零食黑洞由細吸零食吸到大，每日狂食零食不特止，細個嗰陣臨瞓都要啜住食完媽咪麵嘅有味手指先瞓得著，「零食是我的生命」，我認！
零食同時裝一樣都有潮流，例如早排興綠茶零食，就周街都係綠茶糖、綠茶餅、綠茶朱古力等；輪到新加坡嘅咸蛋魚皮突然興起，跟住好多零食都出咸蛋味。有啲零食會好似變色龍喇叭褲咁熱潮一去無回頭（就算再出都應該唔會有人敢再著），但係有啲零食就算經歷十幾廿年甚至更耐的時間沖洗，喺時代嘅洪流之中都仍然企得穩，到依家仲可以係舊式士多搵到，當你好耐無見佢哋，一遇上回憶即刻返曬嚟！
無人想認老，但身為八十後嘅筆者總會沾沾自喜曾經喺八、九十年代成長，見證過這些已消失的美味小食。記憶中嘅小學小食部，售賣林林總總的零食，拎住阿媽比嗰幾蚊雞零用錢，心裡面好興奮咁諗緊究竟買邊樣好，嗰種心情到依家都仲記得，人老咗，好多嘢都會唔記得，但我永遠唔會忘記那些年嘅零食！
1・甩色芝士圈
時興隆喺香港已經有超過四十年歷史，想當年有首主題曲，假如你仲記得「時興隆與你，共享昨天今天明天～」呢首洗腦歌，證明你年紀都唔輕，而且一定記得時興隆出品嘅芝士圈！芝士圈乃膨化食品，膨化食品是60年代末研發的食品，利用高溫、加熱處理穀類、薯類及豆類食物，使原料本身的形狀作出變化及膨脹，成為外表像煎炸過一樣的可口零食，很受小朋友歡迎。想當年返學每逢小息、放學總會衝去小食部或士多買包芝士圈嚟食，包裝幾乎三十年不變，打開即有濃濃嘅芝士味撲鼻，一睇就知落咗大量芝士粉，啲芝士味聞落仲有少少假，味道偏甜。呢款經典零食仲有「染色芝士圈」嘅美喻，因為次次食嘅時候都忍唔住將啲芝士圈穿落手指玩，玩到十隻手指頭變晒橙色！
時興隆 芝士圈 $8
2・軟腍腍粟米條
又係粟一燒？錯了，其實佢係同粟一燒差唔多樣，產自馬來西亞嘅 Fonzies 粟米條，有原味（即係雞味）、芝士味同BBQ咖哩味，三款當中以BBQ 咖哩味最好食，因為最入味。好多人都會將佢同粟一燒比較，的確粟一燒嘅質感更香脆，而且味道選擇更多，但係要食返細個嘅味道，梗係揀 Fonzies 粟米條，嗰種咬落好似擺耐咗變腍嘅質感。
Fonzies 粟米條 $8
3・辣味卷咖喱卷芝士卷
舊士多必有的時興隆辣味卷、咖喱卷和芝士卷，可算是零食中的經典。三款之中我最鐘意食嘅係係最濃味嘅辣味卷。雖然本人唔算太食得辣，但佢嘅辣味適中，味粉超多，足以刺激每粒味蕾，而且好鬆脆，咬落嗦嗦聲。三條一份嘅包裝份量剛剛好，而且價錢平，絕對係抵食之選！第二位係同樣濃味之選嘅咖哩味，味道幾接近日式咖哩，辣中帶點甜，脆香十足。而第三位的芝士味反而有點令人失望，色澤很淡，帶點橙黃色的味粉，食落芝士味當然很淡。值得高興的是這款零食依然是日本製造，由香港時興隆代理，算能挽回不少分數。
時興隆 辣味卷 咖喱卷 芝士卷 $4/包、$10/3包
4・口臭臭真魷味
幾乎稱霸七、八十年代零食界的時興隆，自八十年代始亦開始引入來自日本、泰國等地的零食，以開拓更大的零食市場。依家啲零食愈出愈大包，家庭裝、King Size 食到你唔想食，相反以前啲零食包裝普遍都有超細包裝，一隻手掌咁大的尺寸，對於小學生嚟講份量剛好。呢包泰國進口嘅真魷味波波係八十後細個必食系列，同樣屬膨化食品，標榜不經油炸，所以食落有種空氣感，超級鬆脆，食到停唔到口。每一粒面層都有好濃厚嘅魷魚味，微辣得嚟味道偏甜，亦係「口臭之選」，食完個口好似食魷魚絲咁大陣味。
時興隆 真魷味香脆魷魚酥 $12.9/8包
5・煙韌鱈魚絲
嚟到我最喜愛的零食－大發鱈魚香絲，細個比較少有呢類鱈魚絲零食，馬來西亞進口，佢嘅質感既無薯片咁香口、並唔及膨化食品嘅口感咁鬆脆、又無粟米條咁入味，不過咬落煙煙韌韌，仲帶啲腥腥地嘅魚味同一陣胡椒香，喺好多零食迷心目中都擁有皇者地位。分別有條裝及片裝，條裝睇落多啲，但食吓食吓眨眼就會食晒，一條接一條，有時仲會成打咁放入口；片裝原塊上，口感較硬身，可以邊食邊玩，撕出想要嘅形狀，𡁻到牙骹軟為止。食大發鱈魚香絲仲有秘技，就係當燒嘢食嘅時候不妨買幾包片裝拎去燒，放係火爐烘一陣就會成塊脆卜卜，呢個香港食法超級好味！
大發鱈魚香絲 ＄10/5包
6・無蟹味蟹肉酥
最近見歧嚟自新加坡嘅迷你蟹肉酥，回憶即刻返曬嚟﹗其實呢個系列仲有蝦炸酥，不過零食黑洞個人覺得蟹肉酥味道略勝一籌。呈方塊形的蟹肉酥大概只有指甲咁細塊，咬開酥內是空心，味道偏甜。細個食有時更會遇到質地腍身一點的，有種放到漏氣的感覺，最近食返發現蟹肉酥的表面掃多了幾層蜜糖，食落依然脆口，不過超級光澤及好唔自然的橙色的確有點假，比細個食嗰時甜度更高，過吓口癮就夠啦！
chui hiang蟹肉酥 $39/12包
7・鑽石戒指糖
戒指糖絕對係女孩子必食嘅dream candy，佢比起珍寶珠再大粒啲，如果不停咁啜都起碼半個鐘先啜得完。每粒糖都好似鑽石咁切割成八角形，然後套在戒指托上面，戴上手好似戴緊大大粒鑽石戒指咁，食完仲可以當首飾仔咁戴，滿足唔少女對鑽石嘅幻想！我最鍾意提子味，其次就係蜜瓜味，粒糖晶瑩剔透，望落真係好靚。因為依家啲手指太大，一隻手指都戴唔落，但係不時買嚟過吓口癮都唔錯㗎！
戒指糖 $3/粒
8・即溶太空糖
太空糖點解叫太空糖呢？相信係因為七、八十年代登月的話題性，仲有當年推出的《2001 太空漫遊》電影，將太空宇宙熱潮推至最高點。由於太空人在機艙內會進食太空餐或以藥丸取代正餐，所以四洲太空糖便以此為靈感，推出像藥丸般的粉糖，等小朋友可以幻想一番。大家口中的粉糖即是以「糖粉」壓製成粒狀的糖果，每粒味道都一樣，只有甜味，遇水即溶，所以一放入口就秒速溶掉，久唔久食吓幾過癮。
四洲太空糖 $7.9
9・抵食汽水糖
到今時今日都仲係日本製的 Orion 汽水糖，最吸引之處就係其模仿汽水嘅拉環式設計。味道有可樂、波子汽水及提子味，全部也是我至愛。汽水糖由砂糖熬製而成砂糖菓子，所以味道勉強算是有汽水味，超細粒的粉糖（比太空糖硬，又未去到硬糖的質地）一小瓶可以慢慢食足大半日，好抵食！
Orion 汽水糖 $4
10・唔可愛橡皮糖
一見呢個盒，相信大家都會記得嗰種好似咬緊橡膠嘅口感，雖然講到咁唔好食，但係 Red Band Tutti Frutti 果汁橡皮糖絕對係童年必食。分別有三種水果味，食落其實味道差不多，糖嚟講唔算太甜，但係相當煙韌。每粒好似指甲咁細粒，細心睇啲糖嘅外型其實係蝸牛、蝴蝶同青蛙，外表唔可愛都吸引到小朋友食，咁先係佢成功嘅地方。
Red Band Tutti Frutti 果汁橡皮糖 $4
11・三層薄荷朱古力豆
Delfi 嘅薄荷朱古力豆 Choco Mini 產自印尼，係我細個嗰陣最初接觸嘅薄荷味零食，同 M&M 差唔多細細粒。面層的綠色好明顯就係薄荷朱古力，中層係朱古力，最裡面係脆米夾心，食落出奇地夾，連平時唔好薄荷朱古力嘅我，都覺得呢款薄荷朱古力係最好食！
Delfi 薄荷朱古力豆 $6
12。有經歷先識食金梅片
細個成日都覺得金梅片唔屬於零食類別，硬係覺得金梅片只係阿媽食嘅嘢，正確嚟講係懷舊涼果。又係時興隆出品，不過呢款升級版金裝金梅片，綠襯金色罐裝令人感覺食緊高級零食咁 high class！金梅片以梅肉製成，味道酸之中帶甜，唔係個個小朋友都啱，等你年紀大少少，口淡淡想刺激吓味蕾分泌口水，有經歷先識得欣賞佢果種酸澀滋味。
時興隆 金梅片 $5.5
售賣點：
好多多直銷中心＿元朗阜財街日新大廈 5C舖 2656 3614
新美廉食品批發公司＿元朗壽富街 71 號 5 號舖 2475 7756