呢個年代，大眾高呼拒絕標籤，但談何容易？
正如望住喺時尚圈打滾多年嘅Chris Chan，觀其衣著打扮及國際知名網購平台亞太區市場部總監嘅身份，大概好多人同我一樣，認定佢只會光顧高級髮型屋。呢啲咪標籤囉﹗時尚達人就唔會幫襯速剪店咩？速剪店就一定係唔靚唔專業咩？
Chris自言︰「做咗luxury咁耐 ，我觀察到市場好兩極化，一係要最誇張嘅luxury， 一係就要走mass market。」更重要嘅係，以往只會光顧高級salon嘅佢在疫情期間試過速剪後返唔到轉頭﹗「原來係幾物超所值，可惜坊間速剪店良莠不齊，所以我想開一間，即使係短短十幾分鐘，我想客人入到嚟依然可以享受及放鬆，香港人實在太緊張喇﹗」呢啲咪將心比己囉﹗
如是者，Chris同朋友合資喺屯門開設型格速剪店CLEAN CUT（清剪），望吓店舖相片，咁嘅裝修，點估到一口價$80﹗幾時都話，好多嘢唔好只睇表面﹗
Chris ＠ 網購平台亞太區市場總監
抗疫都要靚，做得fashion都係貪靚啦﹗
Chris 現為國際知名網購平台的亞太區市場部總監，在此之前，曾在某本地時裝集團任職多年，筆者一直知道這個時尚達人的存在，私底下卻不認識。直至早前在某共同朋友的社交平台看到他開了速剪店的帖文，腦內即時彈出「咁得意﹗」三個字。疫情下大家不再安份，敢作新嘗試不再是新奇事，奇就奇在穿梭於luxury brand之間嘅fashionista竟然選擇開一間一口價$80速剪店，我所指嘅得意正是這種反差萌。
「我份人一方面好理性一方面又好感性﹗做咗十幾年fashion 都想試吓啲新嘅嘢，做得fashion其實都係貪靚啦，除咗時裝之外又想扮靚咁做咩呢，都係beauty 或salon，點樣令成個人grooming好睇啲，數吓數吓都唔係得返好多，就開salon啦﹗理性方面，而家份工係睇網購，好多都係數據分析，咁我都鍾意計吓數，計計吓發現做到生意嗰個scalability（可擴增性）ok喎﹗我做咗luxury咁耐，觀察到市場好兩極化，你一係要最誇張嘅luxury， 一係就要走mass market，所以決定開價錢較貼地嘅速剪店﹗」
「做得fashion都係貪靚」某程度上係嘅，咁貪靚都唔係今時今日嘅事，係乜嘢觸發你行呢一步呢？就係因為疫情？「其實幾年前已經有諗，咁最主要原因都係因為疫情重。疫情對我影響好大，我係一個好鍾意做嘢嘅人，我每日都會花好多時間喺office，以前如果我唔係出business trip 我就唔會放假。今年無得出trip迫住放假就喺香港周圍explore。開速剪店個idea係我諗先嘅，但因為有份正職，而我又好想開始做啲嘢，咁我就同身邊可能有興趣嘅人傾，如果我係可以convince（說服）到佢哋而自己亦believe件事，即係可行啦﹗應該係上年六七月左右，覺得真係要開始，大家都有落手落腳，歷時準備大約5個月左右，終於喺年底開張。」
試過就知物超所值，疫情下大家都想慳啲﹗
COVID-19雖然暫時不致於是人類歷史上造成最多死亡的傳染病，卻徹底改變全人類的生活習慣。好多嘢從前我哋認定無可能，如今大家都明白nothing is impossible。以前嘅Chris從未幫襯過速剪店，疫情下終於嘗試第一次。「老實講，疫情前我無試過（速剪），疫情期間有時幫吓家姐手湊吓細路，有次行過一間只提供單剪服務嘅髮型屋，細路仔同我講︰『舅父，我喺度剪頭髮㗎﹗』我見好似幾得意就試吓，試咗一兩次之後覺得真係幾物超所值，咁疫情我都想慳啲嘛﹗我諗大家收入或多或少都有影響㗎﹗之後再試多一兩間（速剪店），發現都幾良莠不齊，有啲真係好求其，價錢貼地啫都唔可以求其得咁緊要，所以我決定開一間都係價錢貼地，但係我想俾大家luxury嘅感覺，即係舖頭嘅裝修、環境，師傅嘅手勢都要有一定水準。」
疫情下，熱愛工作嘅Chris選擇唔俾自己停落嚟，因為永遠唔會有最好嘅timing。Chris︰「我覺得中國人用嘅詞語係好有意思嘅，危機危機，有危就會有機，呢個世界有啲嘢跌咗就會有啲嘢升上嚟，可能好多人初初都無諗過做delivery會咁成功添，
只要你睇準時機同埋believe in呢樣嘢就要嘗試去做，永遠唔會有最好嘅timing﹗」咁正職又點？「難度一定有，但時間係安排出嚟，同埋我都提過我好鍾意做嘢，我係enjoy嘅暫時。加上我份工係晏晝或夜晚比較忙，因為我嘅對象係喺美國英國，所以唔會好影響日常工作。」
日系設計著重空間感，十幾分鐘剪髮過程都可以享受放鬆
香港常見嘅速剪店往往是地方狹窄且無裝修可言，未入到去已經feel到個趕字，而且往往滿店盡是踢住拖鞋嘅男性街坊。坦白講，我未幫襯過速剪店，但係嚟到CLEAN CUT，的確有少少心動想試吓，因為呢間速剪店嘅裝修及細節位絕對係顛覆咗我對速剪店嘅印象。
Chris︰「因為疫情關係，設計呢啲booth就諗一定要有咁上下距離，始終唔知疫情會發展成點，唔想每個位之間咁迫。雖然唔係屏風，都有少少屏風嘅阻隔作用，二來因為我係日本控，我諗好多同我差唔多嗰個年代嘅人，無論而家或者曾經都係日本控，我好鍾意無印（良品）呢個品牌，長青、無菌，好fit到疫情需要。而你見到呢啲booth之所以咁設計，係參考以前去日本旅行嗰陣見到嘅日本建築有類似咁嘅形狀，日本有間幾出名嘅酒店都係呢個形狀。至於呢塊圓形鏡，如果你去過京都或者去過啲寺廟禪修，應該會記得喺寺廟望出去會有塊圓形鏡 ，感覺好似好relax咁。我唔想俾人感覺到雖然係短短嗰十幾分鐘，都好似好趕急想趕你走咁 ，我想客人入到嚟都依然可以享受放鬆，香港人實在太緊張喇﹗」
開業個多月，CLEAN CUT（清剪）團隊常在社交平台上載顧客剪後靚相，原來都有好多女性同我一樣被呢間非一般速剪店吸引住。Chris︰「開店前觀察到大部分速剪店主要做男仔生意，但其實女仔都有呢個需要，有時髮尾或瀏海長咗少少，又或者頭髮有少少分岔，可能需要修一修，如果光顧其他salon可能修一修都要八百至一千蚊剪一個頭，如果大家知道有呢個option，花幾十蚊就可以將唔鍾意嘅分岔頭髮或瀏海剪咗佢，對我哋或顧客嚟謂都係各取所需囉﹗有啲人剪完頭嗰一刻好靚，可能兩日之後個shape就無咗，髮型係要修㗎嘛﹗我哋女性顧客嘅比例已經高過其他速剪店，相信嚟緊嘅比例會愈嚟愈高，同埋揀呢間舖都有少少策略性，附近都係化妝品店，行嘅人都係女性為主，我哋好希望女性客戶群試下呢個service。」
CLEAN CUT（清剪）團隊常在社交平台上載顧客剪後靚相，好多女仔幫襯啊～～～
可惜屯門離我家偏遠，否則我應該好快會再出現，好彩Chris報喜︰「地點好重要，我哋主要target人口密集嘅新市鎮，繼屯門之後都想喺觀塘、荃灣、黃大仙等地開分店，希望生意ok啦﹗」最希望咩人嚟幫襯啊？Chris諗咗幾秒︰「嗯…車銀優囉﹗因為佢個髮型係好簡單中分學生頭，但呢啲髮型長咗會令面形睇落好似拉闊咗咁，需要成日修側邊，呢度嘅service就啱啱好，如果你想執吓個髮型但又唔係好得閒，或者覺得要維持髮型係好嘥時間嘅事，呢個service啱啱好，無理由次次都俾成千蚊修少少㗎﹗」
就算你未必可以好似Chris咁趁疫情拿出時間及金錢開拓新事業，都可以盡量諗下有咩利人利己嘅事可以做，同意Chris所言︰「疫情下大家都想慳啲」，但係慳還慳，好𢯊精神係慳都要靚，CLEAN CUT 清剪嘅出現絕對來得合時﹗
CLEAN CUT 清剪
屯門市廣場一期一樓1126號舖
Instagram / cleancuthk
Facebook / CLEANCUTHK