筆者向來沒有聽電台的習慣，可是畢業後的第一份工作正是需要整天坐在 office，那時聽電台似乎是唯一樂趣。這次好𢯊女子主角是叱咤903 DJ 阿正（黃正宜），一位好搞笑的朋友推介這位 好搞笑的DJ給我，出於好奇嘗試聽聽她的節目，邊聽邊諗「呢個人幾有趣！好想識佢！」再向好𢯊主編提出訪問阿正，豈料她即回應︰「好喎﹗我知邊個阿正，而家有份做《早霸王》同埋《早﹗Junior》嗰個嘛﹗仲有個節目叫咩我一個人(係《一位呀唔該》先啱) 都幾好聽， 而且佢好似幾有好𢯊女子感覺……」呢個訪問就係咁發生。
阿正呢個名好戇居又好襯我
時下年青人很多都以不用上班、返幾份兼職或自己做老闆為目標，阿正的目標，早在中學時代已經定下。「中學嗰陣食完晚飯就會返上床開收音機聽，嗰時已經好鍾意聽《森美小儀》同埋《空中喱民》，總之好多電台節目都好鍾意聽。聽慣咗覺得佢哋係生活嘅一部分，某程度上有情意結，就會不斷諗我要做電台、我要做 DJ！」因為有目標，順理成章考入新聞系，從一而終地只想入電台工作。畢業後到數碼電台工作，準備在數碼電台開咪，當時需要改個藝名，於是便從自己的中文名字黃正宜中取名阿正︰「因為我由細到大都無乜花名，朋友都叫我黃正宜，無咁熟便叫 Bonnie，咁好無性格㗎嘛！有日沖沖吓涼就諗到阿正呢個名，邊有人叫自己做阿正㗎？結果朋友都話我呢個藝名好戇居又好襯我！
點知一年多後數碼電台結業，為咗生活，之後加入 production house 工作，愈做愈唔開心，做咗四個月更出現焦慮症病徵，最後決定裸辭，立即容光煥發！」對阿正來說，無嘢重要得過開心，她寧願在咖啡店打工，也不願迫自己做不想做的工作，幸好遇見介紹她去商台工作的急急子，阿正激動地說︰「終於可以搭小巴時在廣播道鏗鏘有力地大嗌：商台有落呀唔該！」
核突之中算無咁核突嘅醜樣KOL
和阿正做訪問，發現她的神奇之處在於可以不停講嘢，彷彿沒有停頓的空間。為免有些甚少聽電台的讀者不知道阿正是甚麼人，就讓她介紹一下自己吧﹗阿正︰「我本身係個好多嘢講嘅人，超級嘈，嘈到有時都會覺得自己嘈！好多人會覺得我好麻甩啦、單身啦、無乜所謂啦、好師奶啦、癲癲哋喪喪哋啦……其實我都有好女仔嘅特質，就係我幾扭擰。」她並不是因為想做電台 DJ 而特地訓練口材，而是她個人本身已是口水多過浪花，由細到大都好多嘢講，因此她更自嘲自己是負責插科打諢的搞笑小薯。
「我行唔到靚女路線㗎喎，所以一定要行核突路線，因為核突之中我算 …… 無咁核突，哈哈！你（我）走去同 Angelababy 、袁澧林果啲鬥靚？傻啦！我都係堅決做醜樣界嘅 KOL！」
想挑戰一個人影婚紗相
平日做節目，最花時間就是開咪前的準備，例如《痴女正傳》一個五分鐘的節目便需要一早寫定對白，有時也會臨場爆肚，阿正直言「做節目用太多腦，平時自己一個就好無所謂。買衫是但啦，朋友會幫我揀。我好墨守成規，食開嗰啲餐廳食來食去都係嗰幾間。」平日返工或出街，她也只是塗面霜、畫畫眉便算。問她是否宅女？她卻否認：「因為實在太忙了，沒時間攤在家，如果全日攤喺屋企 我就會覺得自己好無用，唔得喎！我係唔可以唔做嘢，即係放假嘅時候飲咖啡，就覺得做咗嘢㗎啦！哈哈！」是次訪問相約於咖啡店見面，是她每個星期必定到訪的地方，她說自己不是一個特別喜歡試新嘢的人，不會跟隨咖啡師周圍走，也不願試新的咖啡店。與阿正傾計，彷彿受到她的正能量感染，訪問期間不時笑到面部肌肉痙攣，覺得呢個人真係有啲癲癲地，但癲得嚟又有紋有路。
《一位呀唔該》原本是阿正開的 facebook fan page，「話說嗰陣時我失戀無耐，發現原來一個人生活係有啲難度嘅，唔慣好多野都要自己做，要一段時間適應。譬如一個人睇演唱會，我發覺其實都幾好笑，一個人睇演唱會都夠膽死！」於是她忽發奇想，有甚麼關於一個人去做的事呢？直至去年情人節被結他老師放飛機，她決定一個人去食情人節套餐，順勢開始《一位呀唔該》系列，挑戰各項一個人做的事，例如一個人倒數、一個人玩鬼屋、一個人 BBQ 和一個人食炒辣雞等等，她說最緊要大膽和厚臉皮！即使現在一個人開咪、出街採訪錄音也會緊張，她更笑說如果節目去到最尾一集會挑戰一個人影婚紗相！筆者好期待啊！
我個 feel 咁唔似拍過拖咩？
對於一個人的定義，阿正解釋：「我認為一個人不是純粹以單不單身去決定，就算拍拖都會有一個人嘅時間。《一位呀唔該》不只講單身生活，而係獨處時點去生活，單身唔係低一等，無乜大不了！」阿正毫不在意地回答，答得很灑脫。不過，她亦說《一位呀唔該》是挖個氹俾自己踩，因為俾人講得多單身，身邊也沒有男生願意埋身，最慘是所有人都設定她從來沒有戀愛經驗。阿正不忿地說：「通常其他人都是問你拍過幾多次拖？問我就係你拍過拖未？我個 feel 咁唔似拍過拖咩？係唔多，但係都有一次囉！」結果由《一位呀唔該》這個 page 開始到現在，她單身了三年。
好多人以為單身生活一定好鬼悶，阿正一啲都唔認同：「我一個人嘅生活好精采㗎！你話要拍拖先精采嘅話咁我幫你唔到啦，如果自己一個人都感覺舒服嘅話，就已經係正啦！我生活充實得很，只係當無另一半嘅時候，當你好攰好攰嘅時候，就會想搵人依靠吓。我覺得最寂寞嘅人，唔係無拖拍嘅人，係連對象都無嘅人！」阿正以她的招牌哭腔道出單身族心聲。
做個開心的下靶
現在做電台 DJ 再也不是「幕後」工作，透過不同渠道的現場、錄影播放，聽眾也會知道DJ們的樣貌，步入網上世界代表網民開始對你評頭品足，面對評語，阿正選擇一笑置之：「好多人覺得上鏡嘅阿正係扮出嚟嘅，成日話我喺《早霸王》嘅笑聲係扮出嚟、係唔係都笑，其實唔係囉，我做返自己咋！」至於開咪時經常成為被前輩取笑的角色，亦即是俗稱的「下靶位」，阿正坦言自己由細到大也在下靶位中成長：「好痴女啊、好師奶啊、好麻甩啊、成日比人鬧啊、鬧完之後又要死黐住人啊，你嫌棄我都要黐住你咁樣……可能就係因為咁培育咗（我）出嚟！」
有《早霸王》聽眾得知西瓜離職後由阿正空降頂替表示不悅，阿正坦言怕別人說她取代了西瓜的位置，或將她們兩個作比較，其實阿正和西瓜私底下很好朋友。「大哥（森美）是上靶，而下靶角色是要不停替換才好玩。我不知幾享受做下靶，千祈唔好比我做啲好認真嗰啲角色，搞唔掂㗎！」筆者發現她其實有點像初出道被封為「大笑姑婆」的楊千嬅，或許阿正也能憑獨特的魔性笑聲及搞笑能力殺出一條血路。阿正是個很容易滿足又無咩所謂的人，「我成日都提自己，開始都好驚自己有一日聽到（評語）會唔開心，入到直播室，開咪就係一場表演，你要專業啲。同埋唔好人哋講咩就覺得係針對自己，做人唔好太敏感就會覺得無乜嘢，商台同事都對我好好！開咪就緊係咁樣笑㗎啦，我覺得佢哋笑我，我先開心！起碼我參與到佢哋啊嘛！」
好𢯊女子︰
Ah Jeng 阿正 黃正宜 (903 DJ)
Facebook / 一位呀唔該
Instagram / 903ahjeng
YouTube / 一位呀唔該