究竟有咩動力，驅使疫情下兩個男仔成日行埋一齊？
當世界無常規，不如豁出去將「諗吓嘅計畫」實行，因為……香港仍有好多人好有心做香港嘢﹗
一個係早前為《叱咤樂壇流行榜頒獎典禮》負責打造DJ服裝嘅設計師阿Sing，創立女裝品牌PLOTZ多年，近年開設workshop studio主打設計與製作企劃。另一個叫Ronnie，曾任潮流記者多年，數年前加入本地知名網購平台擔任造型師，在時尚圈打滾多年，疫情下work from home愈諗愈想為自己做啲嘢﹗
十多年前因訪問而認識嘅前記者與設計師因疫情再遇，傾到呢個時勢有咩想做，傾傾吓就傾咗個品牌出嚟﹗二人共同創立嘅高質訂製時裝品牌seW （service engineered Wear ) ，係一個按顧客需求而特別訂製的時裝品牌（唔係haute couture 高級訂製時裝喎！）， 強調功能性與賣相並重，因為Ronnie ＆ Sing都希望製作出生活上真正需要嘅產品，因為時裝唔需要跟season 、理潮流，唔止要靚亦要實用，更重要係made in Hong Kong﹗
Sing的studio位於石硤尾賽馬會創意藝術中心內，Ronnie與Sing有空便會到附近的咖啡店邊喝咖啡邊開會，合作愉快全因過程輕鬆無壓力。
當《叱咤》設計師遇上潮網造型師
識咗十幾年先嚟無啦啦合作搞新brand，除咗係緣份，最重要應該係因為大家都太熱愛時裝。Sing Lo於2007年創立自家女裝品牌PLOTZ ，憑著獨特風格及細緻剪裁，早已衝出香港，在法國、希臘、台灣等地設銷售點，並曾獲頒多個國際性獎項，以及在多地舉行時裝展。隨著時裝界生態改變，Sing近年再創立workshop studio，與不同單位合作與時裝有關的創作企劃，最新動向是剛剛為《叱咤樂壇流行榜頒獎典禮》設計各DJ的服裝。 Sing︰「PLOTZ暫時停一停先，近年主力搞workshop studio，主要係design加production工作，唔知係咪以前做PLOTZ啲衫太誇張，好多人搵我做啲藝術展覽、有時又會做吓廣告服裝。」
至於曾任潮流記者逾十年嘅Ronnie Chan，數年前加入本地知名網購平台擔任造型師，因工作需要常被靚衫包圍，本身都係貪靚之人，所以成日有朋友甚至唔識嘅網友問佢啲衫喺邊度買，好彩佢夠大方愛公諸同好。Ronnie︰「我而家係一個網上平台嘅senior stylist，主要負責成個平台嘅造型設計、規劃內容、諗吓影咩相襯咩衫，同時負責marketing工作，其實都少少似以前做記者嗰陣做content。」十多年前，潮流記者Ronnie在Sing的舊工作室進行採訪，當時Sing的工作室在石硤尾賽馬會創意藝術中心樓上細單位。數年後，Sing的工作室遷往地庫，面積比從前大好幾倍。2020年的夏天，二人因工作在Sing的工作室再遇，但今次唔止傾fashion，話題涉及疫情、也覆蓋夢想，以及如何實踐。
Ronnie主要負責SEW的市場策劃，由創作概念到為產品拍攝宣傳照亦親力親為，相機既是襯衫配飾也是有實際用途的必備之物。
Sing早前忙著為《叱咤樂壇流行榜頒獎典禮》設計服裝，以黑白為主軸的服飾深受各DJ喜愛，幾乎一人一post狂讚服裝好出色﹗
疫情帶來嘅影響，會令你諗「仲可以做乜嘢？」
疫情為全人類帶來深刻的影響，分別只在多與少。對Ronnie與Sing而言，影響是有的，但未致於震撼式巨變，反而是疫情令工作及生活節奏減慢，讓大家多了時間去細想，呢個時勢仲有咩可以做？Sing︰「一定有影響嘅﹗每個影響都會令你諗起仲可以做乜嘢，所以我同Ronnie先會決定做呢一舊嘢 (seW)，如果無疫情大家好順利咁做緊原本做嘅嘢，樣樣嘢太smooth生活上完全無問題，就唔會咁快走到呢樣嘢（seW）出嚟。」
Ronnie：「多咗時間work from home，你會諗多啲除咗工作以外嘅嘢，喺呢個環境會唔會有樣嘢係為自己而做？曾經有好多人喺我個人社交平台私訊問我『喂你啲咩咩咩喺邊度買啊？』『你會唔會造自己牌子啊？』其實一直都有好多人問，我都有呢個諗法但無門路，直至最近work from home，就會諗其實呢個計畫係唔係要實行呢？舊年七、八月左右，我太太同一班閨密合作開咗間花店，少少似係玩票形式，咁當然都係認真做，因為大家都想趁疫情做自己想做嘅嘢。咁啱嗰排因為做嘢同阿Sing傾起，傾傾吓就決定搞個牌子，做啦唔好諗咁多﹗」
seW的第一件作品是特別為Ronnie太太的花店設計之團隊圍裙，採用防花粉且跣水的日本物料Pollen Resistech ™，多間格設計可增加收納功能，褶襇細節令實用的圍裙變得更fashionable。
時裝可以不理季節唔跟潮流，但一定要又靚又實用。
打鐵趁熱，好﹗但係Ronnie本身有份正職，雖然PLOTZ暫休，但Sing旗下製作室workshop studio亦keep住接job，真係有時間搞多個牌子？Ronnie︰「唔係真係用好多時間啫﹗好多時我係臨瞓前十分鐘諗到，好得意，由呢個牌子個名點出現，幾乎所有嘢都係咁滯﹗又或者係我瞓醒到起身之間嗰十分鍾諗到。同埋而家多咗時間work from home，時間分配比較彈性，快手做完正職工作之後再諗seW工作，都係工餘先同Sing見面jam吓，暫時絕對兼顧到。」
十分鐘就諗到個名咁勁？Ronnie︰「係啊﹗seW係 service engineered Wear嘅縮寫，service代表我哋本住一個目的去做一樣嘢，正如阿Sing過往為藝術館做衫都係提供service，而engineered Wear 主要係想針對時下疫情，有時會諗『係唔係所有嘢一定好複雜？ 』不如唔複雜咁去做啦﹗例如物料係唔係可以再講究啲？例如係好快乾嘅布、係咪要多啲袋、係咪要跣水，將engineer嗰樣嘢擺入去設計，會practical（實用）一啲，每一件item都係tackle（應對）返呢個時勢而去設計﹗」Sing︰「造呢個品牌最主要概念係來自生活上需要嘅衣服，唔使跟season、 唔使理其他潮流嘅諗法，因為我哋唔止需要一件美觀嘅衣服，實用、符合生活上需要嘅產品其實係好重要。坦白講，創作seW係 project base 、tailor made design service俾人，同傳統造時裝好唔同，但好玩﹗Ronnie負責營運一個潮流平台，佢會知道好多我唔知嘅嘢，莫講話做fashion ，就算係個形式點present件事，比起我哋以前攞個notebook 去present件事已經係兩樣嘢，佢會將佢嘅諗法share俾我，我都想知道有咩可以玩﹗既然我做production OK，佢就熟悉社交平台上玩法 ，咁應該可以有啲好玩嘅嘢走出嚟。」
想每一件產品都可以令收到嗰個人好開心、好鍾意。
有人偏愛tailor made ，因為其獨一無二嘅獨特性，seW執意提供tailor made service，是為了真真正正切合客人需要。Ronnie︰「暫時只會以pre order形式去做，即係有人想要我哋做先做，我哋唔會迫自己去造下一件作品。我想每一件產品都係可以令收到嗰個人好開心，佢會真係好鍾意呢樣嘢﹗ 」
Sing︰「唔止想個客開心，我自己都做得開心。而家好專注知道發生咩事，以前做fashion就係要追某啲時間、符合市場要求，而家就好清晰話俾你知客人想做一樣乜嘢、點解要做呢樣嘢，點樣符合用家需要，所有嘢都好清晰，我只係answer緊個brief，所以即使做法同以前唔同我都唔會太擔心。我覺得好玩，就係點樣令一條褲一件衫唔係淨係著上身係靚或者有style，而係點樣令著嗰個人生活上可以有啲嘢嘅諗法，譬如SEW第一款產品圍裙，因為係為花店團隊而設，我特登搵咗塊防花粉布料，第二款產品係一條多袋褲，係西褲咁嘅型但有跣水功能， 所有嘢都從實用角度去諗，件事其實係好玩咗，呢個袋係需唔需要？後面係唔係橡筋？或者掛嘢嗰個耳仔要唔要多一個？無咗以前女裝要特登諗啲好decorative嘅嘢嘅諗法，又唔需要跟season跟trend，好玩。」
Ronnie：「少少補充，頭先阿Sing講嘅多袋褲，諗點設計嘅時候有從我哋自己經驗出發，我成日都買多袋褲，因為覺得好似有好多嘢袋，有次經歷係搵極搵唔到嘢，明明feel到個電話但搵唔到，因為真係太多袋，所以我哋就會諗其實係好定唔好呢？而家呢個環境係咪要更多袋？定係不如簡化咗佢？會多好多實際方面嘅想法。」
沒有特定對象、也無性別規限，就如第一款作品圍裙，本是花店專用工作服，但同時可配襯不同造型，男女皆宜，同時切合工作及生活需要。
難唔難著、男定女著，視乎你點定義套衫。
老老實實，第一次見到SEW嘅作品就幾欣賞，唔止係因為佢嘅uniqueness，我最buy嗰種 genderless嘅態度。為免誤會，都係問吓SEW主理人係唔係咁諗先。Ronnie︰「雖然通常係男仔問我啲衫褲喺邊度買，但其實我哋諗法係唔應該定義男仔或女仔囉﹗係你點定義呢件服裝點著，譬如條圍裙，本身用意係俾幾個女仔花藝師著 ，當初只做四條俾我太太同埋佢條team ，所以加咗啲女性化少少嘅ruffles細節﹐但其實喺社交平台出咗相之後都有男仔訂呢條圍裙，我都試過上身，男仔都handle到﹗難唔難著、或者男仔定女仔著，係視乎你點定義套衫，所以現時我哋都做咗兩個size， 男仔女仔都著到。我都有同阿Sing講，不如照呢個板形再做唔同款式或者唔同顏色啦﹗咩都有可能。」
明明都係同時裝有關嘅工作，但始終都係自己唔擅長或者係未做過嘅範疇，呢個時勢行呢一步，怕唔怕太感冒險呢？Ronnie：「係，好多嘢唔識，唔識就學囉﹗每當我諗到啲嘢我就會即刻whatsapp阿Sing『喂阿Sing 阿Sing呢個得唔得啊？』『好似呢個得啊咁樣？』咁我都會試吓做color palette個board，等佢再俾feedback我﹗」
Sing：「我覺得好玩係我哋真係兩個腦嚟嘅， 佢有啲位好清晰去睇得到件事係work唔work，有時designer係會好沉迷自己世界，我係咁樣㗎喇﹗我做咗咁耐自己嘅嘢，有啲位係我睇唔到而佢睇到嘅嘢，咁佢又掉返轉好trust我，個信任係幾好﹗」Ronnie︰「好多嘢我唔識但就係阿Sing好熟悉嘅嘢，譬如我問佢物料嘅運用，佢會即刻答到我『不如用呢個物料啦？』剪裁上我就真係完全放俾佢搞，以佢咁多年經驗， 我無嘢可以反駁，我好信任佢。」
香港有好多人好有心做香港嘢，但香港牌子成日被低估價錢。
Made to order做法但收費遠遠低於haute couture （高級訂製時裝）價錢，七除八扣仲有錢落袋咩？定係搞呢個brand統粹為興趣？Sing︰「好現實咁講，做嘢一係為好玩一係為錢。做SEW係好玩，但當然希望budget可以cover到 development cost，因為如果一件事好玩要試好多嘢，可能都要有sampling去打先至睇到，成本唔會太平。 我成日好希望keep到而家個sample room，因為有sample room先可以玩到design 可以develop好多手藝嘅嘢，好多人會拎上大陸做，但如果乜都要同上面廠溝通會無咁有趣，始終made in Hong Kong嘅諗法比較多，所以錢都係要賺，每件產品都係一個合理價錢囉，唔搵錢就好難keep到而家呢個地方（studio）。」
Ronnie︰「唔知點解香港牌子成日俾人underestimate（低估）價錢 ，係咪永遠香港牌子賣過千就係太貴？香港有好多人係好有心做香港嘢，好似我哋咁，我哋有個板房而且又會做啲好手工嘅嘢，就算個tag都係自己人手蓋印，成件事都有價值喺度。所以我哋希望可以做得到，令大家認為香港品牌係值錢嘅﹗其實我哋都有諗，希望將來可以同唔同嘅本地牌子做一啲collaboration，點解我哋唔可以去united一個設計嘅力量去做一啲得意嘅嘢？事實上，呢個亦係創作seW嘅原動力。」
絕對認同「香港有好多人好有心做香港嘢」，只係好多人無留意亦唔在意，有心唔怕遲，是時候好好珍惜香港嘢。
seW
Instagram / service.engineered.wear
Facebook / Service-engineered-Wear