日本天皇明仁將會於今年4月30日正式退位，喺呢個時代終結之前，「#平成最後」就成為日本國內最熱門嘅話題。在跟平成說再見、迎接新年號之際，人們紛紛懷緬昔日的美好時光，向來擅長搞gimmick嘅玩具品牌TAKARA TOMY亦唔例外，最近推出咗「ザ・昭和シリーズ」（即昭和系列），造型取材自昭和年代出品的家電，包括電視機、黑膠唱盤及Boombox，實際上係玩得又用得大人の玩具。等老一輩可以重溫以往享受視聽娛樂的美好時光，亦令年青一代重新認識舊日的潮流玩意。重點係呢三件小玩具唔只得個樣？款款都有實際功能，仲可以配合手機APP變化出更多玩法，的確令人非常佩服玩具公司將無聊事認真做嘅精神發揮到極致！
重拾扭電視轉台嘅樂趣
現代人對電視要求多多，除咗要夠大、夠薄，亦要夠高清，最好有埋wifi功能，方便隨時上網選用不同串流媒體。成長於呢個世代嘅大家，大概都未經歷過真正可以「扭」開電視機嘅年代。TAKARA TOMY推出嘅座地式電視仔「昭和スマアトテレビジョン」就正正能夠做到呢個效果，只要將預先下載相應APP的智能電話放入電視機內，就可以選擇黑白、六十年代彩色、八十年代彩色或現代數碼四種不同效果觀看YouTube影片，扭一扭掣仲真係轉到台添！最特別之處都算係佢連舊電視常出現嘅雪花效果都跟到足，要你拍幾吓電視機頂先會有番畫面，成件事low tech得來幾好玩，可能有人會覺得呢部小電視完全唔實用，但係對我嚟講有得玩又可當擺設已經有存在價值。加上迷你電視機螢幕下的儲物位置亦照實還原，可以用來放置小物作收納之用，的確係誠意之作！
睇真啲，昭和電視仔（約W160 ×H173 ×D65cm）的確好似玩具咁膠，特別係背面嘅圖案卡紙令部機睇落更low tech，之不過佢嘅缺點同時亦係優點，作為大人の玩具就係貪佢夠low tech﹗
最緊要係預先下載相應APP，將智能電話放入電視機內「扮screen」就得，其實當佢係一個電話座都得，功能性加分﹗
迷你黑膠唱盤慳位晒品味
近年黑膠熱潮再度回歸，如果屋企無位放位真嘅黑膠唱盤，呢部玩具版「昭和レコードスピーカー」或者可以俾你過吓癮。雖然佢嘅體積只有手掌咁大（約W135xH42×D66cm），但一樣有型格像真嘅外型，豐富嘅細節，連唱臂與唱針位亦造得好仔細，甚至可以調較45rpm同33rpm轉速。只要將隨機附送嘅迷你黑膠唱片放上轉盤，配合手機APP就可以隨時重溫昔日金曲。想多啲變化，你仲可以係App內玩捽碟㗎！雖然表面上佢係一部黑膠唱盤，但實際上呢部機仔亦係藍芽喇叭，睇得玩得又用得，機仔細細但一啲都唔失禮！
轟炸機仔帶你經歷卡式回帶
繼黑膠之後，卡式帶亦係另一款回歸主流嘅音樂載體。要播卡式帶，當然就要有一部Boombox。TAKARA TOMY推出嘅迷你Boombox「昭和ミニラジカセ」，內附微型卡式帶一餅，有AB兩面，各5分鐘長，仲真係可以錄音同播放，加埋停播、快播、倒播等等功能，直情好似真嘅卡式帶機一樣。玩完卡式帶，呢部機仔仲可以變身成收音機，播放AM或FM頻道，真正功能十足。雖然呢部Boombox同樣係手掌咁大（約W121×H64×D34cm），唔可以好似八十年代啲飛仔咁抬喺膊頭去沙灘「焚機」咁威威，不過勝在夠cute又實用，無論送禮定自用都係一流。
foreforehead_深水埗基隆街132B閣樓 （ig / foreforehead_hi）
TEXT / R · PHOTOGRAPHER / MARIE ANSON · ASSISTANT / VICKY · 部分相片由foreforehead提供