三年前於NETFLIX首播的《Stranger Things》（怪奇物語），起用一班新人小演員做主角，透過神秘故事加超自然情節， 一夜之間成為全球熱話﹗只要大家細心留意劇中細節，無論係服裝、美術、場景設計甚至配樂，都會發現八十年代嘅流行文化，似乎對兩位劇集主腦Matt Duffer與Ross Duffer影響深遠，尤其是佢哋嘅創作其實好多都源自經典懸疑電影或cult片，例如《Alien》、《Ghostbusters》、《JAWS》同《The Thing》等等，話係參考又好，致敬都好，總之可以逐集甚至逐個scene搵彩蛋，對於觀眾嚟講都係多一重視聽樂趣，令劇集成為欲罷不能的binge-watch之選。
劇集紅遍全球，自然商機處處。趁住大家等咗好耐嘅第三季，終於喺7月4日隆重推出，全球大小品牌都爭相推出聯乘商品湊熱鬧，雖然唔係每樣聯乘產品都咁有新意，但無孔不入嘅周邊商品已經證明咗呢套劇有幾咁hit﹗身為忠粉嘅小編特別預備咗以下《Stranger Things》精讀，擺明全文劇透，簡單概括頭兩季劇情，睇過嘅fans可以當重溫，未睇過就不妨一睇打定個底，一齊拆解upside down 暗黑之謎！
點忍到手唔買？聯乘單品陸續有嚟……
《Stranger Things》紅遍全球，合作聯乘的品牌數目更是逐季增加，簡直可以用無孔不入來形容，務求要粉絲們衣食住行各方面都見到其蹤影。正所謂「橋唔怕舊，最緊要受」，老實講並唔係每樣聯乘產品都咁有新意，好多時候只係將商標或貨品上下倒轉放，已經當係貫徹「upside down」的主題。今回小編一次過點算吓近月有邊啲聯乘企劃陸續推出，唔知最啱你心水嘅又係邊樣？
1/ Levi’s
要數八十年代極為流行的時裝品牌，Levi’s必定榜上有名。於第三季《Stranger Things》之中，主角Eleven與Dustin更會穿上品牌與劇集聯乘的幾件商品作戲服，唔知眼利嘅劇迷又睇唔睇得出？其實今次聯乘一共有18件商品，亦參考咗Levi’s於八十年代的設計存檔去調整復刻造型，部分牛仔服飾更印有劇中多位主角的高清圖像作點綴，感覺非常old school。想平實啲嘅，亦可以選擇印有劇名或角色名的tee或衛衣，等粉絲們可以低調地支持一下心愛劇集。
Levi’s x Stranger Things Camp know where ringer tee $299/a（左）
Levi’s x Stranger Things logo black sweatshirt $559/a （右）
Levi’s x Stranger Things ELEVEN yellow sweatshirt $559/a （左）
Levi’s x Stranger Things printed denim jacket $1,099/a（右）
Levi’s x Stranger Things 505 regular fit printed jeans $999/a
Levi’s x Stranger Things logo sling bag $299/a （左）
Levi’s x Stranger Things trucker cap $199/a （右）
特別為忠實粉絲而設嘅主角圖案牛仔褸及牛仔褲，近睇即見Stranger Things主角全身肖像，呢個係主角之一Max。
2/ LEGO
早於今年3月就有聽聞過LEGO將會聯乘《Stranger Things》，但一直只聞樓梯響，真身遲遲未曝光，直至6月1日套裝才正式上架。整個套裝共有2,287塊積木，除咗附有8個主角人型公仔，模型屋亦以Will屋企為原型，有齊現實世界與顛倒世界兩面，細節位應有盡有，無論係房間入面嘅電影海報、專為捉Demogorgon而設嘅捕獸器，甚至係Joyce用嚟同Will通話嘅彩燈都有齊。值得一讚的是連宣傳片都絕不馬虎，跟足八十年代復古風格，可算是誠意十足！
LEGO x Stranger Things “The Upside Down”套裝 $1,799 /e
3/ Polaroid
在劇集中，每位主角的媽媽都會於萬聖節幫個仔精心打扮，仲會影低即影即有照片留念。因此，Polaroid亦順勢與《Stranger Things》推出OneStep2聯乘相機。機身齊集劇集元素，不只用上標誌性的紅色與藍色，所有字體亦倒轉放，其閃光燈更號稱由「霍金斯國家研究室」研發，似乎威力非常強勁。與相機同期推出嘅仲有16款不同設計的劇集主題I-TYPE相紙，粉絲們不妨儲齊一套！
Polaroid x Stranger Things OneStep2 $1,180/b (左）
Polaroid x Stranger Things I-TYPE 相紙 $168 (隨機8張) /b（右）
4/ H&M
雖然H&M已經不是第一個與《Stranger Things》合作的fast fashion品牌，但是次聯乘系列的設計選材勝在夠新，以劇集第三季即將登場的霍金斯鎮社區游泳池為靈感來源，推出一系列充滿八十年代感覺，用色浮誇兼剪裁復古的男、女裝服飾同泳裝。宣傳照仲搵咗於劇中飾演Billy Hargrove的演員Dacre Montgomery拍攝，貫徹他於劇中霸道又帶點邪氣的形象，唔講仲以為真係劇照嚟添！
On her：H&M x Stranger Things black printed tee $79.9/c,floral bikini bottom $79.9/c
On him︰H&M x Stranger Things printed shirt $179/c,red shorts $99.9/c（左）
H&M x Stranger Things white tank top $79.9/c （右上）
H&M x Stranger Things red sun visor $79.9/c, white tee $79.9/c（右下）
5/ NIKE
只要有留意《Stranger Things》演員的打扮，應該不難發現NIKE波鞋於劇中幾乎是隨處可見。終於在劇集第三季開播之前，兩個單位才首次合作，推出一系列聯乘商品，並以劇中的霍金斯高中為靈感，將主題色調綠色和橙色，以及吉祥物老虎融入設計之中。最先於6月尾登場的，是經典且百搭的Cortez和Tailwind運動鞋，而鞋盒亦有經過精心設計，附上一張仿製報紙，加上一枚印有品牌及劇集logo的襟章， 非常有收藏價值。順帶一提，唔止聯乘波鞋會陸續有來，仲有更多衣飾單品會緊接開賣， 等大家可以襯番個復古造型迎接新劇。
NIKE x Stranger Things Classic Cortez QS HH $899/d （左）
NIKE x Stranger Things Air Tailwind QS HH $849/d （右）
NIKE x Stranger Things 別注鞋盒
6/ Coca-cola
仲記唔記得，第一季劇中Eleven曾經在電視上看到可口可樂的廣告，繼而想起以往在實驗室中，被迫以可樂罐來訓練超能力的可怕經歷？呢個設定於八十年代嘅故事，亦啟發咗可口可樂同《Stranger Things》嘅合作，雙方決定於五月起復刻於1985年曾經短暫發售過，以改良配方研發的「新可樂」。雖然當時這款產品未被飲慣傳統口味的消費者接受，因而在發行三個月後便停產，不過今時今日因為劇集的帶動，大家又再有機會品嚐了！換上全新包裝的「新可樂」現時只於美國特定城市的自動販賣機發售，如果近期會到當地旅行，就要把握機會試吓喇！
7/Burger King
電視劇同漢堡包店合作，究竟會有咩驚喜？答案係……無乜。Burger King自6月21日開始就同《Stranger Things》以及Coca-cola合作推出嘅 “Upside Down Whopper”套餐，說穿了就只是將漢堡包上下倒轉放來呼應顛倒世界的主題，連宣傳片亦跟足劇集原裝片頭，無厘頭得嚟又幾幽默。不過，呢款漢堡包套餐同樣係美國限定，仲只會於全國11間快餐店限量發售，香港嘅觀眾唯有得個恨字。
8/ My Little Pony
雖然劇集講明不適宜16歲以下小朋友觀看，不過聯乘商品又點會有年齡限制？於是NETFLIX就搵埋《Stranger Things》同My Little Pony合作，炮製出 “Upside Down”版本的Applejack玩具。整隻公仔以灰藍色為主調，為了配合主題當然是被上下倒轉放在盒中。而包裝方面，紙盒上就印有第三季Dustin將會講出嘅一句對白，唔知咁樣又算唔算係劇透？雖然呢隻特別版小馬於6月30日先於美國公開發售，不過當地不少粉絲之前已經偷步買到，仲立即拍片放上YouTube分享添！
9/ Baskin-Robbins
第三季中，Scoops Ahoy雪糕店是Steve與新角色Robin工作的地方。雖然在現實世界中呢間雪糕店並不存在，不過美國雪糕品牌Baskin-Robbins由六月開始就推出咗一系列受劇集啟發而研創出嘅新口味甜品，全部以劇中角色或場景命名，例如 “Upside Down Sundae”、 “Elevenade Freeze”同 “Demogorgon Sundae”等等，當地粉絲可以一邊食甜品一邊煲劇，自然睇得更投入！
10/ Universal Studios
《Stranger Things》的故事帶有奇幻又詭異的氣氛，根本非常適合用作鬼屋主題，因此環球影城就把握機會與NETFLIX合作，連續第二年將霍金斯小鎮搬到美國荷里活、奧蘭多與新加坡三地的園區之中，於九月至十一月期間舉辦「萬聖節驚魂夜」，等一眾劇迷有機會親身走入顛倒世界探險。身為死忠粉絲的筆者去年亦專程到新加坡玩鬼屋，當遊走於還原度極高的各個場景之中，其實是驚喜多於驚嚇﹗唯一美中不足的是，當地的園區面積較小，只需大概3至4分鐘就可以行完成間鬼屋。不過場外其實仲有大量影相位，大家不妨慢慢行，睇吓認得出幾多個經典場面啦！
11/ IKEA
如果買完聯乘商品都係覺得唔夠喉，各位劇迷有冇諗過直接將屋企改造成劇中主角Will的家居？阿拉伯的IKEA於五月就推出了 “Real Life Series”(真實生活系列)，以品牌的一系列平、靚、正家品，還原三套經典美國片集，包括《The Simpsons》、《Friends》以及《Stranger Things》。雖然是次並不是IKEA與NETFLIX的官方合作，但也足以證明劇集在全球影響力之大。
溫故知新精讀班﹗
Season 1：一切由「失蹤人口」開始
故事背景設定於1983年，美國印第安納州一個名為霍金斯（Hawkins）的小鎮。有一晚成班好朋友包括Dustin、Will同Lucas喺Mike屋企玩完桌上遊戲後各自回家，途中Will突然被怪獸Demogorgon捉走帶到顛倒世界（The Upside Down）。Will嘅媽媽Joyce發現個仔人間蒸發後，立即陷入恐慌狀態，馬上向警長Jim求助。
另一邊廂，Dustin、Mike同Lucas同時尋找好友下落，期間遇上一個著住醫院袍疾走，並擁有超能力的女孩子Eleven。慌張的她由實驗室逃跑出來，因為實驗室的主腦Martin博士自Eleven嬰兒時期開始，已經對她進行不人道實驗，希望把她變成軍事武器。三位男生商量過後，Mike決定將Eleven收留在自己家中的地下室，後來更發展成兩小無猜的關係。
為咗救番Will，Jim向Martin博士開出交換條件：Jim需要透露Eleven身處的位置來換取博士的准許，讓他與Joyce可以一齊到實驗室之中，進入顛倒世界的缺口，展開營救Will嘅工作。
唔想再被困於實驗室嘅Eleven，亦使出超能力將打算夾佢走嘅實驗室人員殺死。點知因為現場濃濃嘅血腥味，召喚咗Demogorgon上嚟開餐，即使是Martin博士與一眾手下都敵不這牠的血盤大口而全軍覆沒。為了保護好朋友，Eleven施展渾身解數，最後只能與Demogorgon（暫時）同歸於盡。
最後，Jim同Joyce亦成功於顛倒世界找到Will，把他帶回現實世界，第一季（都係暫時）以大團圓結局告終。
Season 2：奇異小鎮怪事頻頻
於顛倒世界死裡逃生的Will，似乎一直不能擺脫被暗黑力量操控，除咗曾經嘔出一條神秘昆蟲，亦開始在毫無預警的情況下，意識上重回顛倒世界，更發現體型龐大嘅新怪獸Mind Flayer正不斷嘗試接觸自己。另一方面，擁有主角光環嘅 Eleven又點會咁易死？當她逃出顛倒世界後，被警長Jim秘密收留在森林小屋，以免外界發現她的存在。雖然呢段「父女關係」幾溫馨，不過Eleven始終掛住Mike，所以成日想偷走出去，亦因為咁同Jim多次爭執。
一向和諧平靜的小鎮突然經歷多事之秋：來自加州的兄妹Billy與Max搬到小鎮，引起一陣騷動、Dustin開始飼養來歷不明兼快速長大的奇怪生物、鎮上的南瓜田開始離奇枯萎，周遭植物更有顛倒世界嘅特徴。神探Jim又再次爆發佢嘅偵探小宇宙，發現事件可能與實驗室通往顛倒世界的缺口有關。
持續被Mind Flayer意識上騷擾嘅Will，受到單親媽媽嘅男朋友Bob啟發，希望擺脫恐懼，因此嘗試挑戰「夢中」的怪物。點知被Mind Flayer成功上身，逐漸控制佢嘅自主意識。
為咗做好警長的工作，Jim隻身到南瓜田進行調查。而身處家中，被怪物附體的Will開始行為怪異，不停繪畫奇怪圖畫，令媽媽Joyce不明所以。圖畫最後被聰明的Bob成功拆解，原來將所有拼圖整合，就會發現南瓜田下面係小鎮嘅地下通道。
當眾人趕去成功救番Jim嘅時候，邪惡實驗人員就趕到，打算用噴火器燒毀因顛倒世界缺口而形成嘅地下通道。一燒起上嚟，Will就痛苦不已，所以馬上被送往實驗室接受治療。
究竟保住Will條命緊要啲，定係消滅顛倒世嘅威脅緊要啲？雖然Will已經同Mind Flayer連成一體，好在佢仲保留到清醒嘅意識，以摩斯密碼打出 “CLOSE GATE”指示，要大家幫手關上實驗室裏的顛倒世界缺口，先可以撃敗Mind Flayer。雖然過程中Mind Flayer曾經使出大量Demodogs（Dustin飼養的不明生物長大後亦成為其中之一）進行攻擊，令大量實驗室人員同Bob犧牲，但喺關鍵一刻，Eleven霸氣出場，用超能力將所有怪獸殺死，仲流住兩行鼻血咁用畢生功力關閉大門，保住大家安全。
最後一幕以校園冬日舞會作結，唔止Eleven與Mike，就連Max與Lucas亦變成一對，第二季正式結束。
Season 3︰ What’s Next?
第三季主要場景會由小鎮轉移到新落成嘅購物中心Starcourt Mall，而時序亦會由秋天轉至夏天，令場景與戲服設計都充滿活力感覺，相信會與詭秘的情節有更大反差。另外，各位主角都由小朋友步入青春期，歡樂、浪漫嘅情節唔少得，但隱藏危機同不安氣氛亦逐漸蔓延，究竟Will係咪已經完全擺脫到Mind Flayer？小鎮係咪會繼續受顛倒世界威脅？想知道答案，7月4號自己睇啦！
a/ Levi’s_尖沙咀新港中心LG48-52號舖 3101 0531
b/ SHOWA_旺角西洋菜南街66號3樓6541 5621
c/ H&M_九龍塘又一城UG-26, L1-25及L2-35號舖 3106 6940
d/ NIKE_尖沙咀海港城港威商場3樓3237號舖 3580 2783
e/ LEGO Store_太古太古城道 18 號太古城中心地下 012 舖 2116 4378