正所謂心態決定命運，或許因為開店的目的非為賺到盡，Logo上的一小句tagline已道出其使命「Bring Better Food To The People We Love」，自2016年尾創立網店，至今年年中開設實體店﹐一路走來遇到的都是好人好事，個名有個Good字似乎真是開了個好頭。
還記得新店開業之初，我老套地拋下兩句祝福語「祝GOOG GOOD生意興隆、客似雲來」，結果店主之一的Tammy急著回應︰「有客就得，千萬唔好太多，而家未掌握到工作節奏，唔想得失客人。所以我哋暫時唔接受傳媒訪問住，怕一下子多人做唔嚟仲衰﹗」正因為大家不慌也不忙，所以呢篇「新」店訪問在開業數月後才出現，而且重點不會是十大打卡位、五大相機先食食物、三大平爆飲品等等。只想告訴大家這是一間認真做實事的素食小店，店主們追求好的食材也講究好的賣相，開這間店就是為了與客人一起好好享受生活，點會唔值得支持？
生活與工作的平衡
香港地租金昂貴，想開舖創業絕對唔易。慶幸在朋友的介紹下認識這棟三層高樓宇的租戶，她只要了最上層作為工作室，地下及一樓則留給GOOD GOOD。GOOD GOOD店主Tammy及阿敬向來喜歡寧靜的西環區，能夠有機會在這裡開設第一間店，實在令人振奮。自從港鐵西港島線全面通車後，愈來愈多咖啡店進駐西營盤一帶，然而開得多也執得快，這一帶咖啡店的壽命引起了Tammy及阿敬的反思，搵錢交租是重要，但抓緊自己的生活節奏、努力在生活與工作上取得平衡更為重要。因此，GOOD GOOD堅持每週休息兩天（逢週一、週二為定休日），而且不做晚市 （私房菜及包場活動除外）。Tammy︰「唔係怕辛苦唔想做，不過而家都仲係比較困身，我哋希望可以更自由。以前做online shop自由好多，而家開咗店成本大、支出多，可能收入同online shop時唔係差好遠，但係有好多體驗係開實體店先會有，所以唯有努力做好，但唔好迫自己太緊。」咁又係，要做得開心先會願意打好呢份工，勉強迫自己不停做只會弄巧反拙。
G／F
1／F
下層只有一張長型吧檯，上層的座位比較多，除了中間擺放了小茶几的矮凳區、另有吧檯、梳化及可供8 – 10人坐的大長檯。
當初的堅持仍留在小店
登入GOOD GOOD網店，首頁寫著品牌的創作理念「Home Cooking, Everyday Meal
懷著為家人料理的心思，希望烹調出屬於Good Good家的味道。每早新鮮選材備料，有當季風味、有從旅遊學到的多國料理，若有幸得到你的喜愛，將是我們最大的喜悅。」簡單幾句道出兩位店主的堅持。店主Tammy於大學畢業後到澳洲體驗working holiday，農場生活令她了解天然食材的好，以及吃得好的真義。回港後當了一陣子雜誌記者，繼而裸辭再跑到廈門的一間咖啡店當上菜式設計顧問，以樸實簡餐為主，藉此推廣健康飲食的概念，可惜再次因為與主流文化不同而遇到挫折。幸而遇上廚師出身的阿敬，二人對健康飲食抱有共同理念，因此決定共同成立自家品牌。每次外出食飯遇上好吃的菜式、或是在採購的過程中遇上好食材，Tammy和阿敬務必好好記錄下來再仔細研究，或是嘗試了解某些食材的生產過程。「好多客人鍾意ALL DAY SET嘅C 餐，所以我哋都堅持每星期轉一次C餐，試過係咖哩飯、煙斗粉、茶漬飯、意粉甚至素漢堡，我同阿敬都好鍾意研究C餐整咩好，因為好怕悶，唔想日日重覆，所以好希望可以嘗試用更多不同嘅食材整唔同菜式，我哋太熱愛自由喇﹗」
Good Good Hot Chocolate (左）Lemonade Soda （右）
Mulled Apple Tea (左）Coffee JellyCoffee Jelly （右）
意想不到的鄰里關係
正式營業了數月，最大得著是什麼呢？「一班好好嘅客，呢度嘅鄰里關係好到令我好驚訝，原來人與人之間相處可以咁好，令我好享受。」Tammy興奮地說。據他們的非正式統計，顧客都以成熟的上班族為主，也有很多媽媽及婆婆級顧客，令他們最欣慰的是，很多顧客都是「返頭客」，一間小店有能力儲落一班一而再再而三幫襯嘅熟客代表咩？好明顯係質素好到令人不得不返轉頭。「有一個大肚婆媽媽好鍾意飲GOOD GOOD杏仁奶，連續來幾個星期都係第一個客嚟。後來唔見一排原來佢生咗，佢老公仲特登過嚟外賣杏仁奶，新鮮打嘅杏仁奶同街賣嘅係兩回事，真㗎﹗另外，有個每日都嚟嘅婆婆Claire，從開店第一日佢已經出現，開始嗰陣會有啲驚，因為佢講嘢好大聲、而且唔知佢想點，後來慢慢傾多咗發現佢真係好可愛。Clarie最鍾意食牛角包、Good Good飯、Carrot cake，間唔中會飲蘋果汁。佢有時仲會帶啲教會朋友嚟飲杯茶食件cake。我哋同附近啲店舖關係都好好，絕對唔會當大家係competitor，例如有次附近蔬菜店店主無啦啦喺第三街拎咗個檸檬俾我，因為嗰個星期C餐做緊檸檬pasta。所有好人好事令我哋愈來愈鍾意西營盤伙，暫時無諗再開分店啊，只想努力做好呢間店，同時希望加強返online shop服務！」好﹗
Good Good飯 (拌飯，味噌湯，小碟，蕎麥茶)
ALL DAY SET C 野菜油揚味噌湯烏冬 (左） Pear Cranberry Crumble Pie（右）
Yogurt Bowl
GOOD GOOD GROCERY_西營盤第二街2A地下
Online shop／goodgoodgrocery.com/