上回提到﹐為了防疫，家陣全世界都盡量宅在家，當男女老幼悶到抑鬱之際，好彩任天堂近日推出Switch 最新生活模擬遊戲《集合啦！動物森友會》（あつまれどうぶつの森 / Animal Crossing: New Horizons），輕鬆得嚟都要用腦，而且考你反應、組織能力、仲有fashion sense﹗出得咁合時，所以一出即掀起炒風及成為網上熱話。好𢯊記者首次衝出現實，特別遠赴7位忠實森友嘅私家島，訪問佢哋嘅上癮之迷，繼PART 1登場嘅 Angela Yuen（袁澧林）、蔣雅詩（Ziya）、Evelyn Choi （蔡穎恩），及Midway店主Rita，PART 2有請舞台劇演員葉麗嘉、Super Girls成員Yanny，同埋馬來西亞代表Fish liew (廖子妤)開心share﹗ 如果你都係森友應該有共嗚，未玩過嘅不妨聽過來人講吓點解會為動森動心。唔想無話題，唔玩都要知﹗
#好𢯊森友 5號
葉麗嘉 Rebecca
（舞台劇演員）
「只要開始這個遊戲，時間就不經不覺蒸發了。」
01 好𢯊森友背景︰
友名︰ika／ 島名︰米米鼠島（米米鼠是家裡貓的名字）有人跌島 ／登錄日︰2020年3月25日
02 你係唔係機迷？
Gameboy時代很鍾意孖寶兄弟，打爆一次又一次，被媽媽沒收之後好長時間都沒有再玩，近年只玩過Mario Kart。
03 點解玩森友會？
初時誤以為是一款沒有壓力的遊戲，覺得可以自己設計衫和上載喜歡的圖像到遊戲十分新鮮。搞了一輪，終於掛上安西水丸的畫，換了marimekko衫（圖像鮮明易辨認）和床單，在小屋內把玩精緻的小道具：微波爐能轉動、電飯煲開蓋會出煙、俄羅斯娃娃一個能變三個、玻璃窗還有雨滴⋯⋯真心感到滿足。
04 一日玩幾小時？
All day！試過夜晚十一點玩到五點，刷新然後才睡覺，最鍾意日夜交替的時段，畫面最美。只要開始這個遊戲，時間就不經不覺蒸發了。
05 最鍾意嘅造型？
暫時的服裝都甩頭甩髻，有衫無褲襯，有裙無鞋襯，希望服裝店早日開張。
06 去過幾多個島？
3個。有一個朋友把房間裝飾成占卜房，陰暗的房間放了水晶球和蠟燭，走進去那一刻真的充滿神秘感和新鮮感，如果朋友懂塔羅，這裡似乎是一個很有趣的虛擬場地。
07 特別經歷分享？
有一次去妹妹的島，妹妹很開心地出來迎接，不停轉圈。小時後我們是上下格床share一個睡房，沒有空間發揮個人特色。去了她的島，看見喜歡gothic style的妹妹種了黑色鬱金香，房間放了骷髏骨，很盡興。在遊戲裡我喜歡去動物居民家探訪，每一隻的風格都不同，獨角獸朱黎的佈置華麗浪漫，彷彿置身雲端；小鹿音音有一個大書櫃，總是在看書。會想去朋友的島，對我而言也是想要體會別人的風格。
08 有咩唔滿意先？
買樓安家、起路造橋，為還貸款疲於奔命，忙碌過現實。對我這一類主要喜歡佈置家居和收集小道具的玩家，每日釣魚捕蟲砍樹拔草好辛苦。
09 希望改善嘅位？
提供一個輕鬆mode，遊戲時間比真實時間緩慢，進取與懶散自己選擇。
10 建議其他人玩？
不會﹗因為非常耗時，時間寶貴，不敢推人入坑。玩到貓咪都黑面，在我打機的沙發位置拉尿已經兩次！考慮棄坑中。
去米米鼠島訪問ika期間，粉紅色嘅鄰居經常喺鏡頭前行來行去，睇嚟好想上鏡。
#好𢯊森友 6號
Yanny @ Super Girls
（歌手／演員）
「好搞笑，有fans問可唔可以喺佢個島搞fans gathering﹗」
01 好𢯊森友背景︰
友名︰Yanny／ 島名︰有人跌島 ／登錄日︰2020年3月22日
02 你係唔係機迷？
我鍾意打機啊﹗但通常好快玩厭，最沉迷應該係傳說對決、牧場物語、重聚礦石鎭、薩爾達傳說，同埋最近嘅動物森友會﹗
03 點解玩森友會？
唔同遊戲有唔同吸引人嘅地方，而我係一個好鍾意完成任務嘅人，成日見到佢有啲任務俾我我就會好想達成﹗😅
04 一日玩幾小時？
視乎工作而定，如果要拍戲拍劇就肯定唔玩。因為我知道自己會絕對極度沉迷，好容易投入喺遊戲世界，所以我冇辦法一心二用又拍嘢又打機。最沉迷嘅狀態係，如果放假我可以係除咗食飯沖涼餵貓，幾乎可以全日不停咁玩，甚至玩到唔瞓覺。
05 最鍾意嘅造型？
最鍾意我瞓覺個look，因為連玩遊戲都可以敷mask，我覺得好正﹗
06 去過幾多個島？
大約五、六個吧﹗印象最深刻係有一個朋友整咗一條好靚嘅櫻花路，我哋大家一齊野餐賞花影相，感覺好似去咗旅行咁﹗
07 特別經歷分享？
有一次我哋去朋友嗰島一齊玩捉伊人，朋友set咗幾個場景玩爭櫈仔，之後又特登掘個窿一齊跳落去拍片，成班朋友好似一齊去返細個嘅時候咁，好笑得來覺得好溫馨﹗
仲有，好搞笑，有fans問可唔可以喺佢個島搞fans gathering﹗
08 有咩唔滿意先？
唔明點解一定要捉咁多蝴蝶﹗（本人好驚蝴蝶）啲蝴蝶又成日飛來飛去，頭一兩日每次捉個心都震出嚟，而家盡量捉到放大嗰一刻轉移一吓視線，有次唔小心入咗去個圖鑒睇，嚇到我成個手掣掉走﹗哈哈﹗
09 希望改善嘅位？
每次去喺朋友嘅島，一有人喺機場嚟所有嘢就會停止，有一次差唔多釣到鯊魚，無啦啦又冇咗，
嬲！
10 建議其他人玩？
會。因為呢個game設計得太豐富，無論你鍾意服裝設計、室內設計、園景設計，定係有收集癖或者真係好認真咁研究昆蟲魚類，總有一樣嘢係你啱玩﹗我覺得設計得咁好嘅遊戲，好應該見識一下。而且既然宜家疫症冇得出街，難得有一個虛擬嘅地方俾你同朋友見面聯繫友情，好開心﹗
由於訪問當日Yanny需要開夜，記者去到有人跌島採訪時已經係零晏一點幾，感謝敷住mask嘅Yanny陪我閒逛，仲帶我去佢睡房參觀。
#好𢯊森友 7號
廖子妤 Fish（演員）
「已經有一年冇見過家人，當我在動森裡面收到媽媽的來信，當下就哭了出來。」
01 好𢯊森友背景︰
友名︰細薑（未上映電影嘅角色名，我好鍾意呢個名。）／ 島名︰刁曼島 ／登錄日︰2020年3月30日
02 你係唔係機迷？
細個都鍾意打機，但我反應比較慢，打得差，所以鍾意玩些不需要考反應嘅Open world Game（開放世界遊戲），例如The Sims、GTA之類。其實玩Game都幾睇到一個人嘅性格，我妹妹就好循規蹈矩，會慢慢經營按部就班地做曬啲主線任務。我就鍾意亂咁嚟，想睇下會發生咩事。比方說想看看The Sims能不能有同性伴侶，或者能不能和家中出現的鬼魂調情。試過一次我玩妹妹的紀錄，結果個男角色俾外星人抓走，生咗一個綠色嘅BB。我妹妹超嬲！但我覺得好有趣，呢隻game應該就係要實現我哋係人生唔會發生或者唔常遇到的事。
03 點解玩森友會？
因為想住在海島。同埋聽海浪聲、人物奔跑嘅腳步聲、NPC嘅鼓掌聲令我感覺好治癒好好聽，最開心係可以唔使戴口罩周圍走。
04 一日玩幾小時？
我玩咗幾日，暫時最多係一日玩6個鐘。儘量想在早上玩，因為想見到太陽。
05 最鍾意嘅造型？
頭插住花，因為我鍾意大自然嘅嘢。
06 去過幾多個島？
暫時去過兩個島，我有加入朋友嘅動森whatsapp group，但大家進度太快，好勤力，連半夜都玩，我已經完全跟唔到。我想舒舒服服慢慢玩，所以就自閉地自己玩。印象最深刻係我去到一個男編劇嘅島，發現佢喺game入面係一個戴帽嘅妹妹。😂😂😂
07 特別經歷分享？
在我生日的隔天早上，我在信箱裡面收到一封來自「媽媽嘅信」，寫得好感人，還附上了蛋糕。
本來今年生日想回去馬來西亞跟家人慶祝，因為我已經很多年沒跟他們慶祝生日，除此之外，也已經有一年冇見過家人。但疫症關係，不知道什麼時候才能見到家人。結果在動森裡面收到「媽媽」的信，我當下就哭了出來。
08 有咩唔滿意先？
基本上作為一個好少打機嘅人，對於這款遊戲我也沒有什麼不滿意的地方。我見好多人會想盡辦法迫走佢哋覺得好樣衰嘅鄰居，我覺得好慘，樣衰都非佢哋所願。
09 希望改善嘅位？
如果可以在遊戲內加入戀愛或結婚元素都幾好。
10 建議其他人玩？
疫症底下，可以自由地在海島上奔跑都算係滿足咗我嘅願望。無論是想在無人島上建立城堡，或是像我這樣只想按照自己的節奏慢慢玩，都推薦給大家。
希望疫情快啲完結，Fish可以快啲返馬來西亞同家人團聚，唔使再喺動物之森先可以見到妹妹同埋媽咪啦﹗
TEXT / PHOEBE CHAN · PHOTO / 好𢯊記者，好𢯊森友 Fish Liew、Rebecca Yip＆ Yanny 提供 · DESIGN / CHAN SHE