咁經營，係做自己。一星期休息兩日，4：30pm或5：30pm closed，我明白做生意角度最好做到6點，又或者唔好休兩日咁多，但係我咁set係要俾時間自己休息，一來我自己一個人踩唔到咁耐，二來我唔係要賺多啲錢，我想就返自己生活節奏。最困難係初初開店嗰陣，會做到膝頭痛，瞓醒一邊手痺，當時都驚之後會點，原來人真係會愈來愈強。」終於擁有屬於自己的咖啡店，滿意嗎？Boni說︰「因為資源有限，已經盡量做到自己想要嘅嘢，揀呢度就係因為有日光，朝早入到嚟望住陽光射入店內，望吓出面棵樹，感覺好舒服，暫時都幾滿意。」
B.S.日本手沖珈琲
雖然現時有三個兼職店員幫手，但Boni仍需擔任全職店員工作，她說希望遲些生意穩定些便聘請一個咖啡師，將一半時間空出來做設計的工作。「疫情第三波時生意下降咗50％左右，唔單只因為疫情，加上骨子裡已經唔係新店。都會驚㗎，所以不停做新嘢﹗11月會有沖縄黑糖秋祭，12月可能會有瓷器展覽。現時Menu以輕食為主，因為我自己好鍾意食日式早餐，而且認為骨子裡好適合做早餐﹐同埋一日開始應該先飲一杯咖啡，希望俾到顧客溫暖、快樂﹗」縱然實現夢想的過程很辛苦，但能夠做自己喜歡的事實在幸福，難怪工作了一整天的Boni雙眼仍然閃閃發光。
無論如何，卡還是要打，但是在打卡的同時，不妨留意一下設計者背後的心思。
日本厚玉子牛角包Combo
期間限定・沖縄秋祭
由即日起至2020年11月15日，骨子裡舉行沖縄秋祭，除了展示以沖繩為題的相片及設計品，更新增特製的沖縄黑糖飲品及菓子。據說享用骨子裡黑糖定食的顧客更可獲贈沖縄紀念品一份，即使無得飛都有手信帶回家。
沖繩黑糖Shakerato
沖繩黑糖黃豆素忌廉蛋糕
骨子裡 Bone Studio＿西營盤般咸道38號地下2B舖
Facebook / BoneStudioHK
Instagram / bone.studio
Website / bonestudio.store