日式家常料理の美好買一次餸煮足四餐

這大半年來，常聽說抗疫期間人人變廚神，因為疫情下大家盡量留家抗疫，宅在家中百無聊賴唯有寄情烹飪，加上政府勒令食肆晚市禁堂食，無論是否自願都要開始自煮人生。幸而網上有大堆影片、文章甚至插畫教你煮餸，只要肯睇肯學，就算唔睇得都起碼食得落。

好𢯊今回邀請日式料理教室 suijiba 的主理人 Virginia，為大家示範買一次餸可連吃四餐的一人前日式料理餐單，唔止好睇好食，重點係透過不同食材的組合，創作出四餐豐富又好味的日式料理，備足四餐料又可以出少啲街買餸。無論是否經歷疫情，一個人生活總不成問題。可是，若一個人自理三餐，不吃外賣，又有幾多人做到？其實用心煮一餐俾自己食，都係一種享受。

學嘢之前，不如先了解一下學校及老師背景﹗suijiba 的日文解作廚房，因為Virginia喜歡煮食也喜歡日本器具，更享受每天生活也是圍繞廚房，所以就直接使用這名字。咁點解Virginia會選擇教授日式家常料理呢？不如由佢親自分享。

與suijiba主理人對談

G︰GOODDIG
V︰Virginia

G︰為什麼會學習日式料理？
V︰其實我無正式學習日式料理，只係曾於2017年嗰陣到日本工作、生活，先至開始認識在地家庭料理。我之前學法國菜出身，亦曾於日本九州福岡縣山上小鎮的一間西班牙餐廳工作。喺日本生活嗰段時間，偶爾會請教日本人朋友，關於日式料理都係從佢哋身上偷師而來。喺日本生活就會開始「明白」嗰種味道，有時當嚐到什麼好味有趣的，也會試吓做出嚟。

G︰你認為法國菜與日式料理的最大分別是甚麼？也有煮中菜的經驗嗎？
V︰於我而言，最大分別並唔係菜系嘅分別，而係精緻料理與家庭料理嘅分別。精緻料理講求細緻細節，準備食材與烹調時都要分亳無誤，重點係美感，整套餐嘅設計包含好多理論、意義、哲學，好多時候係從整個餐單去睇。相對起來，家庭料理較為簡單，隨心。今日心情想吃什麼便煮什麼，亦沒有特定嘅食材配搭與調味規範，自己或家人喜歡便可以，相對輕鬆。

濃厚醬汁係法式料理特色之一，但唔好忘記法式料理亦著重不時不食、新鮮食材，呢個同日本料理相同。然後，好多人話烹調法式料理好費時，係真嘅。但有些日式料理都係好費時，例如好味嘅關東煮便需要熬煮2至3日。我想講嘅係，好嘅料理都係透過時間展現風味，也亦有一定嘅步驟去跟隨，我哋可以快但唔可以急，一急跳咗步味道口感就會唔同。

G︰來學習日式料理的學生通常是什麼人？
V︰主要都係自己住或是享受生活嘅人為主。我會由食材、調味料講起，大部分堂同學需要自己處理食材，包括切菜劏魚，對於平時甚少揸刀嘅同學嚟講，係好好嘅學習機會。同埋一人一爐，佢哋全程都知道每一個step 點做，唔洗返去估估吓。
曾經有一個駐倫敦嘅空姐嚟上堂，佢只留港三日住在機場都花一日時間過來，令我好開心！仲有當陪月嘅學生，係佢令我知道原來坐月都可以食某啲嘢﹗

G︰你認為一人煮食最困難是什麼？應如何克服？
V︰一個人煮食的確唔容易，買食材都有最少量限制，所以最好都係諗定一份食材化成2至3個餐單咁去處理（例如我為你們示範的一次過準備4日餐)，又或者係可以做成醃漬（包括醃肉），咁樣就可以保存得耐啲。又或者煮一啲少或無油分嘅常備菜，日式家庭料理便是如此，無油分相對可以keep 得耐啲。
我建議趁有時間準備定多啲份量，然後按食量分好portion 放急凍（例如醃扒、甚至吉烈都可以做好放急凍），或做一些常備菜（例如當日的鹿尾菜、南瓜煮、滷皮），夜收工回家就可以煮個麵淥個菜解凍即食。

G︰suijiba也有販售日本職人製作的器具，你認為器具重要嗎？
V︰對我嚟講，器具不只是藝術品，能夠用於生活當中，才能展示其價值。再者，未必每一餐家庭料理都可以一式一樣完美咁呈現，可能會因為心情唔同而有所不同。而一件「特選的」器具，或者可以彌補烹調時失手嘅失落，亦可令一道出色料理更錦上添花。換言之，器具配合得宜，可以完整一頓豐膳。